សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃដើមសប្ដាហ៍នេះ បានរៀបចំកិច្ចប្រជុំជាមួយដៃគូអភិវឌ្ឍន៍ និងភាគីពាក់ព័ន្ធសំខាន់ៗក្នុងវិស័យទឹកស្អាត ដើម្បីពិភាក្សាអំពីបញ្ហាប្រឈម និងទិសដៅអនាគតសម្រាប់វិស័យទឹកស្អាតនៅកម្ពុជា រួមទាំងកំណែទម្រង់ច្បាប់ បទប្បញ្ញត្តិ ការប្រើប្រាស់បច្ចេកវិទ្យា លទ្ធភាពទទួលបានហិរញ្ញប្បទាន និងការពង្រីកសេវាកម្ម។
ឯកឧត្តម ហែម វណ្ណឌី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីសារៈសំខាន់នៃការសម្របសម្រួលកិច្ចខិតខំប្រឹងប្រែងក្នុងចំណោមស្ថាប័ននានា ដើម្បីលើកកម្ពស់គុណភាពសេវា និងធានាបាននូវទឹកប្រើប្រាស់ដែលស្អាត និងគួរឱ្យទុកចិត្តសម្រាប់ប្រជាជនកម្ពុជាគ្រប់រូប។
ឯកឧត្តមបានលើកឡើងថា៖
«ការប្តេជ្ញាចិត្តរួមគ្នា និងការសម្របសម្រួលកិច្ចខិតខំប្រឹងប្រែងរបស់យើងមានភាពចាំបាច់ ដើម្បីធានាបាននូវសេវាទឹកស្អាតដែលមានសុវត្ថិភាព ទំនុកចិត្ត និងនិរន្តរភាព សម្រាប់ប្រជាពលរដ្ឋកម្ពុជាទាំងអស់ ហើយទឹកស្អាតគឺជាមូលដ្ឋានគ្រឹះដ៏សំខាន់សម្រាប់សុខភាពសាធារណៈ និងការអភិវឌ្ឍសង្គម-សេដ្ឋកិច្ច»។
យ៉ាងណាក៏ដោយ បើទោះបីជាវិស័យនេះមានការវិវត្តរីកចម្រើនគួរឱ្យកត់សម្គាល់ កម្ពុជានៅតែប្រឈមការខ្វះខាតជាច្រើន ពិសេសលើហេដ្ឋារចនាសម្ព័ន្ធ ធនធានហិរញ្ញវត្ថុ សមត្ថភាពបច្ចេកទេស និងប្រព័ន្ធទឹកស្អាតដែលធន់នឹងអាកាសធាតុ។ ក្នុងន័យនេះ ដើម្បីដោះស្រាយបញ្ហាទាំងអស់ ឯកឧត្តមរដ្ឋមន្ត្រីបានអំពាវនាវដល់ដៃគូអភិវឌ្ឍន៍ និងភាគីពាក់ព័ន្ធទាំងអស់ បន្តផ្តល់ការគាំទ្រ កិច្ចសហការ រកដំណោះស្រាយប្រកបដោយភាពច្នៃប្រឌិត ដែលអាចអភិវឌ្ឍវិស័យនេះបានកាន់តែលឿន។
សូមបញ្ជាក់ផងដែរថា កិច្ចប្រជុំបានពិនិត្យលទ្ធផលនៃការវាយតម្លៃស្ថានភាពរបស់ប្រតិបត្តិករទឹកស្អាតឯកជនដោយលទ្ធផលបង្ហាញថា គុណភាពទឹក និងកម្រិតនៃសេវាកម្មក្នុងចំណោមប្រតិបត្តិករទាំងនោះនៅទូទាំងប្រទេស មានភាពខុសគ្នាខ្លាំង។ កិច្ចប្រជុំក៏បានពិនិត្យ និងពិភាក្សាកម្មវិធីវិនិយោគដែលគាំទ្រដោយដៃគូអភិវឌ្ឍន៍ រួមមាន ADB, AFD, CAPRED, JICA, ធនាគារ EXIM របស់កូរ៉េ UNICEF និងធនាគារពិភពលោក ព្រមទាំងការងារកំពុងបន្ត ដូចជាការបង្កើតនិយតករទឹកស្អាត ប្រព័ន្ធទិន្នន័យឌីជីថល និងមូលនិធិអភិវឌ្ឍន៍វិស័យទឹកស្អាតជាតដើម៕
Account
Security
Favourite Content