សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតត្រឹមខែមិថុនា ឆ្នាំ២០២៥កន្លងទៅនេះ មូលនិធិអភិវឌ្ឍន៍ជំនាញ (SDF) បានផ្ដល់ថវិកាបដិភាគដល់រោងចក្រ សហគ្រាស គ្រឹះស្ថានបណ្ដុះបណ្ដាល សមាគមធុរកិច្ច និងស្ថាប័ននានា សម្រាប់អនុវត្តគម្រោងបណ្ដុះបណ្ដាលជំនាញសរុបចំនួន ១៩៣ ដែលមានថ្លៃបណ្ដុះបណ្ដាលប្រមាណ ៣១,០៥លានដុល្លារអាមេរិក ក្នុងនោះថវិកាបដិភាគរបស់មូលនិធិអភិវឌ្ឍជំនាញ ខ្លួនឯងមានប្រមាណ១៦,៤៨លានដុល្លារអាមេរិក ឬស្មើនឹង ៥៣ភាគរយ នៃថ្លែបណ្ដុះបណ្ដាលសរុប ។ នេះបើតាមការបញ្ជាក់ពីឯកឧត្តមបណ្ឌិត ផាន់ ផល្លា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ ថ្លែងក្នុងសិក្ខាសាលស្ដីពីភាពជាដៃគូរវាងរដ្ឋ-ឯកជន និងពលរដ្ឋ ដើម្បីកម្ពុជាប្រកបដោយជំនាញកាលពីព្រឹកថ្ងៃទី០៤ ខែកក្កដា ឆ្នាំ២០២៥ ។
ឯកឧត្តមបណ្ឌិត ផាន់ ផល្លា បានថ្លែងថា វិស័យសំខាន់ៗដែលមូលនិធិអភិវឌ្ឍជំនាញបានបណ្ដុះបណ្ដាលរួមមានវិស័យទេសចរណ៍ ដែលបានចំណាយថវិកាប្រមាណ ៤,០៥លានដុល្លារអាមេរិក វិស័យសំណង់ បានចំណាយថវិកាប្រមាណ ២,៨៤លានដុល្លារអាមេរិក វិស័យកម្មន្តសាលចំណាយថវិកា ២,៧៤លានដុល្លារ វិស័យឌីជីថល ចំណាយប្រមាណ ៣,៨៦ វិស័យយានយន្តប្រមាណ ០,៦៣លានដុល្លារ វិស័យអេឡិចត្រូនិកប្រមាណ ០,៣២លានដុល្លារ និងវិស័យផ្សេងទៀតបានចំណាយថវិកាប្រមាណ ២,០២លានដុល្លារអាមេរិក ។ វិស័យទាំងអស់មានសិក្ខាកាមចូលរួមចំនួន ៣៧ ៤៣១នាក់ ក្នុងនោះក៏មានស្ត្រីប្រមាណ ៣៥ភាគរយផងដែរ ។
ឯកឧត្តមបណ្ឌិតបានបន្តថា មូលនិធិអភិវឌ្ឍន៍ជំនាញក៏បានកសាងទំនាក់ទំនងល្អជាមួយដៃគូពាក់ព័ន្ធក្នុងប្រព័ន្ធអេកូឡូស៊ីអភិវឌ្ឍន៍ជំនាញ ដោយបានបង្កើនដៃគូសហការជាមួយនឹងក្រុមហ៊ុនឯកជនចំនួន៤៥០ គ្រឹះស្ថានបណ្ដុះបណ្ដាលចំនួន៦២ ទាំងរដ្ឋ ឯកជន និងអង្គការ ។ ក្រៅពីនេះក៏មានសមាគមធុរកិច្ចចំនួន២២ផងដែរ ។ ជាលទ្ធផល មូលនិធិអភិវឌ្ឍន៍ជំនាញបានសម្រេចនូវសមិទ្ធផលក្នុងកម្រិតល្អប្រសើរ តាមគោលដៅដែលបានដាក់ចេញ ដោយក្នុងនោះរួមមាន អត្រាបោះបង់ការសិក្សាជាមធ្យមមានកម្រិតទាបត្រឹមតែ៤ភាគរយ អត្រាមានការងារធ្វើខ្ពស់រហូតដល់ ៨៨ភាគរយ ប្រាក់បៀវត្សរ៍មូលដ្ឋានកើនឡើងជាមធ្យម២០ភាគរយ និងអត្រាពេញចិត្តពីនិយោជកលើគុណភាពអភិវឌ្ឍន៍ជំនាញខ្ពស់ ពោលគឺរហូតដល់៨៥ភាគរយ ។
បើតាមឯកឧត្តមបណ្ឌិត ផាន់ ផល្លា បញ្ជាក់ថា ការអភិវឌ្ឍជំនាញធនធានមនុស្ស ប្រកបដោយជំនាញ វិជ្ជាជីវៈ និងសមត្ថភាព គឺជាកត្តាស្នូល ក្នុងការរួមចមណែកដល់ភាពឆ្លើយបនៃជំនាញទៅនឹងតម្រូវការឧស្សាហកម្មនៅក្នុងទីផ្សារការងារ ដែលដើរតួនាទីយ៉ាងសំខាន់ ក្នុងការរួមចំណែកដល់ការអនុវត្តនូវគោលនយោបាយអភិវឌ្ឍវិស័យឧស្សាហកម្មកម្ពុជា ឆ្នាំ២០១៥-២០២៥ ព្រមទាំងគោលនយោបាយ និងយុទ្ធសាស្ត្រតាមវិស័យផ្សេងទៀតរបស់រាជរដ្ឋាភិបាលសំដៅលើកកម្ពស់ និងជំរុញកំណើនសេដ្ឋកិច្ចប្រកបដោយចីរភាព និងបរិយាបន្ន ។
លោក MATTHIEU LEFEBVRE តំណាងមកពីធនាគារពិភពលោក បានមានប្រសាសន៍ថា ធនាការពិភពលោកជាដៃគូដ៏យូរអង្វែងមួយជាមួយរាជរដ្ឋាភិបាលកម្ពុជា ហើយធនាគារពិភពលោកក៏សូមគាំទ្រដល់រាជរដ្ឋាភិបាលកម្ពុជាក្នុងកម្មវិធីបណ្ដុះបណ្ដាលជំនាញដល់ធនធានមនុស្សរបស់ខ្លួន ។
លោកបន្តថា តាមរយៈការដាក់ចេញនូវកម្មវិធីបណ្ដុះបណ្ដាលជំនាញដល់ធនធានមនុស្សកម្ពុជាលើវិស័យអាទិភាពនេះ នឹងធ្វើឱ្យកម្ពុជាសម្រេចបាននូវចក្ខុវិស័យរបស់ខ្លួន ក្លាយជាប្រទេសដែលមានប្រាក់ចំណូលខ្ពស់នៅក្នុងឆ្នាំ២០៥០ ដោយសារតែកម្ពុជាមានធនធានមនុស្សដែលមានជំនាញនិងទទួលបានប្រាក់បៀវត្សខ្ពស់ផងដែរ ។
បើតាមសិក្ខាកាមជាច្រើនដែលបានទទួលការបណ្ដុះបណ្ដាលជំនាញតាមរយៈកម្មវិធីរបស់មូលនិធិអភិវឌ្ឍជំនាញ បានបង្ហាញឱ្យដឹងថា ក្រោយពេលពួកគេទទួលបានការបណ្ដុះបណ្ដាលជំនាញពួកគេមួយចំនួនបានឡើងតួនាទី ទទួលបានប្រាក់ខែខ្ពស់ជាងមុន និងធ្វើឱ្យនិយោជកពេញចិត្តពួកគេជាងមុន ផងដែរ ៕
Account
Security
Favourite Content