សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ស្របពេលវិនិយោគិនក្នុង និងក្រៅប្រទេសបាន និងកំពុងសម្លឹងស្វែងរកការវិនិយោគនៅក្នុងខេត្តព្រះសីហនុ ដោយសារតែមានការលើកទឹកចិត្តពីរាជរដ្ឋាភិបាលផ្នែកពន្ធ និងផ្នែកផ្សេងទៀត ធ្វើឱ្យខេត្តនេះបង្កើតការងារបានច្រើនសម្រាប់ពលរដ្ឋ ខណៈដែលអភិបាលខេត្តព្រះសីហនុ ឯកឧត្តម ម៉ាង ស៊ីណេត បានអំពាវនាវឱ្យពលករដែលត្រលប់មកពីប្រទេសថៃ និងកំពុងស្វែងរកការងារធ្វើនោះ សូមមកធ្វើការ និងប្រកបរបរនៅក្នុងខេត្តព្រះសីហនុ ។
ក្នុងឱកាសជំនួបជាមួយក្រុមហ៊ុនវិនិយោគមកពីសាធារណរដ្ឋប្រជាមានិតចិន កាលពីថ្ងៃចុងសប្ដាហ៍កន្លងទៅនេះ ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអំពាវនាវដល់បងប្អូនពលរដ្ឋខ្មែរដែលវិលត្រលប់ពីថៃវិញ សូមអញ្ជើញមកធ្វើការងារនៅខេត្តព្រះសីហនុ ព្រោះក្រោមការដឹកនាំប្រកបដោយគតិបណ្ឌិតបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ខេត្តមួយនេះមានការអភិវឌ្ឍរីកចម្រើន ហើយមានការងារជាច្រើនកន្លែងរង់ចាំបងប្អូនទាំងអស់គ្នា រួមទាំងមានហេដ្ឋារចនាសម្ព័ន្ធធ្វើដំណើរប្រកបដោយផាសុកភាព និងរស់នៅប្រកបដោយសុវត្ថិភាព ។
សូមជម្រាបថា នៅក្នុងកិច្ចជំនួបនេះ មានក្រុមហ៊ុនវិនិយោគចំនួន ៥ មកពីសាធារណរដ្ឋប្រជាមានិតចិន ដឹកនាំដោយ លោក Tang Choayang ប្រធានក្រុមហ៊ុន Guangwang Integrated Housing Co., Ltd ដែលជាក្រុមហ៊ុនវិនិយោគផ្នែកសំណង់លំនៅឋាន ផ្ទះចល័ត និងផ្ទះលំហែកាយ ក្នុងបំណងសិក្សាឱកាសវិនិយោគនៅខេត្តព្រះសីហនុ ដើម្បីពង្រីកទីផ្សារក្នុងតំបន់។
ក្រុមហ៊ុនខាងលើនេះបានចូលរួមវេទិកាជំរុញវិនិយោគខេត្តព្រះសីហនុនៅខេត្តអានហ៊ួយ សាធារណរដ្ឋប្រជាមានិតចិន កាលពីថ្ងៃទី៧ ខែមិថុនា ឆ្នាំ២០២៥ កន្លងទៅថ្មីៗនេះ។ ដោយមានការចាប់អារម្មណ៍ពីសក្តានុពលនៅខេត្តព្រះសីហនុ ទើបក្រុមហ៊ុនរបស់ពួកគាត់បានសម្រេចចិត្តមកសិក្សាដោយផ្ទាល់ដើម្បីស្វែងយល់ឱ្យកាន់តែច្បាស់បន្ថែមទៀត និងឈានទៅដល់ការបណ្ដាក់ទុនវិនិយោគនៅក្នុងខេត្តព្រះសីហនុ ។
សូមរម្លឹកថា កាលពីពេលថ្មីៗនេះដែរ ឯកឧត្តមបណ្ឌិតសភាចារ្យ ហ៊ាន សាហ៊ីប ប្រធានក្រុមការងារជំរុញការវិនិយោគក្នុងខេត្តព្រះសីហនុ បានលើកឡើងថា គិតចាប់ពីដើមឆ្នាំ២០២៤ រហូតដល់ដំណាច់ខែឧសភា ឆ្នាំ២០២៥ ក្រុមការងារជំរុញការវិនិយោគខេត្តព្រះសីហនុ បានអនុម័តគម្រោងវិនិយោគក្នុងខេត្តនេះចំនួន ២៩៦ គម្រោង មានទុនវិនិយោគសរុបចំនួន ៧ពាន់លានដុល្លារអាម៉េរិក និងអាចបង្កើតឱកាសការងារបានចំនួន ៥៣ ២០៥កន្លែងផងដែរ ។
ឯកឧត្តមបណ្ឌិតបានបន្តថា ក្រៅពីនេះ ក្រុមការងារជំរុញការវិនិយោគខេត្តព្រះសីហនុ ក៏បានផ្តល់គោលការណ៍លើកទឹកចិត្តដល់គម្រោងសួនឧស្សាហកម្ម និងតំបន់សេដ្ឋកិច្ចពិសេសថ្មីចំនួន ៤ មានទុនវិនិយោគសរុបប្រមាណ ១១០លានដុល្លារអាម៉េរិក ហើយរំពឹងថា នឹងបង្កើតការងារថ្មីចំនួន ១៥ ២២០កន្លែងផងដែរ ។
កាលពីពេលកន្លងទៅនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានបង្ហោះសារដែរថា គិតត្រឹមល្ងាចថ្ងៃទី១៤ ខែមិថុនា ឆ្នាំ២០២៥ សហគ្រាស និងគ្រឹះស្ថាននានាទូទាំងប្រទេសកម្ពុជា មានតម្រូវការកម្លាំងពលកម្មជាង ២៣ម៉ឺននាក់ ។ សារនេះសម្ដេចចង់ផ្ដល់ជូនបងប្អូនពលករកម្ពុជាដែលកំពុងធ្វើការនៅប្រទេសថៃ ហើយមានបំណងវិលត្រលប់មកស្រុកឱ្យទាក់ទងទៅមន្ទីរការងារ និងបណ្ដុះបណ្ដាលរាជធានី/ខេត្ត ដើម្បីទទួលបានឱកាសការងារនៅក្នុងស្រុក ៕
Account
Security
Favourite Content