បរទេស ៖ នៅឥណ្ឌូនេស៊ីមានក្រុមហ៊ុនអាជីវកម្មរកស៊ីជាច្រើនមុខណាស់ពាក់ព័ន្ធទៅនឹងផលិតផលថែរក្សាសម្រស់របស់ស្ត្រី ប៉ុន្តែក្នុងនោះមានក្រុមហ៊ុនមួយដែលមានប្រវត្តិរកស៊ីអស់រយៈពេលជាង៥០ឆ្នាំមកហើយក្នុងការផលិតរាល់ផលិតផលផ្សេងៗពាក់ព័ន្ធនឹងសម្រស់។

ក្រៅតែពីផ្តោតទៅលើការស្វែងរកប្រាក់ចំណូលហើយនោះ The Martha Tillaar Group ក៏តែងតែបានចែករំលែកផលចំណេញរបស់ខ្លួនទៅកាន់សង្គមវិញផងដែរ ជាពិសេសសម្រាប់មនុស្សស្រី និងសហគមន៍ដែលជាអ្នករកប្រាក់ចំណូលតាមរយៈការស្វែងរក និងផលិតគ្រឿងផ្សំធម្មជាតិសម្រាប់យកមកផលិតជាផលិតផលថែរក្សាសម្ភស្ស។

មានការិយាល័យកណ្តាលនៅទីក្រុងហ្សាកាតា ប្រទេសឥណ្ឌូនេស៊ី ក្រុមហ៊ុនផលិតគ្រឿងសំអាង The Martha Tillar Group ត្រូវបានបង្កើតឡើងតាំងតែពីឆ្នាំ១៩៧០ ផ្ដើមចេញពីកូនហាងកែសម្ផស្សតូចមួយកន្លែងមានទំហំត្រឹមតែ៤គុណនឹង៦ម៉ែត្រប៉ុណ្ណោះ ប៉ុន្តែក្រោយមកដល់ឆ្នាំ១៩៨១ ក្រុមហ៊ុនកាន់តែរីកចម្រើន និងបានប្រកាសខ្លួនក្លាយជាក្រុមហ៊ុនផ្លូវការ និងចាប់ផ្តើមរៀបចំសាងសង់រោងចក្រផលិតដោយខ្លួនឯងជាបន្តបន្ទាប់។

មានមូលហេតុចំនួន២ ដែលសាធារណៈជនទូទៅអាចចាត់ទុកបានថា The Martha Tillaar Group គឺជាប្រភេទធុរកិច្ចបែបបរិយាបន្នមួយនៅឥណ្ឌូនេស៊ី នោះគឺទី១ វាជាក្រុមហ៊ុនដែលបានគិតគូរដល់បញ្ហាយេនឌឺតាមរយៈការផ្តល់អត្ថប្រយោជន៍មួយចំនួនធំទៅដល់ស្ត្រី ហើយទី២ គឺជាការលើកទឹកចិត្ត និងគាំទ្រដល់សហគមន៍ដែលជាអ្នកផលិតគ្រឿងផ្សំពីធម្មជាតិដែលស្ថិតនៅក្នុងសង្វាក់ផលិតកម្មរបស់ខ្លួន។

ក្រៅពីតែពីការលើកកំពស់ស្ត្រីដែលមានដូចជាការហ្វឹកហាត់ជំនាញលើសេវាកម្មថែរក្សាសម្ផស្សដល់ស្ត្រីរាប់ពាន់នាក់ហើយនោះ ក្រុមហ៊ុនក៏បានចូលរួមចំណែកផ្សេងទៀតជាមួយនឹងបញ្ហាបរិស្ថានផងដែរ ដូចជា តាមរយៈគម្រោង Beauty Green ការថែរក្សាវប្បធម៍ប្រពៃណីតាមរយៈគម្រោង Beauty Culture និងការអប់រំផងជាមួយនឹងគម្រោង Beauty Education។

គួរឲ្យដឹងដែរថា​​ ក្រុមហ៊ុនបានដាក់ការប្តេជ្ញាចិត្តទៅលើកិច្ចការងារជួយចែករំលែកដល់ស្ត្រីតាំងតែពីឆ្នាំ២០០៣​ មកម្ល៉េះ ហើយចាប់តាំងពីពេលនោះមក ក្រុមហ៊ុនក៏តែងតែទទួលបាននូវពានរង្វាន់សំខាន់ៗពាក់ព័ន្ធទៅនឹងកិច្ចការងារសង្គមរហូតមកដល់ពេលបច្ចុប្បន្ននេះ។

គួររំលឹកដែរថា ធុរកិច្ចបរិយាប័ន្ន គឺជាអាជីវកម្មឈរលើគោលការណ៍ធុរកិច្ច ដែលបង្កើតដំណោះស្រាយជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoP និង B40)។ បន្ទាត់អាជីវកម្មបរិយាប័ន្ន ត្រូវបានបង្កើតឡើងក្នុងគោលបំណងផ្តល់ប្រាក់ចំណូលខ្ពស់គួរសម និងបង្កើននូវស្តង់ដារជីវភាពរស់នៅប្រសើរជាងមុនដល់ក្រុមមនុស្សដែលមានចំណូលទាបនៅបាតពីរ៉ាមីត ៤០% និងក្រុមមនុស្សដែលងាយរងគ្រោះ៕