បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា សហរដ្ឋអាមេរិកបានដាក់ពន្ធលើផលិតផលចិនដោយដំឡើងពន្ធ ៤ ដងលើរថយន្តអគ្គិសនី (EVs) ដល់ជាង ១០០ ភាគរយ និងដាក់ពន្ធថ្មីលើឈីបកុំព្យូទ័រ កោសិកាថាមពលពន្លឺព្រះអាទិត្យ និងថ្មលីចូម-អ៊ីយ៉ុង។

កាលពីថ្ងៃអង្គារ៍កន្លងទៅនេះ សេតវិមានបានលើកឡើង​ថា វិធានការ​ថ្មី​នេះ​មាន​គោល​បំណង​ការពារ​និយោជិត និង​អាជីវកម្ម​អាមេរិក។ ទន្ទឹមនឹងនេះ ការអនុវត្តវិធានការពន្ធគយរបស់អាម៉េរិកអាចនឹងប៉ះពាល់ដល់ទំនិញនាំចូលពីចិនតម្លៃ ១៨ ពាន់លានដុល្លាររួមមាន ដែកថែប អាលុយមីញ៉ូម គ្រឿងអេឡិចត្រូនិក អាគុយ កោសិកាថាមពលពន្លឺព្រះអាទិត្យ និងសារធាតុរ៉ែសំខាន់ៗ។

មន្ត្រីរបស់រដ្ឋបាលលោក Biden បានអះអាងថា វិធានការនេះបានធ្វើឡើងដើម្បីឆ្លើយតបទៅនឹងការអនុវត្តពាណិជ្ជកម្មមិនយុត្តិធម៌ជាច្រើនឆ្នាំដោយប្រទេសចិនរួមការផ្ទេរបច្ចេកវិទ្យាដោយបង្ខំ ការរំលោភកម្មសិទ្ធិបញ្ញា និងការវាយប្រហារតាមអ៊ីនធឺណិតប្រឆាំងនឹងក្រុមហ៊ុនអាមេរិក។

ទីប្រឹក្សាសេដ្ឋកិច្ចជាតិរបស់សេតវិមានលោក Lael Brainard បាននិយាយថា ចិនកំពុងប្រើប្រាស់យុទ្ធសាស្ត្រវិនិយោគដែលខ្លួនធ្លាប់ប្រើពីមុនមកដើម្បីជំរុញកំណើនរបស់ខ្លួន បើទោះបីជាសមត្ថភាពផលិតរបស់ចិនកំពុងលើស និងធ្វើឱ្យទីផ្សារពិភពលោកពោរពេញទៅដោយការនាំចេញដែលមានតម្លៃទាបដែលមកពីការអនុវត្តពាណិជ្ជកម្មមិនយុត្តិធម៌ក៏ដោយ។

យោងតាមអ្នកតំណាងពាណិជ្ជកម្មអាមេរិកលោកស្រី Katherine Tai លើកឡើងថា ចិនបានលួចកម្មសិទ្ធិបញ្ញារបស់សហរដ្ឋអាមេរិក ដោយក្នុងករណីខ្លះទីក្រុងប៉េកាំងកាន់តែបំពានជាមួយនឹងការវាយប្រហារតាមអ៊ីនធឺណិតដែលផ្តោតសំខាន់លើបច្ចេកវិទ្យាអាមេរិក។ បន្ថែមពីនេះ ការអនុវត្ត​ពន្ធ​លើ​ផ្នែក ៣០១ ពីមុន​មាន​ប្រសិទ្ធភាព​ក្នុង​ការ​កាត់​បន្ថយ​ការ​នាំ​ចូល​ទំនិញពីប្រទេសចិន ខណៈ​ដែល​ការ​បង្កើន​ការ​នាំ​ចូល​ពី​ប្រទេស​ផ្សេង​ទៀត។

យោងតាមការិយាល័យជំរឿនសហរដ្ឋអាម៉េរិកបានឲ្យដឹងថា អាម៉េរិកបាននាំចូលទំនិញពីប្រទេសចិនចំនួន ៤២៧ ពាន់លានដុល្លារក្នុងឆ្នាំ ២០២៣ និងបាននាំចេញចំនួន ១៤៨ ពាន់លានដុល្លារ។ បើទោះបីជាចិនគឺជាដៃគូប្រកួតប្រជែងកំពូលរបស់អាម៉េរិកក៏ដោយ ប៉ុន្តែអាម៉េរិកខណៈពេលដែលកំពុងរឹតបន្តឹងសេដ្ឋកិច្ចប្រឆាំងនឹងប្រទេសនេះ។ ពន្ធគយលើទំនិញរបស់ចិនត្រូវបានដំឡើងយ៉ាងខ្លាំងក្រោមការដឹកនាំរបស់លោកប្រធានាធិបតី Donald Trump ដែលបានចាប់ផ្តើមការប្រកួតលើកដំបូងនៅក្នុងសង្គ្រាមពាណិជ្ជកម្ម tit-for-tat ក្នុងឆ្នាំ ២០១៨ ។ វិធីសាស្រ្តអរិភាពស្រដៀងគ្នានេះបានបន្តនៅក្រោមតំណែងលោកប្រធានាធិបតី Joe Biden ដែលបានអនុម័តគោលនយោបាយជាច្រើនសំដៅលើសេដ្ឋកិច្ចចិន។

ទោះជាយ៉ាងណាក្តី រដ្ឋាភិបាលក្រុងប៉េកាំងបានព្រមានថា វិធានការបែបនេះបំពានលើគោលការណ៍នៃការប្រកួតប្រជែងដោយយុត្តិធម៌ និងប៉ះពាល់ដល់ស្ថិរភាពនៃពាណិជ្ជកម្មពិភពលោក។ កាលពីសប្តាហ៍ មូលនិធិរូបិយវត្ថុអន្តរជាតិបានព្រមានថា ការកើនឡើងនៃភាពតានតឹងពាណិជ្ជកម្មរវាងសហរដ្ឋអាមេរិក និងចិននកំពុងគំរាមកំហែងដល់កំណើនសេដ្ឋកិច្ចពិភពលោកទាំងមូល៕