បរទេស៖ យោងតាមប្រភពពី MSN បានរាយការណ៍ថា ជប៉ុនកំពុងប្រឈមនឹងការខ្វះខាតអង្ករ ដោយសារកំដៅកើនឡើងខ្លាំង ដែលធ្វើឱ្យការផ្គត់ផ្គង់ទីផ្សារក្នុងស្រុកមិនគ្រប់គ្រាន់។

នៅក្នុងឆ្នាំនេះ ជប៉ុន បានជួបបញ្ហាខ្វះខាតអង្ករយ៉ាងខ្លាំង ដោយនៅតាមផ្សារទំនើបបានកំណត់ឲ្យអតិថិជនម្នាក់ទិញអង្ករមួយថង់ប៉ុណ្ណោះ ហើយសម្រាប់តម្លៃបានឡើងថ្លៃថែមទៀតផង។ ទន្ទឹមនឹងនេះ វាមាន​មូលហេតុមួយចំនួនពាក់ព័ន្ធទៅនឹងកង្វះខាត​អង្ករ​នៅ​ប្រទេស​ជប៉ុន។ អ្នកជំនាញខ្លះយល់ឃើញថា ការខ្វះខាតអង្ករអាចមកពីកំណើនភ្ញៀវទេសចរ ដោយពួកគេភាគច្រើនញ៉ាំបាយក្នុងអំឡុងពេលវិស្សមកាលនៅជប៉ុន។ ក្នុងមួយខែៗ ជប៉ុនទទួលបានការរីកដុះដាលនៃវិស័យទេសចរណ៍ ដោយមានភ្ញៀវទេសចររាប់លាននាក់សម្រុកមកលេងប្រទេស ដែលគេប៉ាន់ស្មានថា អ្នកទេសចរភាគច្រើនទទួលទានស៊ូស៊ី អូនីហ្គីរី និងបាយ ៣ដងក្នុងមួយថ្ងៃ។ យ៉ាងណាមិញ ទោះបីជាមានភ្ញៀវទេសចរ ៣ លាននាក់ ទទួលទានបាយរាល់ពេលស្នាក់នៅរយៈពេលពេញមួយសប្តាហ៍ក៏ដោយ ប៉ុន្តែពួកគេមានចំណែកប្រហែល ០,៥ ភាគរយប៉ុណ្ណោះនៃការប្រើប្រាស់អង្ករសរុបរបស់ជប៉ុន។ មិនត្រឹមតែប៉ុណ្ណោះ រដូវក្តៅគឺជាកត្តាមួយផងដែរ ដោយសារតែនៅពេលកំដៅក្ដោខ្លាំងបានប៉ះពាល់ដល់ដំណាំស្រូវដែលមានគុណភាពខ្ពស់មួយចំនួន ហើយបើប្រៀបធៀបទៅនឹងវិបត្តិស្រូវឆ្នាំ១៩៩៣ សន្ទស្សន៍ស្រូវបានធ្លាក់ចុះយ៉ាងខ្លាំងដល់ទៅ ៧៤ ដោយសារអាកាសធាតុត្រជាក់ ប៉ុន្តែវានៅតែជារឿងគួរឲ្យព្រួយបារម្ភ។ កត្តា​មួយ​ទៀត​នោះគឺ​ការ​ស្តុកទុក​ ដោយសារ​គ្រោះ​រញ្ជួយដី​កាលពី​ខែ​សីហា ប្រជាពលរដ្ឋជប៉ុនបាននាំគ្នាស្តុកស្រូវអង្ករទុកដែលកាន់តែបន្ថែមសម្ពាធដល់ការផ្គត់ផ្គង់​។

គួរកត់សម្គាល់ថា ក្នុងមួយឆ្នាំៗ ជប៉ុនផលិតអង្ករតិចជាង ៧ លានតោន ប្រហាក់ប្រហែលការប្រើប្រាស់ក្នុងស្រុក។ គោលនយោបាយដ៏តឹងរឹងរបស់រដ្ឋាភិបាលបានរក្សាតុល្យភាពនេះ ដែលធ្វើឲ្យទីផ្សារមានភាពងាយរងគ្រោះខ្លាំងចំពោះការកើនឡើងនៃតម្រូវការ។

យោងតាមលោក Kazuhito Yamashita អតីតសមាជិកនៃក្រសួងកសិកម្ម រុក្ខាប្រមាញ់ និងនេសាទ របស់ជប៉ុន បានឲ្យដឹងដា បញ្ហាពិតប្រាកដចំពោះកង្វះខាតស្រូវអង្ករគឺជាគោលនយោបាយកាត់បន្ថយរបស់រដ្ឋាភិបាល។ គោលនយោបាយនេះរៀបចំឡើងដើម្បីការពារអតិរេកស្រូវ និងរក្សាតម្លៃខ្ពស់ ដែលធ្វើឱ្យកសិករដាំស្រូវតិច ហើយពួកគេប្តូរទៅរកដំណាំផ្សេង។ មិនដូចប្រទេសផ្សេងទៀតដែលនាំចេញអង្ករនោះទេ ដោយហេតុថា ជប៉ុនបានកំណត់ផលិតកម្មសរុប ដើម្បីជៀសវាងការផ្គត់ផ្គង់លើស។ ជាលទ្ធផល ដោយសារតែផលិតកម្មត្រូវបានគ្រប់គ្រងយ៉ាងតឹងរ៉ឹង សូម្បីតែតម្រូវការកើ់នឡើងតិចតួចក៏អាចប៉ះពាល់ដល់ទីផ្សារយ៉ាងឆាប់រហ័សផងដែរ ដូចជា ការខ្វះខាតស្រូវអង្ករ និងការឡើងថ្លៃ។ ដូច្នោះហើយ ការគ្រប់គ្រងដ៏តឹងរ៉ឹងលើការផលិតនេះ រួមជាមួយនឹងគោលនយោ​បាយចង់រក្សាស្ថិរភាពតម្លៃបានធ្វើឱ្យទីផ្សារអង្កររបស់ជប៉ុនងាយរងគ្រោះខ្លាំង បើទោះបីជាមានការផ្លាស់ប្តូរតិចតួចបំផុតក៏ដោយ។ និយាយជារួម ដរាបណា​គោលនយោបាយ​​នៅតែអនុវត្ត នោះ​ជប៉ុន​នឹង​បន្ត​ប្រឈមមុខ​នឹង​ស្ថានភាព​ស្រដៀង​គ្នា​នេះ​នៅពេល​អនាគត។