ភ្នំពេញ៖ រដ្ឋមន្ត្រីក្រសួងទេសចរណ៍បានថ្លែងឱ្យដឹងថា ក្នុងរយៈពេល ៧ខែ ដើមឆ្នាំ២០២៥កន្លងទៅនេះ ប្រទេសកម្ពុជាបានទទួលភ្ញៀវទេសចរអន្តរជាតិសរុបប្រមាណ ៣,៧១ លាននាក់​ ហើយក្នុងនោះភ្ញៀវទេសចរចិនមានប្រមាណ ៦៩ ម៉ឺននាក់ ដែលចំនួននេះបានកើនឡើង ៤៨,២% បើធៀបទៅនឹងរយៈពេលដូចគ្នាកាលពីឆ្នាំកន្លងទៅ​។

ឯកឧត្តម ហួត ហាក់ ​រដ្ឋមន្ត្រីក្រសួងទេសចរណ៍ នៅក្នុងឱកាសនៃព្រឹត្តិការណ៍សម្តែងសិល្បៈរួមគ្នា កម្ពុជា-ចិន ក្រោមប្រធានបទ «ស្លាបនៃសន្តិភាព» កាលពីពេលកន្លងទៅបានថ្លែងថា តាមរយៈកិច្ចសហការជាដៃគូអភិវឌ្ឍន៍គ្រប់ជ្រុងជ្រោយ និងគ្រប់វិស័យរវាងកម្ពុជា-ចិន ពិតជាបានបង្កប់នូវប្រវតិ្តសាស្រ្តដ៏យូរលង់រវាងប្រទេសទាំងពីរ ដែលប្រសព្វគ្នានៅក្នុងវេលាដ៏ល្អ ព្រមទាំងបានពិពណ៌នាអំពីប្រធានបទតែមួយ​ដែលជាមរតកដ៏មហិមា គឺ «តម្លៃនៃសន្តិភាព និងកម្លាំងនៃមិត្តភាពដែកថែប»។​

ឯកឧត្តម ហួត ហាក់ បាន​ថ្លែង​ថា៖

«​ក្នុងនាមរដ្ឋមន្ត្រីក្រសួងទេសចរណ៍​កម្ពុជា និងប្រជាជនកម្ពុជា សូមស្វា​គមន៍មិត្តចិនទាំងអស់យ៉ាងកក់ក្ដៅ ស្មោះស្ម័គ្របំផុត និងរង់ចាំភ្ញៀវទេសចរចិន ដែលពោរពេញដោយក្តីស្រឡាញ់សន្តិភាព ប្រាថ្នាចង់បានមិត្តភាព និងចង់ស្វែងយល់ពីវប្បធម៌សម្បូរបែបកាន់តែច្រើន។ រាល់ដំណើរទស្សនកិច្ចរបស់មិត្តចិន គឺជាការបង្ហាញយ៉ាងរស់រវើកនៃមិត្តភាពកម្ពុជា-ចិន និងការជំរុញដ៏ខ្លាំងក្លាដល់ ស្លាបសន្តិភាព»។

សូមជម្រាបដែរថា កាលពីឆ្នាំ២០២៤កន្លងទៅ កម្ពុជាទទួលបានភ្ញៀវទេសចរអន្តរជាតិសរុបប្រមាណ ៦,៧ លាននាក់ កើនឡើងប្រមាណ ២៣ភាគរយ ធៀបនឹងឆ្នាំ២០២៣ ក្នុងនោះភ្ញៀវទេសចរចិន មានចំនួនប្រមា​ណ ៨៥ ម៉ឺននាក់ កើនឡើង៥៥ ភាគរយ។ យោងតាមនិន្នការនៃស្ថិតិខាងលើ នៅអនាគតនៃវិស័យទេសចរណ៍កម្ពុជា គឺមិនអាចកាត់ផ្តាច់ពីការស្រូបទាញកំណើននៃរំហូរទេសចរ និងវិនិយោគិនចិនបានឡើយ ហើយកម្ពុជាបានត្រៀមលក្ខណសម្បត្តិគ្រប់គ្រាន់ក្នុងការទទួលស្វាគមន៍ភ្ញៀវទេសចរ និងវិនិយោគិនចិន តាមរយៈការសម្រួលបរិយាកាសទទួលបដិសណ្ឋារកិច្ចភ្ញៀវទេសចរ និងវិនិយោគិនចិននៅកម្ពុជា។

បើតាមឯកឧត្តមរដ្ឋមន្ត្រីក្រសួងទេសចរណ៍ ដើម្បីជំរុញរំហូរភ្ញៀវទេសចរកម្ពុជា-ចិន ជាពិសេសតាមរយៈយុទ្ធនាការ «ឆ្នាំនៃការផ្លាស់ប្តូរប្រជាជន និងប្រជាជនកម្ពុជា-ចិន» ដែលបានអនុវត្តន៍រួមគ្នាពេញមួយឆ្នាំ២០​២៤ កន្លងមក បានរៀបចំឱ្យមានព្រឹត្តិការណ៍ និងកម្មវិធីដ៏សម្បូរបែប ច្នៃប្រតិដ្ឋ មានភាពទាក់ទាញរស់រវើក ដូចជា ព្រឹត្តិការណ៍វប្បធម៌ផ្សារភ្ជាប់ទេសចរណ៍, ព្រឹត្តិការណ៍ពិព័រណ៌, ព្រមជាមួយការរៀបចំ និងចូលរួមកម្មវិធីមួយចំនួនទៀត ទាំងនៅប្រទេសកម្ពុជា និងនៅប្រទេសចិន។

ជាមួយគ្នានេះដែរ ឯកឧត្តម ហួត ហាក់ ជឿជាក់យ៉ាងមុតមាំថា តាមរយៈការរៀបចំកម្មវិធី ការសម្តែងសិល្បៈរួមគ្នា កម្ពុជា-ចិនក្រោមប្រធានបទ «ស្លាបនៃសន្តិភាព» រួមចិត្ត រួមដៃ វាសនារួម នាពេលនេះ នឹងមិនត្រឹមតែចូលរួមដល់ការពង្រឹងចំណងមិត្តភាព និងការផ្លាស់ប្តូរវប្បធម៌គ្នាទៅវិញទៅមករវាងកម្ពុជា-ចិនប៉ុណ្ណោះទេ ប៉ុន្តែនឹងជួយលើកកម្ពស់កិច្ចសហប្រតិបត្តិការលើវិស័យទេសចរណ៍ និងវប្បធម៌ តាមរយៈការបង្ហាញពីសក្តានុពលទេសចរណ៍ សិល្បៈ និងវប្បធម៌ ដ៏សម្បូរបែប ពង្រីកការផ្សព្វផ្សាយពីសក្តានុលពលទាំងនេះឱ្យកាន់តែទូលំទូលាយទៅកាន់ប្រជាជននៃប្រទេសទាំងពីរ ក៏ដូចជាទៅកាន់ប្រជាជននៅទូទាំងពិភពលោក៕