ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ក្នុងឆ្នាំ២០២៤ ក្រសួងបានដាក់ចេញទិសដៅបន្តពង្រឹងការគ្រប់គ្រងទេសន្តរប្រវេសន៍ការងារប្រកបដោយសុវត្ថិភាព គុណភាព និងប្រសិទ្ធភាពដែលធ្វើឱ្យភាគីចំនួន៥សប្បាយចិត្ត គឺពលករទេសន្តប្រវេសន៍ និយោជក ប្រទេសទទួលពលករ ក្រុមគ្រួសារពលករដែលធ្វើចំណាកស្រុក អ្នកសម្របសម្រួលទាំងនៅក្នុងប្រទេសបញ្ជូន និងប្រទេសគោលដៅ រីឯរដ្ឋាភិបាលនៃប្រទេសទាំងពីរគឺប្រទេសទទួល និងប្រទេសបញ្ជូនក៏សប្បាយចិត្តដូចៗគ្នា។

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងក្នុងការប្រកាសដាក់ឱ្យអនុវត្ត «ផែនការយុទ្ធសាស្រ្តអភិវឌ្ឍន៍វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ ២០២៤-២០២៨» កាលពីពេលកន្លងទៅថ្មីៗនេះថា ក្រសួងការងារ និងបណ្តុះបណ្តាលវិជ្ជាជីវៈ បានផ្តល់ឱកាសការ​ងារ និងគាំពារដល់ពលករកម្ពុជាដែលបម្រើការងារនៅក្រៅប្រទេសបានចំនួនជាង ១,៣លាននាក់ក្នុងឆ្នាំ២០​២៣​ ហើយជាមធ្យម ពលករកម្ពុជាបានបញ្ជូនប្រាក់បញ្ញើមកក្នុងប្រទេសវិញប្រមាណជិត៣ពាន់លានដុល្លារអាមេរិកក្នុង១ឆ្នាំ។

របាយការណ៍ក្រសួងការងារបានឱ្យដឹងថា លទ្ធផលការងារសម្រាប់ឆ្នាំ២០២៣ ក្រសួងបានផ្តល់ឱកាសការងារ និងគាំពារដល់ពលករកម្ពុជាដែលកំពុងស្នាក់នៅ និងធ្វើការនៅក្រៅប្រទេសបានចំនួនជាង ១ ៣៥៦ ០០០ នាក់ ក្នុងនោះប្រទេសថៃមានចំនួនប្រមាណ ១,២លាននាក់, កូរ៉េ៥ម៉ឺននាក់, ជប៉ុន២ម៉ឺននាក់, ម៉ាឡេស៊ី២២ ០០០នាក់, សិង្ហបុរីជាង៨០០ នាក់, តំបន់រដ្ឋបាលពិសេសហុងកុងជាង២០០នាក់, និងអារ៉ាប៊ីសាអូឌីត៦៤នាក់ ហើយដែលជាមធ្យមពលករបានបញ្ជូនប្រាក់បញ្ញើមកក្នុងប្រទេសវិញក្នុង១ឆ្នាំប្រមាណជា២,៩ប៊ីលានដុល្លារអាមេរិកផងដែរ»។

ឯកឧត្តម ហេង សួរ បានបញ្ជាក់បន្ថែមថា ក្នុងឆ្នាំ២០២៤ ក្រសួងក៏បានដាក់ចេញទិសដៅបន្តពង្រឹងទំនាក់ទំនងជាមួយបណ្ដាប្រទេសនានា ដៃគូអភិវឌ្ឍន៍ អង្គការជាតិ-អន្តរជាតិ សង្គមស៊ីវិល និងអង្គការវិជ្ជាជីវៈទាំងកម្រិតទ្វេភាគី ពហុភាគី ក្នុងក្របខ័ណ្ឌតំបន់ និងពិភពលោកដើម្បីបង្កើនកិច្ចសហប្រតិបត្តិការលើវិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ។

ដោយឡែក ក្នុងរយៈពេល៥ឆ្នាំខាងមុខនេះគឺចាប់ពីឆ្នាំ២០២៤ ដល់ឆ្នាំ២០២៨ ក្រសួងការងារ និងបណ្តុះបណ្តាលវិជ្ជាជីវៈបានដាក់ចេញយុទ្ធសាស្ត្រពង្រឹងការគ្រប់គ្រងទេសន្តរប្រវេសន៍ការងារប្រកបដោយសុវត្ថិភាព គុណភាព និងប្រសិទ្ធភាព ដើម្បីការពារសិទ្ធ កិត្តិយស សេចក្ដីថ្លៃថ្នូរ និងផលប្រយោជន៍របស់ពលករទេសន្តរប្រវេសន៍កម្ពុជា ក៏ដូចជាជនបរទេសធ្វើការដោយស្របច្បាប់នៅកម្ពុជា។ នេះបើតាមឯកឧត្តមរដ្ឋមន្ត្រីក្រសួងការងារ។​

រាជរដ្ឋាភិបាលកម្ពុជាដែលមានក្រសួងការងារ និងបណ្តុះបណ្តាលវិជ្ជាជីវៈជាសេនាធិការ បានពង្រាយ និងពង្រីកជាបន្តបន្ទាប់នូវអនុពន្ធការងារនៅតាមបណ្តាប្រទេសគោលដៅដែលពលករកម្ពុជាកំពុងមានវត្តមានដើម្បីដោះស្រាយបញ្ហា និងការពារសិទ្ធិជូនពលករក្នុងករណីមានការរំលោភបំពាន។

ឯកឧត្តម ហេង សួរ ធ្លាប់បានលើកឡើងក្នុង ទិវាអន្តរជាតិសម្រាប់ទេសន្តរប្រវេសន៍ឆ្នាំ២០២៣ កាលពីថ្ងៃទី២២ ខែធ្នូ ឆ្នាំ២០២៣ ថា ការពង្រាយ និងពង្រីកអនុពន្ធការងារនេះ គឺសុទ្ធសឹងតែជាការបង្ហាញពីការតាំងចិត្ត និងការប្តេជ្ញាចិត្តរបស់រាជរដ្ឋាភិបាលដែលមិនព្រងើយកន្តើយចំពោះពលករកម្ពុជានៅបរទេស។

ឯកឧត្តមរដ្ឋមន្ត្រី ក៏បានគូសបញ្ជាក់បន្តថា ក្នុងអាណ្តតិទី៧នេះ ផ្នែកទេសន្តរប្រវេសន៍ បានក្លាយជាកម្មវិធីដ៏សំខាន់និងជាអាទិភាពសម្រាប់ក្រសួងការងារ ក្នុងការយកចិត្តទុកដាក់ដើម្បីលើកកម្ពស់ និងគាំពារសិទ្ធិពលរដ្ឋខ្មែរនៅក្រៅប្រទេស ក៏ដូចជាជនបរទេសដែលធ្វើការនៅកម្ពុជា៕