សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សក្ដានុពល និងភាពអំណោយផលដល់ការវិនិយោគនៅក្នុងតំបន់ភូមិភាគឦសាននៃខេត្តចំនួន៤ រួមមាន ក្រចេះ ស្ទឹងត្រែង មណ្ឌលគីរី និងរតនៈគីរី កាន់តែមានភាពទាក់ទាញ ក្រោយរាជរដ្ឋាភិបាលបានដាក់ចេញនូវកម្មវិធីពិសេសជំរុញការវិនិយោគភូមិភាគឦសានកាលពីអំឡុងខែមេសា ឆ្នាំ២០២៥។ ជាក់ស្ដែងកាលពីពេលថ្មីនេះ មានម្ចាស់ក្រុមហ៊ុន និងសហគ្រាសជាច្រើនបានចុះទៅពិនិត្យទីតាំងដោយផ្ទាល់ដើម្បីឈានដល់ការសម្រេចចិត្តបណ្តាក់ទុនវិនិយោគស្របតាមផែនការរបស់ខ្លួន។
ឯកឧត្តម ពេជ្រ សម្បត្តិ អនុរដ្ឋលេខាធិការ និងជាអនុប្រធានលេខាធិការដ្ឋាន ក្រុមការងារកម្មវិធីពិសេសជំរុញការវិនិយោគភូមិភាគឦសាន បានសម្របសម្រួលដឹកនាំក្រុមការងារ ដោយមានការចូលរួមពីតំណាងរដ្ឋបាលខេត្តស្ទឹងត្រែង និងមន្ទីរជំនាញពាក់ព័ន្ធ ដើម្បីជួបប្រជុំផ្តល់ព័ត៌មាន និងប្រឹក្សាយោបល់អំពីអត្ថប្រយោជន៍នៃកម្មវិធីពិសេសជំរុញការវិនិយោគក្នុងខេត្តទាំង៤ នៅភូមិភាគឦសាន ដល់ម្ចាស់ក្រុមហ៊ុន/សហគ្រាស ដោយផ្តោតលើទិដ្ឋភាពច្បាប់, លិខិតបទដ្ឋានគតិយុត្ត, គោលនយោបាយ និងបញ្ហាទូទៅពាក់ព័ន្ធនឹងការវិនិយោគនៅកម្ពុជា ។
នៅក្នុងឱកាសនោះ ឯកឧត្តម បានលើកឡើងអំពីតួនាទី និងភារកិច្ច ព្រមទាំងសារៈសំខាន់របស់កម្មវិធីពិសេសជំរុញការវិនិយោគនៅភូមិឦសានក្នុងនាមជាច្រកចេញចូលតែមួយ ការដោះស្រាយបញ្ហាការវិនិយោគជាកញ្ចប់នៅហ្នឹងកន្លែង ព្រមទាំងគូសបញ្ជាក់អំពីភាពម្ចាស់ការពីតំណាងរដ្ឋបាលខេត្តនីមួយៗក្នុងការចូលរួមទាក់ទាញ ការជំរុញ ការគាំពារ និងការថែទាំការវិនិយោគនៅក្នុងមូលដ្ឋានរបស់ខ្លួន ។
បន្ទាប់ពីកិច្ចប្រជុំរួច ក្រុមការងារក៏បានចុះពិនិត្យទីតាំងគម្រោងវិនិយោគផ្ទាល់របស់ក្រុមហ៊ុន/សហគា្រស ដែលមានសក្កានុពលស្រាប់ ដើម្បីជំរុញឱ្យមានឧស្សាហកម្មកែច្នៃដែលមានតម្លៃបន្ថែមខ្ពស់ ក្នុងគោលបំណងបង្កើតការងារជូនប្រជាពលរដ្ឋ តាមរយៈការជំរុញសក្តានុពលនៃការផលិត សកម្មភាពវិនិយោគលើការកែច្នៃ ព្រមទាំងសកម្មភាពផ្សេងៗ ដែលគាំទ្រដល់កម្មវិធីពិសេស និងតាមដានសកម្មភាពការវិនិយោគសម្បទានដីសេដ្ឋកិច្ច ដើម្បីពិភាក្សាអំពីស្ថានភាពទូទៅ និងបញ្ហាប្រឈមរបស់ក្រុមហ៊ុន/សហគ្រាស ព្រមទាំងផ្តល់នូវដំណោះស្រាយក៏ដូចជាការប្រឹក្សាយោបល់ក្នុងការជំរុញការវិនិយោគ និង ការពង្រីកការវិនិយោគ ជាពិសេស ចំពោះក្រុមហ៊ុន/សហគ្រាសដែលកំពុងវិនិយោគលើការដាំដុះដំណំាកសិកម្ម ឱ្យឈានទៅរកការវិនិយោគលើការកែច្នៃដែលមានតម្លៃបន្ថែមខ្ពស់ ។
សូមរម្លឹកថា កម្មវិធីពិសេសជំរុញការវិនិយោគក្នុងខេត្តទាំង ៤ នៅភូមិភាគឦសាន នៃព្រះរាជាណាចក្រកម្ពុជា ឆ្នាំ២០២៥-២០២៨ ត្រូវបានប្រកាសដាក់ឱ្យអនុវត្តជាផ្លូវការក្រោមអធិបតីភាពដ៏ខ្ពង់ខ្ពស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី ៩ ខែមេសា ឆ្នាំ២០២៥ ក្នុងគោលបំណងជំរុញការវិនិយោគលើវិស័យអាទិភាព ដូចជា វិស័យកសិកម្ម, កសិ-ឧស្សាហកម្ម និង វិស័យទេសចរណ៍ តាមរយៈការលើកទឹកចិត្តពិសេស ដែលមានវិសាលភាពនៅខេត្តភូមិភាគឦសាន រួមមាន ខេត្តក្រចេះ ខេត្តស្ទឹងត្រែង ខេត្តរតនគិរី និង ខេត្តមណ្ឌលគិរី ។ តាមរយៈនេះ, រាជរដ្ឋាភិបាល បានបង្កើតក្រុមការងារជំរុញការវិនិយោគក្នុងភូមិភាគឦសាន ជាយន្តការ “ច្រកចេញចូលតែមួយ” ដើម្បីពិនិត្យ និងអនុម័តលើកទឹកចិត្តពិសេសជូនគម្រោងវិនិយោគ ផ្តល់លិខិតអនុញ្ញាត ឬ អាជ្ញាបណ្ណនានា ជាកញ្ចប់ ស្របតាមអភិក្រម “ជវភាពនៃប្រព័ន្ធតួអង្គតែមួយ” តាមរយៈការចូលរួមសម្រេចចិត្តរួមគ្នា ប្រកបដោយប្រសិទ្ធភាព និង តម្លាភាព ៕
Account
Security
Favourite Content