សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍អគ្គនាយកដ្ឋានកៅស៊ូបានឱ្យដឹងថា កម្ពុជាបាននាំចេញផលិតផលកៅស៊ូចំនួន ២៤ម៉ឺនតោន រកចំណូលបានជិត ៤០០ លានដុល្លារនៅក្នុងត្រីមាសទី៣ ឆ្នាំ២០២៤ ។
តាមរយៈរបាយការណ៍អគ្គនាយកដ្ឋានកៅស៊ូកម្ពុជាបានឱ្យដឹងថា គិតចាប់ពីខែមករា ដល់ខែកញ្ញា ការនាំចេញជ័រកៅស៊ូ និងឈើកៅស៊ូរបស់កម្ពុជាទៅកាន់ទីផ្សារអន្តរជាតិសម្រេចបានជាង ៣៩៧លានដុល្លារអាមេរិក កើនឡើងប្រមាណ ២៣% ធៀបនឹងរយៈពេលដូចគ្នាកាលពីឆ្នាំមុន ដោយបរិមាណលក់ជ័រកៅស៊ូ គិតត្រឹមខែកញ្ញានេះ មានប្រមាណ ២៤៨ ៥៣៥ តោន កើនឡើង ៥.៨៨១ តោន ស្មើនឹង ២,៤២ ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈការលក់ឈើកៅស៊ូ មាន ១៦ ០០០ម៉ែត្រគីប។
លោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គិតត្រឹមខែកញ្ញា ឆ្នាំ២០២៤ តម្លៃកៅស៊ូក្នុងមួយតោន ១ ៦៩៤ ដុល្លារ កើនឡើង ៣៨ ដុល្លារក្នុងមួយតោន ឬកើនឡើងប្រមាណ ២,៣២ ភាគរយ បើធៀបនឹងរយៈពេលដូចគ្នាកាលពីឆ្នាំមុន។
យោងតាមក្រសួងកសិកម្ម កម្ពុជាបានដាំដើមកៅស៊ូលើផ្ទៃដីសរុបចំនួន ៤០៧ ១៧២ ហិកតា ក្នុងនោះដើមកៅស៊ូលើផ្ទៃដី ៣២០ ១៨៤ ហិកតា ស្មើនឹង ៧៨,៦ ភាគរយ អាចប្រមូលផលបាន។ ផ្ទៃដីកៅស៊ូកសិឧស្សាហកម្មមានចំនួន ២២៦ ៨៤០ ហិកតា ឬ ៥៥,៧១ ភាគរយ ហើយផ្ទៃដីកៅស៊ូគ្រួសារមាន ១៨០ ៣៣២ ហិកតា ឬ ៤៤,២៩ ភាគរយ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានឱ្យដឹងថា តម្លៃកៅស៊ូមានភាពប្រសើរឡើងនៅឆ្នាំ២០២៤ ជាមួយនឹងការកើនឡើងទាំងការនាំចេញ និងផលិតកម្មក្នុងស្រុក ព្រមទាំងប្រាក់ចំណេញកាន់តែខ្ពស់សម្រាប់កៅស៊ូគ្រួសារ។
អ្នកឧកញ៉ា លឹម ហេង បានបញ្ជាក់ថា ៖
«តម្លៃកៅស៊ូមានភាពប្រសើរឡើង ហើយយើងសង្ឃឹមថានឹងជួយបង្កើនតម្រូវការកៅស៊ូនៅក្នុងប្រទេសរបស់យើងតាមរយៈរោងចក្រផលិតសំបកកង់រថយន្តទាំង៣ ដែលកំពុងដំណើរការ ជាមួយនឹងលទ្ធភាពនៃការបន្ថែមរោងចក្រសំបកកង់ថ្មីទៀតនាពេលអនាគត»។
គួររំលឹកផងដែរថា ក្រសួងកសិកម្ម និងក្រុមហ៊ុនវិនិយោគកៅស៊ូ បានសហការរៀបចំព្រឹត្តិការណ៍ដ៏មានសារៈសំខាន់មួយ គឺកម្មវិធីប្រឡងចៀរជ័រកៅស៊ូ និងប្រារព្ធខួប១០០ឆ្នាំដើមកៅស៊ូចាស់ជាងគេនៅកម្ពុជា ដែលនឹងធ្វើឡើងនៅខែវិច្ឆិកាឆ្នាំនេះ នៅចម្ការកៅស៊ូជប់ ក្នុងខេត្តត្បូងឃ្មុំ។ វាជារឿងមោទនភាពសម្រាប់ប្រជាជនកម្ពុជាផងដែរ ដែលមានដើមកៅស៊ូអាយុ១០០ឆ្នាំ ដើម្បីឱ្យសាធារណជនជាតិ និងអន្តរជាតិ យល់ដឹងអំពីកៅស៊ូកម្ពុជា។
ចំការកៅស៊ូជប់មួយនេះ មានដើមកៅស៊ូចាស់ៗដែលនៅរស់ច្រើនជាងគេលើពិភពលោក ដែលមានចំនួនរហូត ៤៤៨ ដើម លើផ្ទៃដីប្រមាណ ១៤ ហិកតា។ វាមិនងាយស្រួលទេក្នុងការស្វែងរកដើមឈើដែលមានអាយុ១០០ឆ្នាំបែបនេះ និងកំពុងដើរតួនាទីយ៉ាងសំខាន់ក្នុងការស្វែងរកពូជកៅស៊ូដែលផ្តល់ទិន្នផលខ្ពស់ស្របតាមវិស័យកសិកម្មរបស់កម្ពុជា៕
Account
Security
Favourite Content