សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ របាយការណ៍របស់សហព័ន្ធស្រូវអង្ករកម្ពុជា CRF បានឱ្យដឹងថា ក្នុងរយៈពេល១ឆមាស កម្ពុជាបាននាំចេញអង្ករចំនួន ៣៨៧ ០៧០ តោន គិតជាទឹកប្រាក់បានចំនួន ២៨៣.៤១ លានដុល្លារ និងនាំចេញស្រូវសម្រេចបានចំនួនជាង៣,១លានតោន និងទទួលបានទឹកប្រាក់ចំនួន ៧៥៧លានដុល្លារអាមេរិក ។
របាយការណ៍បានបង្ហាញថា គិតចាប់ពីខែមករា ដល់ដំណាច់ខែមិថុនា ឆ្នាំ២០២៥ កន្លងទៅនេះ កម្ពុជាបាននាំចេញអង្ករបានចំនួន ៣៨៧ពាន់តោន ទៅកាន់គោលដៅទីផ្សារអន្តរជាតិចំនួន ៦៣គោលដៅ ដោយទទួលបានទឹកប្រាក់ចំនួន ២៨៣លានដុល្លារអាមេរិក ខណៈការនាំចេញស្រូវសម្រេចបានចំនួនជាង៣,១លានតោន និងទទួលបានទឹកប្រាក់ចំនួន ៧៥៧លានដុល្លារអាមេរិក ។
សហព័ន្ធស្រូវអង្ករកម្ពុជាបានបញ្ជាក់ថា ការនាំចេញអង្ករចំនួន ៣៨៧០៧០ តោន ត្រូវបានធ្វើឡើងតាមរយៈក្រុមហ៊ុននាំចេញអង្ករចំនួន ៥០ ក្រុមហ៊ុន ទៅកាន់គោលដៅចំនួន ៦៣ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៦ បានបរិមាណអង្ករចំនួន ១៨២ ៨៨៥ តោន គិតជាទឹកប្រាក់ចំនួន ១៤៣.៦៤ លានដុល្លារសហរដ្ឋអាមេរិក ។ ដោយឡែក នាំចេញទៅកាន់ទីផ្សារប្រទេសចិន និងនិងរដ្ឋបាលស្វយ័ត ហុងកុង ក្នុងបរិមាណ ១០២ ៥០៩ តោន គិតជាទឹកប្រាក់ចំនួន ៦០.២៥ លានដុល្លារសហរដ្ឋអាមេរិក ។
ក្រៅពីនេះ បាននាំទៅកាន់បណ្ដាប្រទេសក្នុងអាស៊ាន ចំនួន៧ប្រទេសបានបរិមាណចំនួន ៥២ ៨៩០ តោន គិតជាទឹកប្រាក់ចំនួន ៣៧.០៩ លានដុល្លារសហរដ្ឋអាមេរិក និងទៅកាន់គោលដៅ ៣២ ប្រទេសផ្សេងទៀតមានអាហ្វ្រិក មជ្ឈឹម បូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៤៨ ៧៨៥ តោន គិតជាទឹកប្រាក់ចំនួន ៤២.៤២ លានដុល្លារសហរដ្ឋអាមេរិក។
ចំពោះប្រភេទអង្ករ បាននាំចេញអង្ករក្រអូបចំនួន ៧៥% ប្រភេទអង្ករសគ្រាប់វែង ១៩.៦៨% អង្ករចំហ៊ុយ ២.៤៩% អង្ករសរីរាង្គចំនួន ២.១៣% និងអង្ករផ្សេងៗចំនួន ០.៧% ។
របាយការណ៍បានបង្ហាញផងដែរ ពីការនាំចេញស្រូវរបស់កម្ពុជាទៅកាន់ប្រទេសជិតខាង ក្នុងបរិមាណចំនួន ៣ ១៧៦ ៥៦១ តោនស្រូវសើម ដែលគិតជាទឹកប្រាក់មានចំនួនប្រមាណ ៧៥៧.៤៩ លានដុល្លារសហរដ្ឋអាមេរិក
សូមជ្រាបថា វិស័យស្រូវអង្ករកម្ពុជា បានដើរតួនាទីជាសសរស្តម្ភមួយយ៉ាងសំខាន់ក្នុងការទ្រទ្រង់វិស័យសន្តិសុខស្បៀង និងសេដ្ឋកិច្ច ដែលរយៈពេលជាង ១០ឆ្នាំមកនេះ វិស័យស្រូវអង្ករកម្ពុជាបានធ្វើឱ្យមានលំនឹងសន្តិសុខស្បៀង និងការពង្រីកសក្តានុពលពាណិជ្ជកម្ម និងវិនិយោគដោយបាននាំចេញអង្ករចំនួនជាង ៦៥១ពាន់តោន និងស្រូវចំនួនជាង ៥,១លានតោននៅឆ្នាំ២០២៤ ដែលផ្តល់ចំណូលសរុបចំនួនជាង ១ ៩៨៧លានដុល្លារសហរដ្ឋអាម៉េរិក។
Account
Security
Favourite Content