ភ្នំពេញ៖ សន្ទុះនៃការអភិវឌ្ឍបច្ចេកវិទ្យាឌីជីថលកាន់តែរីកចម្រើននាពេលបច្ចុប្បន្ន ជាពិសេសគឺវិស័យបច្ចេកវិទ្យាហិរញ្ញវត្ថុ ក៏ដូចជាគោលនយោបាយរបស់រដ្ឋាភិបាលអាណ្ណត្តិទី៧នេះ ក្នុងការជំរុញវិស័យឯកជនធ្វើការចាប់យកបច្ចកវិទ្យាឌីជីថល ដើម្បីអភិវឌ្ឍន៍ខ្លួនឲ្យកាន់តែរីកចំរើនដើម្បីអាចប្រកួតប្រជែងនឹងក្រុមហ៊ុនក្នុងតំបន់បាន ។

ដោយមើលឃើញពីសារៈសំខាន់នៃបច្ចេកវិទ្យាហិរញ្ញវត្ថុ ក្រុមហ៊ុន ឡូខលឡាយស៍ ថេក សូលូសិន ឯ.ក (LOCALIZE TECH SOLUTION CO.,LTD) កាលពីថ្ងៃទី១  ខែមីនា ឆ្នាំ ២០២៥ បានប្រកាសដាក់ឱ្យដំណើរការប្រព័ន្ធរៀបចំការប្រកាសពន្ធតាមអនឡាញ SIMPLIFY ដោយមានការគាំទ្រពីក្រសួងសេដ្ឋកិច្ច និងហិរញ្ញវត្ថុ។

លោក ទុយ ហុង នាយកគ្រប់គ្រងក្រុមហ៊ុនឡូខលឡាយស៍ បានមានប្រសាសន៍ឱ្យដឹងថា៖ Localize គឺជាធុរកិច្ចថ្មីឌីជីថលក្នុងស្រុក ដែលផ្គត់ផ្គង់ប្រព័ន្ធគ្រប់គ្រងគណនេយ្យអនឡាញសម្រាប់សហគ្រាសធនតូច និងមធ្យម SMEs ។ បេសកម្មរបស់ Localize គឺ ប្រើប្រាស់បច្ចេកវិទ្យាឌីជីថល ជួយដល់ SME ឲ្យមានការគ្រប់គ្រងគណនេយ្យត្រឹមត្រូវតាមស្តង់ដារ និងមានរបាយការណ៍ហិរញ្ញាវត្ថុច្បាស់លាស់ តាមរយៈការប្រើប្រាស់បច្ចេកវិទ្យាឌីជីថល ដើម្បីរីកចំរើនប្រកបដោយនិរន្តភាព។

លោកបានបន្តថា៖ ក្រោយបើកដំណើរនៅឆ្នាំ២០១៨  Localize បានបង្កើតប្រព័ន្ធគ្រប់គ្រងគណនេយ្យអនឡាញនៅឆ្នាំ២០២២ សម្រាប់ជួយដោះស្រាយប្រព័ន្ធគណនេយ្យផ្ទៃក្នុងជូនគណនេយ្យករ ម្ចាស់អាជីវកម្ម ។ នៅក្នុងឆ្នាំ២០២៥នេះ ដើម្បីជាការរួមចំណែកបន្ថែមទៀតក្នុងកិច្ចការកសាងវឌ្ឍនភាពនៃសហគ្រាសឌីជីថល ស្របតាមគោលនយោបាយរបស់រដ្ឋាភិបាលក្នុងអាណ្ណត្តិទី៧នេះ ក្រុមហ៊ុនបានបន្ថែមនូវ ប្រព័ន្ធឌីជីថលថ្មីមួយទៀតគឺ ប្រព័ន្ធរៀបចំការប្រកាសពន្ធឈ្មោះថា “SIMPLIFY”ដែលនឹងជួយសម្រួលដល់ការ​ងាររបស់គណ​នេយ្យករ ក៏ដូចជាម្ចាស់អាជីវកម្មក្នុងការងារប្រកាសពន្ធជូនរដ្ឋ ។

