សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រជាពលរដ្ឋខ្មែរបានប្រារព្ធពិធីបុណ្យចូលឆ្នាំថ្មីប្រពៃណីជាតិចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ក្នុងបរិយាកាសសាមគ្គីភាព រំភើប និងសប្បាយរីករាយ ជាមួយនឹងស្នាមញញឹម ដោយជាការគួរកត់សម្កាល់ ក្នុងរយៈពេល៤ថ្ងៃ មានភ្ញៀវទេសចរជាតិ និងអន្តរជាតិចេញដើរលេងកម្សាន្តនៅតាមតំបន់រមណីយដ្ឋាននានានៅទូទាំងប្រទេសសរុបប្រមាណ ២១.៧០លាននាក់ ដោយក្នុងនោះមានភ្ញៀវទេសចរបរទេសប្រមាណ ១១ ម៉ឺននាក់។
សម្រាប់រាជធានី-ខេត្ត ដែលទទួលបានទេសចរច្រើនជាងគេទាំង៥ រួមមាន៖
១-កំពង់ចាម៖ ព្រឹត្តិការណ៍សង្ក្រាន្តកំពង់ចាម ឆ្នាំ២០២៤ ដើម្បីអបអរសាទរពិធីបុណ្យចូលឆ្នាំថ្មីប្រពៃណី ឆ្នាំរោងត្រូវនឹងថ្ងៃទី១៣-១៤-១៥-១៦ ខែមេសា ឆ្នាំ២០២៤នេះ ចំនួនភ្ញៀវទេសចរជាតិប្រមាណ ៥.៣៤៩.២៩៧ នាក់និងភ្ញៀវទេសចរបរទេស មានចំនួនប្រមាណ ៥១៤ នាក់។
២- ព្រៃវែង៖ ព្រឹត្តិការណ៍សង្រ្កាន្តខេត្តព្រៃវែង រៀបចំឡើងចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ បានបញ្ជាប់ទៅដោយបរិកាសសប្បាយរីករាយក្នុងមហាគ្រួសារខ្មែរ ដោយប្រជាពលរដ្ឋ ភ្ញៀវទេសចរជាតិ ប្រមាណ ២ ២៩៨ ៣៦៧ នាក់ និងភ្ញៀវទេសចរអន្តរជាតិចូលរួមកម្សាន្តចំនួន៣៥ នាក់
៣- កំពង់ស្ពឺ៖ ខេត្តកំពង់ស្ពឺ ប្រជាពលរដ្ឋ ភ្ញៀវទេសចរជាតិ ចំនួនប្រមាណ ២ ១០២ ២៤៧ នាក់ បានចូលរួមពិធីបុណ្យចូលឆ្នាំថ្មីប្រពៃណីជាតិ និងមានភ្ញៀវទេសចរបរទេស ចំនួនប្រមាណ ១ ៦៦៨ នាក់។
៤- បាត់ដំបង ៖សង្រ្កាន្តខេត្តបាត់ដំបង មានភ្ញៀវទេសចរជាតិចំនួនប្រមាណ ១ ៧៣១ ៤៣២ នាក់ និងភ្ញៀវទេសចរបរទេសប្រមាណ ៣ ១៩៧ នាក់ ដែលចំនួននេះ គិតពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤។
៥- កំពត ៖សម្រាប់រយៈពេល០៤ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរ ខេត្តកំពត ទទួលបានភ្ញៀវទេសចរជាតិប្រមាណ ១ ៤០០ ៣៧៥ នាក់ និងភ្ញៀវទេសចរបរទេសចំនួនប្រមាណ ៣ ១២២នាក់។
ដោយឡែក យោងតាមរបាយការណ៍ មន្ទីរទេសចរណ៍ខេត្តសៀមរាប រយៈពេល៤ថ្ងៃ ក្នុងព្រឹត្តិការណ៍សៀមរាបសង្ក្រាន្ត មានភ្ញៀវទេសចរជាតិ និងអន្តរជាតិជាង សរុបចំនួន ១ ២៣៩ ៨០៨ នាក់ ដើរលេងកម្សាន្តក្នុងខេត្តសៀមរាប ។
លោក ធិម សេរីវុឌ្ឍ ប្រធានស្តីទីមន្ទីរទេសចរណ៍ខេត្តសៀមរាប បានបង្ហាញថា ចំពោះភ្ញៀវទេសចរទាំងអស់ដែលមកលេងកំសាន្តក្នុងព្រឹត្តិការណ៍សៀមរាបសង្ក្រាន្ត រួមមាន ៖ ភ្ញៀវទេសចរបរទេសមានចំនួន ១៦ ៨០៨ នាក់និង ភ្ញៀវទេសចរជាតិ ព្រមទាំងបងប្អូនប្រជាពលរដ្ឋមានចំនួនប្រមាណ ១ ២២៣ ០០០ នាក់ ក្នុងនោះ ភ្ញៀវទេសចរជាតិ មានចំនួនប្រមាណ ៦៦០ ០០០ នាក់ និង បងប្អូនប្រជាពលរដ្ឋមានចំនួនប្រមាណ ៥៦៣ ០០០ នាក់ ។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងនាមរាជរដ្ឋាភិបាល និងក្នុងនាមខ្លួនសម្តេចផ្ទាល់ បានថ្លែងអំណរគុណចំពោះក្រសួង-ស្ថាប័ន អាជ្ញាធរដែនដីគ្រប់លំដាប់ថ្នាក់ គ្រប់រាជធានី-ខេត្ត ការពារសន្តិសុខសណ្តាប់ធ្នាប់ ធានាបាននូវសុវត្ថិភាព ពិធីបុណ្យចូលឆ្នាំថ្មីប្រពៃណីជាតិខ្មែរ។
សម្តេចធិបតី ក៏បានថ្លែងអំណរគុណយ៉ាងជ្រាលជ្រៅចំពោះកងយោធពលខេមរភូមិន្ទ កងនគរបាលជាតិ កងរាជអាវុធហត្ថ ប្រជាការពារ អ្នកអនាម័យ និងកម្លាំងស្ម័គ្រចិត្តគ្រប់យន្តការទាំងអស់ ដែលបានចូលរួមសហការបំពេញភារកិច្ចរៀបចំ តុបតែង និងប្រចាំការការពារសន្តិសុខសណ្តាប់ធ្នាប់ ធានាបាននូវសុវត្ថិភាព បង្កលក្ខណៈដល់ការកំសាន្តសប្បាយរបស់បងប្អូន អ៊ំពូមីង តាយាយ ព្រមទាំងបានញ៉ាំងឱ្យការប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរ នៅទូទាំងប្រទេស បានប្រព្រឹត្តទៅដោយភាពសប្បាយរីករាយ សោភ័ណភាព សេចក្តីថ្លៃថ្នូរ សុខសុវត្ថិភាព របៀបរៀបរយល្អ ប្រកបដោយមោទកភាពជាតិ៕
Account
Security
Favourite Content