បរទេស៖ យោងតាមប្រភពព័ត៌មានពី CNN បានរាយការណ៍ថា រដ្ឋបាលរបស់ Donald Trump បានដកការរឹតបន្តឹងលើការនាំចេញកម្មវិធីរចនាបន្ទះឈីបទៅកាន់ប្រទេសចិន ខណៈដែលទីក្រុងវ៉ាស៊ីនតោន និងទីក្រុងប៉េកាំងកំពុងធ្វើការរួមគ្នាដើម្បីកាត់បន្ថយភាពតានតឹងពាណិជ្ជកម្ម។

ថ្មីៗនេះ ក្រុមហ៊ុនរចនាបន្ទះឈីបឈានមុខគេចំនួន៣ រួមមាន Synopsys, Cadence និង Siemens ទទួលបានដំណឹងពីក្រសួងពាណិជ្ជកម្មអាម៉េរិកថា ការទប់ស្កាត់លើការនាំចេញដែលបានប្រកាសកាលពីខែឧសភាត្រូវបានលុបចោលវិញ។ សេចក្តីប្រកាសរបស់ក្រុមហ៊ុនទាំង៣នេះបានបង្ហាញពីជំហានដែលមហាអំណាចសេដ្ឋកិច្ចទាំងពីរអនុវត្តកិច្ចព្រមព្រៀងពាណិជ្ជកម្មផ្លូវការកាលពីសប្តាហ៍មុន ដែលផ្តោតសំខាន់លើរ៉ែកម្រ។ នៅក្រោមកិច្ចព្រមព្រៀងនេះ សហរដ្ឋអាមេរិកនឹងលុបចោលការទប់ស្កាត់ការនាំចេញរបស់ខ្លួនលើកម្មវិធីបន្ទះឈីប អេតានគីមី និងទំនិញផ្សេងទៀត ខណៈដែលប្រទេសចិននឹងយល់ព្រមលើការនាំចេញរ៉ែកម្រទៅកាន់អាម៉េរិក។

ក្រុមហ៊ុនអាម៉េរិក Cadence, Synopsys, និង Siemens របស់អាល្លឺម៉ង់បានបញ្ជាក់ថា ការរឹតបន្តឹងការគ្រប់គ្រងការនាំចេញលែងមានទៀតហើយ។ Cadence and Synopsys លើកឡើងថា ពួកគេកំពុងស្ថិតក្នុងដំណើរការស្តារឡើងវិញនូវលទ្ធភាពចូលប្រើកម្មវិធី និងឧបករណ៍ដែលធ្លាប់ត្រូវបានរឹតបន្តឹងនៅក្នុងប្រទេសចិន។ លើសពីនេះ ក្រុមហ៊ុន Siemens បានស្ដារឡើងវិញនូវការចូលប្រើកម្មវិធីរួចរាល់ និងបច្ចេកវិទ្យាពេញលេញ និងបន្តការលក់ដល់អតិថិជនចិន។

អ្នកជំនាញបាននិយាយថា ការរឹតបន្តឹងការនាំចេញរបស់ទីក្រុងវ៉ាស៊ីនតោនលើកម្មវិធីរចនាបន្ទះឈីប ឬកម្មវិធីរចនាប្រព័ន្ធអេឡិចត្រូនិច (EDA) មានផលប៉ះពាល់យ៉ាងធ្ងន់ធ្ងរសម្រាប់ឧស្សាហកម្មឈីបរបស់ប្រទេសចិន ដោយសារវាមានសារៈសំខាន់សម្រាប់ការបង្កើតឈីបថ្មី ខណៈដែលក្រុមហ៊ុនទាំងបីខាងនេះមានចំណែក ៧០% នៃទីផ្សារ EDA របស់ចិន។ ការទប់ស្កាត់របស់អាម៉េរិកមានគោលបំណង​រារាំង​ទីក្រុង​ប៉េកាំង​ពី​ការប្រើប្រាស់​បច្ចេកវិទ្យា​ខ្ពស់របស់​អាម៉េរិក​ ដើម្បី​ពង្រឹង​សមត្ថភាព​យោធា និង AI របស់ខ្លួន។

គួរឲ្យបញ្ជាក់ដែរថា អាម៉េរិកបានកាត់ផ្តាច់ការលក់ឧបករណ៍សូហ្វវែរសំខាន់ៗដែលប្រើប្រាស់សម្រាប់ការរចនាគ្រឿងអេឡិចត្រូនិកទៅកាន់ប្រទេសចិន ដែលជាផ្នែកមួយនៃការសងសឹកចំពោះទីក្រុងប៉េកាំងដែលបានរឹតបន្តឹងការនាំចេញរបស់រ៉ែកម្ររបស់ខ្លួន ដែលបានធ្វើឱ្យមានជម្លោះរវាងមហាអំណាចទាំងពីរកាន់តែតានតឹង។ កាលពីខែឧសភា អាម៉េរិក និងចិនបានព្រមព្រៀងគ្នាកាត់បន្ថយសម្ពាធពាណិជ្ជកម្មទៅវិញទៅមកនៅក្នុងកិច្ចប្រជុំទីក្រុងហ្សឺណែវ ប៉ុន្តែក្រោយមកការព្រមព្រៀងនេះមានភាពរង្គោះរង្គើរ ដោយសារភាគីទាំងពីរចោទប្រកាន់គ្នាទៅវិញទៅមក។ យ៉ាងណាមិញ បន្ទាប់ពីមានកិច្ចប្រជុំនៅទីក្រុងឡុងដ៍ថ្មីៗនេះ ចិនបានយល់ព្រមអនុញ្ញាត និងបង្កើនល្បឿននាំចេញរ៉ែកម្ររបស់ខ្លួន ខណៈដែលអាម៉េរិកនឹងដកការរឹតបន្តឹងលើការនាំចេញកម្មវិធីរចនាបន្ទះឈីប អេតាន និងម៉ាស៊ីនយន្តហោះជាដើម។ កាលពីថ្ងៃពុធ រដ្ឋបាល Trump ក៏បានផ្ញើលិខិតមួយទៅកាន់អ្នកផលិតអេតានរបស់អាម៉េរិកផងដែរ ដើម្បីលុបចោលការរឹតបន្តឹងការនាំចេញសារធាតុគីមីទៅកាន់ចិន។