សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ឥណ្ឌា និងកាណាដា បានយល់ព្រមចរចាលើកិច្ចព្រមព្រៀងពាណិជ្ជកម្មដែលជាប់គាំងឡើងវិញ បន្ទាប់ពីកិច្ចពិភាក្សារវាងប្រទេសទាំង២ បានផ្អាកដោយសារជម្លោះការទូតកាលពីឆ្នាំ២០២៣ នេះបើយោងតាមសេចក្ដីរាយការណ៍ពីរ៉យទ័រ។
កាលពីថ្ងៃអាទិត្យកន្លងទៅនេះ រដ្ឋាភិបាលឥណ្ឌា បានអះអាងថា បន្ទាប់ពីមានជម្លោះការទូតកាលពី ២ឆ្នាំមុន មេដឹកនាំប្រទេសទាំង២ បានចាប់ផ្តើមចរចាលើកិច្ចព្រមព្រៀងភាពជាដៃគូសេដ្ឋកិច្ចទូលំទូលាយ និងមហិច្ឆតាខ្ពស់ឡើងវិញ ក្នុងគោលបំណងបង្កើនពាណិជ្ជកម្មទ្វេភាគីឱ្យឈានដល់ ៥០ ពាន់លានដុល្លារអាម៉េរិកត្រឹមឆ្នាំ២០៣០។ កិច្ចព្រមព្រៀងនេះត្រូវបានធ្វើឡើងកាលពីប៉ុន្មានថ្ងៃមុន ក្នុងឱកាសដែលនាយករដ្ឋមន្ត្រីកាណាដា លោក Mark Carney បានជួបជាមួយនាយករដ្ឋមន្ត្រីឥណ្ឌា លោក Narendra Modi ក្នុងកិច្ចប្រជុំ G20។
លោក Carney បានបង្ហោះនៅលើ X យ៉ាងដូច្នេះថា ៖
«នាយករដ្ឋមន្ត្រីឥណ្ឌា លោក Narendra Modi និងខ្ញុំ បានជួបប្រជុំគ្នានៅកិច្ចប្រជុំកំពូល G20 ហើយបានចាប់ផ្តើមចរចាកិច្ចព្រមព្រៀងពាណិជ្ជកម្មដែលអាចបង្កើនទំហំពាណិជ្ជកម្មរបស់យើងទ្វេដងដល់ជាង ៧0 ពាន់លានដុល្លារកាណាដា។ ឥណ្ឌាគឺជាសេដ្ឋកិច្ចធំជាងគេទី ៥ របស់ពិភពលោក ដែលមានន័យថា វាគឺឱកាសថ្មីដ៏ធំសម្រាប់និយោជិត និងអាជីវកម្មកាណាដា»។
លោក Carney នាយករដ្ឋមន្ត្រីកាណាដា បានចាត់ទុកប្រទេសឥណ្ឌាជាដៃគូពាណិជ្ជកម្មដែលគួរឲ្យទុកចិត្តបាន បើទោះបីជាមានការប៉ះទង្គិចក៏ដោយ ក៏ប្រទេសទាំង២ នៅតែមានទំនាក់ទំនងពាណិជ្ជកម្មរឹងមាំ ។
ជាការចាប់អារម្មណ៍ ការចាប់ផ្តើមនៃកិច្ចចរចាឡើងវិញរវាងប្រទេសទាំង២ កើតឡើងចំពេលដែលអាម៉េរិកកំពុងដាក់សម្ពាធពាណិជ្ជកម្មលើកាណាដា ខណៈដែលកិច្ចចរចាពន្ធគយជាមួយនឹងឥណ្ឌាមានភាពស្រពិចស្រពិលនៅឡើយ។ លើសពីនេះ នាយករដ្ឋមន្ត្រីកាណាដា កំពុងពង្រីកទំនាក់ទំនងពាណិជ្ជកម្មជាមួយប្រទេសផ្សេងទៀត និងប្តេជ្ញាបង្កើនការនាំចេញក្រៅពីអាម៉េរិក ដែលជាដៃគូពាណិជ្ជកម្មដ៏ធំបំផុតរបស់ខ្លួន។
សូមរំលឹកដែរថា កាលពីឆ្នាំ២០២៣ កាណាដា បានសម្រេចផ្អាកការចរចាលើកតិកាសញ្ញាពាណិជ្ជកម្មជាមួយនឹងឥណ្ឌា បន្ទាប់ពីចោទប្រកាន់រដ្ឋាភិបាលឥណ្ឌាថា មានជាប់ពាក់ព័ន្ធក្នុងការសម្លាប់ក្រុមជនជាតិ Sikh នៅលើទឹកដីរបស់ខ្លួន ប៉ុន្តែទីក្រុងញូវដែលីបានបដិសេធការចោទប្រកាន់មួយនេះ។ យ៉ាងណាក៏ដោយ បើទោះជាមានជម្លោះការទូតក្ដី ប៉ុន្តែទំហំពាណិជ្ជកម្មរវាងកាណាដា និងឥណ្ឌា នៅរីកចម្រើន ហើយបានឈានដល់ប្រមាណ ២១,៩៨ ពាន់លានដុល្លារអាម៉េរិកក្នុងឆ្នាំ២០២៤ ជាមួយនឹងគោលបំណងបង្កើនឱ្យដល់ ៥០ ពាន់លានដុល្លារអាម៉េរិកត្រឹមឆ្នាំ២០៣០ ៕
Account
Security
Favourite Content