បរទេស ៖ យោងទៅតាមប្រភពពី The Verge បានបង្ហាញថា ក្រុមហ៊ុនកាន់តែច្រើនកំពុងអនុវត្តលើគោលដៅបញ្ចេញឧស្ម័នសូន្យ ដើម្បីកាត់បន្ថយការបំភាយឧស្ម័នផ្ទះកញ្ចក់របស់ពួកគេនាពេលអនាគត ប៉ុនែ្តពួកគេចាំបាច់ត្រូវពឹងផ្អែកលើព្រៃឈើក្នុងការចាប់យកកាបូន។

ការសិក្សាថ្មីមួយបានបង្ហាញថា ការពឹងផ្អែកលើដើមឈើដើម្បីចាប់យកកាបូនឌីអុកស៊ីតចេញពីបរិយាកាសនឹងមិនគ្រប់គ្រាន់ដើម្បីបញ្ឈប់ការប្រែប្រួលអាកាសធាតុនោះទេ។ ប្រសិនបើការបំភាយឧស្ម័នថយចុះទាបខ្លាំងនោះយុទ្ធសាស្រ្តបញ្ចេញឧស្ម័នសូន្យសុទ្ធនេះនឹងមិនសូវមានប្រសិទ្ធភាពនោះទេ។ ប្រសិនបើឥទ្ធិពលរបស់មនុស្សទៅលើព្រៃឈើដូចជាការកាប់ព្រៃឈើត្រូវបានបញ្ឈប់ក្រោមលក្ខខណ្ឌអាកាសធាតុបច្ចុប្បន្ន នោះជីវម៉ាស់នៅលើដីអាចកើនឡើងដល់ទៅ ៤៤,១ ជីហ្គាតោន។ អ្នកស្រាវជ្រាវក៏គូសបញ្ជាក់ផងដែរថា ព្រៃឈើដែលលិចទៅដោយកាបូន ឬ សមត្ថភាពស្រូបយកកាបូនគួរតែត្រូវបានរក្សាទុក ដើម្បីប្រឆាំងនឹងការបំភាយឧស្ម័នពីវិស័យនានាដែលមិនអាចចៀសបាន។

មិនត្រឹមតែប៉ុណ្ណោះ ព្រៃឈើដើរតួជាកន្លែងលេចកាបូន ព្រោះនៅពេលដែលដើមឈើដុះលូតលាស់ឡើង ពួកវាប្រើប្រាស់ឧស្ម័នកាបូនិកក្នុងដំណើរការរស្មីសំយោគ ហើយប្រែក្លាយវាទៅជាសារធាតុរុក្ខជាតិ ឬជីវម៉ាសផ្សេងៗ។ លើសពីនេះ ពួកវាក៏រក្សាទុកកាបូននៅលើដីដោយបង្កើនសារធាតុសរីរាង្គរបស់ដីផងដែរ នោះហើយគឺជាមូលហេតុដែលព្រៃឈើដើរតួនាទីយ៉ាងសំខាន់ក្នុងការការពារភពផែនដីពីការឡើងកំដៅខ្លាំង។ នៅកន្លែងដែលមានការកាប់ឈើ ឬបញ្ហាផ្សេងទៀតដែលបានបំផ្លាញព្រៃឈើ ការស្ដារឡើងវិញនូវតំបន់នោះ គឺជាដំណោះស្រាយមួយក្នុងការបូមយកកាបូនឌីអុកស៊ីតពីបរិយាកាសមកវិញ ខណៈពេលក្រុមហ៊ុនអាជីវកម្មអាចរក្សានូវកម្រិតនៃការបំភាយបានដូចធម្មតា។

ទោះជាយ៉ាងណាក្តី តួនាទីរបស់ព្រៃឈើក្នុងការស្រូបយកកាបូនឌីអុកស៊ីតមានដែនកំណត់។ អ្នកស្រាវជ្រាវនៅ ETH Zurich និងមជ្ឈមណ្ឌលស្រាវជ្រាវរួមរបស់គណៈកម្មការអឺរ៉ុប ​​​លោក Caspar Roebroek បានលើកឡើថា ពួកគេបានផ្តោតការយកចិត្តទុកដាក់កាន់តែខ្លាំងលើការរំខានដោយធម្មជាតិដែលកើតឡើងនៅក្នុងព្រៃឈើដូចជាភ្លើងឆេះព្រៃ ការខូចខាតពីព្យុះ និងសត្វល្អិតជាដើម។ ពួកគេក៏អាចប៉ាន់ប្រមាណថាផ្ទៃដី ១,៦ លានគីឡូម៉ែត្រការ៉េ នឹងត្រូវការដាំដើមឈើឡើងវិញដើម្បីទូទាត់សងវិញ ហើយទំហំផ្ទៃដីនេះ​ប្រហែល​ប៉ុននឹង​អាឡាស្កា។

