សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មកទល់ពេលនេះ រថយន្តអគ្គិសនីចំនួន២៣២៧គ្រឿង បានចុះបញ្ជីនៅក្រសួងសាធារណការ និងដឹកជញ្ជូន ដោយក្នុងនោះរថយន្តអគ្គិសនីរបស់ក្រុមហ៊ុន BYD ចំនួន៧៩០គ្រឿងឈរលើកំពូលតារាង និងបន្តបន្ទាប់ដោយរថយន្តអគ្គិសនីរបស់ក្រុមហ៊ុន តូយ៉ូតា ចំនួន ៤៤៣គ្រឿង, រថយន្តអគ្គិសនីរបស់ក្រុមហ៊ុន Tesla ចំនួន ២៦៩គ្រឿង និងរថយន្តអគ្គិសនីរបស់ក្រុមហ៊ុនផ្សេងៗទៀត។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា ៖ រយៈពេល៩ខែ ឆ្នាំ២០២៣ មានរថយន្តអគ្គិសនីចុះបញ្ជីចំនួន ២០៣គ្រឿង ខណៈដែលរយៈពេលដូចគ្នានៅឆ្នាំ២០២៤ មានរថយន្តអគ្គិសនីចុះបញ្ជីចំនួន ១៦៤៤គ្រឿង ដែលមានន័យថា រថយន្តអគ្គិសនីមានសន្ទុះកើនឡើង ៧១០% ខណៈដែលទោចក្រយានកើនឡើង ៣៦៨% ដោយឡែកត្រីចក្រយានថយចុះ-១៥%។
លោកបានបញ្ជាក់ថា៖ រាជរដ្ឋាភិបាលបានដាក់ចេញគោលនយោបាយជាតិស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ ដែលជាត្រីវិស័យ និងជាឧបករណ៍គោលនយោបាយរបស់រាជរដ្ឋាភិបាលក្នុងការតម្រង់ទិសនិងជំរុញការអភិវឌ្ឍវិស័យយានយន្តអគ្គិសនីនៅកម្ពុជា។ រាជរដ្ឋាភិបាលផ្តល់សេរីភាព និងជម្រើសកាន់តែសំបូរបែបសម្រាប់ការប្រើប្រាស់យានយន្ត ដើម្បីសម្រួលការធ្វើដំណើរ ដឹកជញ្ជូនទំនិញ និងសេវាកម្មផ្សេងៗ។ ជាក់ស្តែង អត្រានៃការប្រើប្រាស់យានយន្តកើនយ៉ាងខ្លាំង ជាពិសេសរថយន្តអគ្គិសនី។
ការកើនឡើងនៃការប្រើរថយន្តអគ្គិសនីអាចបណ្តាលមកពីកត្តាជាច្រើន រួមទាំងការលើកទឹកចិត្តរបស់រដ្ឋាភិបាល ការបង្កើនការយល់ដឹងអំពីបរិស្ថាន និងការជឿនលឿនផ្នែកបច្ចេកវិទ្យានៅក្នុងហេដ្ឋារចនាសម្ព័ន្ធថ្ម និងការសាកអាគុយ។
គួរជម្រាបថា៖ គោលដៅរបស់គោលនយោបាយជាតិស្តីពីការអភិវឌ្ឍន៍វិស័យយានយន្តអគ្គិសនី គឺចងឱ្យមានរថយន្តអគ្គិសនី ៧៧០ ០០០ គ្រឿង នៅលើផ្លូវនៅឆ្នាំ២០៣០ ស្មើនឹងប្រហែល ១០ ភាគរយនៃចំនួនរថយន្ត ៧,៧៥ លានគ្រឿង ដែលបានចុះបញ្ជីនៅក្នុងប្រទេសកម្ពុជានាពេលបច្ចុប្បន្ននេះ។
ក្នុងការជំរុញប្រទេសឆ្ពោះទៅរកគោលដៅនេះ រដ្ឋាភិបាលកម្ពុជាបានអនុវត្តគំនិតផ្តួចផ្តើមផ្សេងៗ ដើម្បីលើកទឹកចិត្តឱ្យមានការទទួលយកយានយន្តអគ្គិសនី។ ក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវការលើកលែងពន្ធសម្រាប់ការនាំចូលរថយន្តអគ្គិសនី ដែលធ្វើឱ្យវាកាន់តែមានតម្លៃសមរម្យសម្រាប់អ្នកប្រើប្រាស់។បន្ថែមពីលើនេះ រដ្ឋាភិបាលកំពុងវិនិយោគលើហេដ្ឋារចនាសម្ព័ន្ធសាកអាគុយ ដោយមានគម្រោងដំឡើងស្ថានីយ៍សាកអាគុយនៅទូទាំងក្រុងធំៗ និងតាមមហាវិថីនានា។ គោលនយោបាយរបស់រដ្ឋាភិបាលបានដើរតួនាទីយ៉ាងសំខាន់ក្នុងការរៀបចំទីផ្សារសម្រាប់យានជំនិះអគ្គិសនី ដោយកាត់បន្ថយឧបសគ្គផ្នែកហិរញ្ញវត្ថុ និងការវិនិយោគលើហេដ្ឋារចនាសម្ព័ន្ធចាំបាច់ ហើយកម្ពុជាអាចពន្លឿនការផ្លាស់ប្តូរទៅជាមធ្យោបាយចល័តអគ្គិសនី។
គួរឱ្យដឹងថា៖បច្ចុប្បន្ននេះ ស្ថានីយ៍សាកអាគុយរថយន្តអគ្គិសនី មាននៅ១៨ទីតាំងក្នុងប្រទេសកម្ពុជា៕
Account
Security
Favourite Content