សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពីបរទេសបានលើកឡើងថា នៅក្នុងប្រទេស ប៊ូតាន មានប្រព័ន្ធអេកូឡូស៊ីជាច្រើន ប៉ុន្តែប្រទេសនេះមានអាកាសធាតុត្រជាក់ និងមានផ្ទៃដីតិចជាង ៣ ភាគរយប៉ុណ្ណោះអាចបង្កបង្កើនផលបាន។ លើសពីនេះ កសិករខ្នាតតូចប្រឈមមុខនឹងបញ្ហាជាច្រើន ដូចជា ការកាន់កាប់ដីមានទំហំតូច កង្វះលទ្ធភាពទទួលបានបច្ចេកវិទ្យា ទទួលរងនូវបម្រែបម្រួលអាកាសធាតុ និងការប្រើប្រាស់ទីផ្សារនៅមានកម្រិតដោយសារហេដ្ឋារចនាសម្ព័ន្ធមានការអភិវឌ្ឍន៍តិចតួច។
គ្រួសារភាគច្រើននៅតាមជនបទជាមធ្យមទទួលបានប្រាក់ចំណូលតិចតួចប៉ុណ្ណោះ ហើយប្រជាជនភាគច្រើនបានធ្វើចំណាកស្រុកពីជនបទទៅទីក្រុង ដែលធ្វើឲ្យអត្រាពលកម្មខាងកសិកម្មកាន់តែទាប។ នៅក្នុងការសិក្សាមួយអំពីការធ្វើចំណាកស្រុកនៅតាមជនបទក្នុងឆ្នាំ២០០៤ បានបង្ហាញថា គ្រួសារប្រជាជននៅទីជនបទជាង ៤៧ ភាគរយ តែងមានសមាជិកគ្រួសារមួយ ឬ ច្រើននាក់បានធ្វើចំណាកស្រុក។ និន្នាការនោះបានកើនឡើងក្នុងរយៈពេល ១៥ ឆ្នាំជាបន្តបន្ទាប់ ដែលធ្វើឲ្យកម្លាំងពលកម្មនៅជនបទមានវ័យចំណាស់ជាងនៅក្នុងទីក្រុង។
ជាការឆ្លើយតបទៅនឹងបញ្ហាប្រឈមទាំងនេះ Mountain Hazelnuts ត្រូវបានបង្កើតឡើងក្នុងឆ្នាំ២០០៩ ដែលជាការវិនិយោគផ្ទាល់ពីបរទេស ១០០ ភាគរយដំបូងគេបង្អស់របស់ប៊ូតាន។ បេសកកម្មរបស់ Mountain Hazelnuts គឺបង្កើតអាជីវកម្មដែលរកប្រាក់ចំណេញ និងផ្តល់ប្រាក់ចំណូលរយៈពេលវែងដល់សហគមន៍ជនបទដែលងាយរងគ្រោះ ព្រមទាំងជួយស្តារដីដែលខូចគុណភាពរបស់ប្រទេសជាតិផងដែរ។ ដើម្បីស្តារជម្រាលភ្នំដែលខូច ក្រុមហ៊ុននេះបានដាំដំណាំ Hazelnuts ចំនួន ១០ លានគុម្ព ដោយធ្វើការជាមួយគ្រួសារកសិករខ្នាតតូចរស់នៅតាមតំបន់ភ្នំហិមាល័យ និងក្រុមសហគមន៍។ ស្របតាមអនុស្សរណៈនៃការយោគយល់គ្នាដែលបានចុះហត្ថលេខាជាមួយរដ្ឋាភិបាលនៃប្រទេសប៊ូតាន Mountain Hazelnuts ទិញគ្រាប់ដែលប្រមូលផលទាំងអស់ពីកសិករ ដើម្បីកាត់បន្ថយហានិភ័យទីផ្សារសម្រាប់អ្នកដាំដុះ និងធានានូវផលចំណេញដល់ពួកគេ។