លើសពីនេះ វាត្រូវការពេលវេលារាប់ទសវត្សរ៍សម្រាប់ព្រៃឈើដើម្បីលូតលាស់ដល់ភាពចាស់ទុំ។ ទន្ទឹមនឹងនេះ វិបត្តិអាកាសធាតុកំពុងកើតឡើង ហើយមនុស្សជាតិត្រូវចាត់វិធានការឱ្យបានឆាប់រហ័សដើម្បីកំណត់ការឡើងកំដៅផែនដីឱ្យនៅក្រោម ១,៥ អង្សាសេ ដើម្បីសម្រេចបាននូវគោលដៅនៃកិច្ចព្រមព្រៀងទីក្រុងប៉ារីស។ ស្របពេលនេះដែរ អង្គការសហប្រជាជាតិ បង្កើតវេទិកាសំខាន់បំផុតរបស់ពិភពលោកស្តីពីការប្រែប្រួលអាកាសធាតុ (IPCC) បានបង្ហាញថា ព្រៃឈើតែមួយមុខនឹងមិនអាចជួយសង្គ្រោះភពផែនដីបានពេញលេញនោះទេ ពោលគឺវាត្រូវការចូលរួមពីមនុស្សជាខ្លាំង។ ការចាប់យកកាបូនឌីអុកស៊ីតចេញពីបរិយាកាសគឺចាំបាច់ណាស់ ដើម្បីឈានដល់ការបំភាយឧស្ម័នសូន្យសុទ្ធក្នុងវិស័យពិសេសៗ ហើយយុទ្ធសាស្ត្រផ្សេងៗគ្នាជាច្រើននឹងត្រូវការអនុវត្តឱ្យបានលឿនគ្រប់គ្រាន់ ពីព្រោះវាជាចំណុចសំខាន់បំផុតគឺការកាត់បន្ថយការបំភាយឧស្ម័ន។

យោងតាមប្រភពពដដែលបានរៀបរាប់ថា ក្រុមហ៊ុនដែលកំពុងវិនិយោគលើការចាប់យកកាបូនព្រៃឈើប្រហែលជាមិនបានដឹងពីរឿងសំខាន់ៗនោះទេ ដោយសារវាត្រូវការពេលវេលា ហើយព្រៃឈើក៏ងាយរងគ្រោះដោយសារការប្រែប្រួលអាកាសធាតុ ដូច្នេះសមត្ថភាពផ្ទុកកាបូនរបស់ពួកគេអាចនឹងងាយរងគ្រោះដោយសារសីតុណ្ហភាពខ្ពស់របស់ផែនដី។ ការ​ប្រែប្រួល​អាកាសធាតុ​កំពុង​កើត​ឡើង​លឿន​ណាស់ ហើយបញ្ហាទាំងនោះ​មាន​និន្នាការ​កាន់តែ​អាក្រក់​ទៅ​ៗ​យ៉ាង​ឆាប់​រហ័ស​។ ទន្ទឹម​នឹង​នេះ ក្រុមហ៊ុន​ទាំងនោះមិន​ចាត់​វិធាន​ការ​នៅ​កន្លែង​ដែល​វា​ត្រូវ​ការ​បំផុត ដែលរួមចំណែកកាត់​បន្ថយ​ការ​បំភាយ​ហ្វូស៊ីលនោះទេ។ ទោះបីជាវាបង្ហាញពីដែនកំណត់របស់ព្រៃឈើចំពោះការស្រូបយកកាបូនក៏ដោយ ប៉ុន្តែព្រៃឈើនៅតែមានសារៈសំខាន់សម្រាប់ប្រព័ន្ធអេកូឡូស៊ី និងអាកាសធាតុ។ ស្របពេលនេះដែរ អ្នកស្រាវជ្រាវជាច្រើន​បានបញ្ជាក់ថា ការរក្សាទុកកាបូនកាន់តែច្រើននៅលើដី នោះវាកាន់តែប្រសើរសម្រាប់ការកាត់បន្ថយការប្រែប្រួលអាកាសធាតុ ខណៈដែលការកាប់បំផ្លាញព្រៃឈើ និងភ្លើងឆេះព្រៃគឺជាប្រភពដ៏សំខាន់នៃការបំភាយឧស្ម័នផ្ទះកញ្ចក់។ នៅក្នុងកម្រិតនៃការបំភាយបច្ចុប្បន្ន ព្រៃឈើអាចចូលរួមចំណែកក្នុងការកាត់បន្ថយការប្រែប្រួលអាកាសធាតុក៏បានពិតមែន ប៉ុន្តែប្រសិនបើមនុស្សកាត់បន្ថយការបំភាយឧស្ម័នកាបូនិកយ៉ាងច្រើនពីប្រភពហ្វូស៊ីល នោះពួកគេអាចជួយជម្រុញដល់តួនាទីព្រៃឈើក្នុងការចាប់យកកាបូនបានកាន់តែច្រើន។ ក្រៅពី​មានតួនាទីនៅក្នុង​វដ្ត​កាបូន ព្រៃឈើ​មានផ្តល់សារៈសំខាន់​ផ្សេង​ទៀតដូចជា ការជួយទប់ស្កាត់ការរីករាលដាលនៃជំងឺ ជាជម្រកនៃប្រភេទសត្វរាប់លានប្រភេទ និងសហគមន៍ប្រពៃណីរាប់ពាន់នៅជុំវិញពិភពលោកផងដែរ៕