ទាក់ទងនឹងអត្ថប្រយោជន៍របស់ SIMPLIFY នេះ លោក ទុយ ហុង បានបញ្ជាក់ថា ប្រព័ន្ធរៀបចំការប្រកាសពន្ធនេះនឹងជួយរៀបចំទិន្នន័យបានលឿនរហ័ស មិនចាំបាច់បញ្ចូលទិន្នន័យពេលភ្ជាប់ជាមួយប្រព័ន្ធគណ​នេយ្យ ,ប្រមូលផ្តុំទិន្នន័យនៅក្នុងប្រព័ន្ធតែមួយដែលមានសុវត្ថិភាពខ្ពស់, ងាយស្រួលក្នុងត្រួតពិនិត្យនៅពេលក្រោយ, អាចផ្ទេរការគ្រប់​គ្រង​ពីគណនេយ្យករម្នាក់ទៅម្នាក់យ៉ាងស្រួល មិនបារម្ភពេលផ្លាស់ប្តូរអ្នកប្រកាសពន្ធ និងងាយស្រួលប្រើប្រាស់មានលំហូរការងារច្បាស់លាស់និងមានរបាយការណ៍ជាក់លាក់។

លោកបានគូសបញ្ជាក់ថា ៖

« ក្នុងការប្រកាសពន្ធជូនរដ្ឋ ពីមុនមកដោយសារយើងមិនមានថ្នាល Platform ពេលគណនេយ្យករចង់ប្រកាសពន្ធគឺត្រូវធ្វើដោយដៃ តែឥឡូវប្រព័ន្ធថ្មី SIMPLIFY នេះ ធ្វើឱ្យទិន្នន័យដែលគាត់វាយបញ្ចូល ហើយវាអាចបញ្ជូនដោយស្វ័យប្រវត្តិបង្កើតទៅជាប្រព័ន្ធដើម្បីរៀបចំការប្រកាសពន្ធ។ ពាក្យថា SIMPLIFY គឺធ្វើម៉េចឱ្យស្រួល ឱ្យសាមញ្ញ ហើយជួយកាត់បន្ថយពេលវេលា និងការងារប្រចាំថ្ងៃដោយចំណាយពេលតែប្រមាណ១០នាទីប៉ុណ្ណាះ ដែលពីមុនត្រូវចំណាយពេលកន្លះថ្ងៃ ជាពិសេសទិន្នន័យមានសុវត្ថិភាព អត់ងាយខុស »។

ក្នុងកម្មវិធីប្រកាសប្រព័ន្ធរៀបចំការប្រកាសពន្ធ SIMPLIFY នេះ មានការអញ្ជើញចូលរួមពីវាគ្មិនកិត្តិយសមកពីវិទ្យាស្ថានបណ្តុះបណ្តាល វិជ្ជាជីវៈគណនេយ្យ, តំណាងមកពីអគ្គនាយកដ្ឋានសេដ្ឋកិច្ចឌីជីថល នៃក្រសួងសេដ្ឋកិច្ច និងហិរញ្ញវត្ថុ ព្រមទាំងវត្តមានពីភ្ងៀវកិត្តិយសមកពីជាង១០០ស្ថាប័ន ដែលជាដៃគូសហការ, ក្រុមហ៊ុនជំនាញវិជ្ជាជីវៈគណនេយ្យ ពន្ធដា និងសវនកម្ម ខ្មែរ និងបរទេស,  អ្នកប្រើប្រាស់ និងសិស្សនិសិត្ស ផងដែរ ។

លោក អៀច សេដ្ឋា អគ្គនាយករងនៃអគ្គនាយកដ្ឋានសេដ្ឋកិច្ចឌីជីថល នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ៖ ប្រព័ន្ធប្រកាសពន្ធ SIMPLIFY នេះ មានសារៈសំខាន់។ ពីមុនការប្រកាសពន្ធទោះមានប្រព័ន្ធ​ ឬគ្មានប្រព័ន្ធគឺត្រូវស្រង់បញ្ជីនៃការលក់ នៃការទិញ ហើយត្រូវយកទៅអាប់ឡូតទៅក្នុងប្រព័ន្ធរបស់ពន្ធដារ ដូច្នេះគណនេយ្យករត្រូវធ្វើការងារជាច្រើន តែនៅពេលមានប្រព័ន្ធប្រកាសពន្ធ SIMPLIFYនេះវានឹងជួយឱ្យប្រព័ន្ធគណនេយ្យរបស់ខ្លួនភ្ជាប់ដោយស្វ័យប្រវត្តិទៅប្រព័ន្ធប្រកាសពន្ធរបស់ពន្ធដារ។ប្រព័ន្ធប្រកាសពន្ធនេះ នឹងជួយរៀបចំនូវទម្រង់ និងតម្រូវការមួយចំនួនដែលពន្ធដារតម្រូវ៕