មិនត្រឹមតែប៉ុណ្ណោះ កសិករជាច្រើនបានចាប់អារម្មណ៍ក្នុងការចូលរួមអនុវត្តសកម្មភាពរបស់ Mountain Hazelnuts ដើម្បីដាំដំណាំ Hazelnuts នៅលើដីដែលខូចគុណភាព។ មុនពេលដាំដុះ Mountain Hazelnuts បានចុះពិនិត្យគ្រប់កន្លែង ដើម្បីពិចារណាពីផលប៉ះពាល់បរិស្ថាន។ បច្ចុប្បន្ននេះ Mountain Hazelnuts ធ្វើការជាមួយគ្រួសារតូចៗ និងក្រុមសហគមន៍ជាង ១៥ ០០០ នាក់នៅទូទាំងប្រទេស ដើម្បីផលិត និងប្រមូលផលគ្រាប់ Hazelnuts ។ អ្នកដាំដុះត្រូវបានផ្តល់ជូនជាមួយនឹងដើម Hazelnuts បូករួមទាំងការបណ្តុះបណ្តាលលើការអនុវត្តកសិកម្មមានគុណភាព អមដោយការចុះសួរសុខទុក្ខរៀងរាល់ពីរខែម្តងពីបុគ្គលិក Mountain Hazelnuts ដែលត្រូវបានដាក់ពង្រាយតំបន់ជាង ២០០ នាក់របស់ខ្លួន។ ក្រុមហ៊ុនប្រមូលទិញគ្រាប់ Hazelnuts ពីការប្រមូលផលទាំងអស់ ដែលមានគុណភាពអាចទទួលយកបាន ដោយដឹកជញ្ជូនគ្រាប់ទាំងនោះទៅរោងចក្រកែច្នៃរបស់ខ្លួនសម្រាប់ការសម្ងួតបន្ថែម ការដាក់តម្រៀបតាមទំហំ និងដំណើរការបន្ថែមផ្សេងៗ ដើម្បីរៀបចំនាំចេញទៅកាន់ទីផ្សារអន្តរជាតិ។ រហូតមកទល់ពេលនេះ ដើម Hazelnuts ជាង ៧ លានដើមត្រូវបានដាំដុះទាំងស្រុងនៅលើដីទំនាប ឬ ដីដែលខូចគុណភាព ហើយដើមឈើប្រភេទនេះស័ក្តិសមឥតខ្ចោះទៅនឹងលក្ខខណ្ឌភ្នំ និងអាកាសធាតុរបស់ប្រទេសប៊ូតាន។ នៅដំណាក់ប្រមូលផល ក្រុមហ៊ុនរំពឹងថាទិន្នផលជាមធ្យមលើសពី ៤ គីឡូក្រាមក្នុងមួយដើម។
គំរូអាជីវកម្មនេះគឺសមល្អសម្រាប់លក្ខខណ្ឌសេដ្ឋកិច្ចសង្គមរបស់ប្រទេសប៊ូតាន ដោយសារតែ Hazelnuts មិនតម្រូវឱ្យមានការវិនិយោគជាមុនពីកសិករនោះទេ។ គំរូនេះរួមបញ្ចូលទាំងស្ត្រី ឬមនុស្សចាស់ដែលមានទំហំហិរញ្ញវត្ថុតិច និងទំនោរដាំដំណាំដែលមិនប្រើប្រាស់ប្រាក់ច្រើន។ ទន្ទឹមនឹងនេះ ប្រាក់ចំណូលក៏សំខាន់ផងដែរ ហើយចំណូលពីការដាំ Hazelnuts ជាមធ្យមត្រូវបានរំពឹងថាកើនឡើងទ្វេដងនៃប្រាក់ចំណូលគ្រួសារជនបទធម្មតា។
មិនត្រឹមតែប៉ុណ្ណោះ ស្ត្រីប៊ូតាន់ជាង ៥ ០០០ នាក់គឺជាផ្នែកនៃខ្សែសង្វាក់តម្លៃ និងបានដឹកនាំក្នុងគម្រោងនេះ។ បន្ថែមពីនេះ ស្ត្រីជាង ២៦០ នាក់មកពីសហគមន៍ជនបទត្រូវបានជួលដោយផ្ទាល់ដោយ Mountain Hazelnuts ដោយផ្តល់ការបណ្តុះបណ្តាល ការគាំទ្រផ្នែកសុខភាព និងហិរញ្ញវត្ថុផ្ទាល់ខ្លួនរបស់ពួកគេ។ ក្រុមហ៊ុនប៉ាន់ប្រមាណថា យ៉ាងហោចណាស់ពាក់កណ្តាលនៃអ្នកដាំដុះ ១៥ ០០០ នាក់ដែលចូលរួមក្នុងការដាំដុះ Hazelnut ត្រូវបានដឹកនាំដោយស្ត្រី៕
Account
Security
Favourite Content