សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ម្ចាស់សហគ្រាសផលិតក្នុងស្រុកមួយចំនួនបាននាំគ្នាសម្តែងក្តីបារម្ភពីបញ្ហាប្រេងឡើងថ្លៃ ដែលអាចប៉ះពាល់ដោយផ្ទាល់ដល់ចង្វាក់ផលិតកម្មរបស់ខ្លួន និងប្រឈមចំណាយថ្លៃដើមកាន់តែខ្ពស់។
គិតត្រឹមថ្ងៃទី១២ ខែមីនា ឆ្នាំ២០២៦នេះ តម្លៃប្រេងឥន្ឋនៈនៅលើទីផ្សារកម្ពុជា បានកើនឡើងខ្ពស់ដោយក្នុងនោះ ប្រេងសាំងមានតម្លៃ ៥២០០រៀលក្នុងមួយលីត្រ ហើយប្រេងម៉ាស៊ូតមានតម្លៃ ៦០៥០រៀលក្នុងមួយលីត្រ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម។
លោក លាង ឡេង ម្ចាស់ហសគ្រាសផលិតទឹកត្រី មានទីតាំងនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ បានសម្តែងក្តីបារម្ភចំពោះការឡើងថ្លៃប្រេង ដែលជះឥទ្ធិពលដល់ការឡើងថ្លៃនៃវត្ថុធាតុដើម រួមទាំងការចំណាយលើការដឹកជញ្ជូនកើនឡើងផងដែរ
លោកបានបញ្ជាក់ថា ៖
«បញ្ហាឡើងតម្លៃប្រេងគឺប៉ះខ្លាំង និងកំពុងតែពិបាករឿងនេះ អ្នកដឹកវត្ថុធាតុដើមមកគាត់សុំឡើងថ្លៃ ហើយយើងដឹកឥវ៉ាន់ទៅឱ្យម៉ូយនៅតាមខេត្តក៏ប៉ះពាល់ច្រើន ថ្ងៃមុនឡានយើងចូលទៅដល់ខេត្ត ចូលមកភ្នំពេញវិញអត់បាន អត់មានប្រេងរត់មកវិញ នៅខេត្តដាច់ស្តុកប្រេង គឺប៉ះពាល់ធ្ងន់»។
ចំពោះវត្ថុធាតុដើមចំាបាច់សម្រាប់ផលិតកម្មនៅក្នុងសហគ្រាសខាងលើនេះ រួមមាន ផ្លែម្ទេស ត្រី អំបិល ដែលត្រូវបានអ្នកផ្គត់ផ្គត់ស្នើសុំឡើងថ្លៃ។ ប៉ុន្តែទោះជាយ៉ាងនេះក្តី ក្នុងដំណាក់កាលដំបូង សហគ្រាស លាង ឡេង នៅមិនទាន់ដំឡើងថ្លៃផលិតផលលក់ចេញទៅឱ្យអតិថិជនរបស់ខ្លួននៅឡើយ ដោយរង់ចាំមើលស្ថានការណ៍នាពេលខាងមុខបន្តិចទៀតសិន។
លោក វ៉ាន់ សុង ប្រធានគ្រប់គ្រងក្រុមហ៊ុន លីលី ផលិតនំស្រួយ បានទទួលស្គាល់ផងដែរថា ក្រុមហ៊ុនបានទទួលរងផលប៉ះពាល់អំពីការឡើងថ្លៃប្រេង ប៉ុន្តែប៉ះពាល់តិច ដោយយោងទៅលើការដឹកជញ្ជូនផលិតផលទៅឱ្យអតិថិជនមានទីតាំងនៅជិតៗ ឬក្នុងក្រុងភ្នំពេញ។ ដោយឡែក ក្រុមហ៊ុនផ្គត់ផ្គង់វត្ថុធាតុដើម នៅមិនទាន់ជូនដំណឹងអំពីការឡើងថ្លៃនៅឡើយ ។
អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា ការឡើងថ្លៃភ្លាមៗនៃតម្លៃប្រេង តែងប៉ះពាល់ដល់សង្វាក់ផលិតកម្មក្នុងស្រុកជៀសមិនផុតនោះឡើយ។
អ្នកឧកញ៉ាបញ្ជាក់ថា ៖
«ជាជំហានដំបូងវាប៉ះហើយ គ្រាន់តែថាកម្រិតប៉ះពាល់មិនខ្លាំងទេ ព្រោះអី? ចង្វាក់ផលិតកម្មក៍ដោយ សេវាកម្មក៍ដោយ ទំនិញក៍ដោយ តែងរងផលប៉ះពាល់»។
ទោះយ៉ាងនេះក្តី អ្នកឧកញ៉ា លឹម ហេង បានអះអាងថា ទាំងអាជីវករ ទាំងអ្នកផលិត តែងដំឡើងថ្លៃដើមផលិតនៅពេលរងផលប៉ះពាល់រយៈពេលវែង អំពីការឡើងថ្លៃប្រេង ហើយអ្នកដែលប៉ះពាល់ពិតប្រាកដ គឺអតិថិជនដែលជាអ្នកទិញប្រើប្រាស់ដោយផ្ទាល់ រួមមានប្រជាពលរដ្ឋទូទៅ កម្មកររោងចក្រ បុគ្គលិកបំរើការងារនៅតាមក្រុមហ៊ុនឯកជន និងមន្រ្តីរាជការផងដែរ។
យោងតាមរបាយការណ៍ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា គិតត្រឹមចុងឆ្នាំ២០២៥ សហគ្រាសធុនតូច និងមធ្យម និងសិប្បកម្ម ក្នុងស្រុកមានចំនួន ៤៤ ៧៩៥ មូលដ្ឋាន និងបានផ្តល់ឱការងារដល់ពលរដ្ឋសរុបប្រមាណ ៤៩២ ១៣១នាក់ នៅទូទាំងប្រទេស៕
Account
Security
Favourite Content