សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
យោងតាមរបាយការណ៍វិស័យអគ្គិសនីឆ្នាំ២០២១ បានឱ្យដឹងថា កម្ពុជាមានការផលិតអគ្គិសនីតាមប្រភេទមធ្យោបាយចំនួន៥ប្រភេទគឺ រោងចក្រវារីអគ្គិសនី រោងចក្រដ្យេសែល រោងចក្រប្រើឡចំហាយ ដើរដោយធ្យូងថ្ម រោងចក្រប្រើជីវម៉ាស់ និងរោងចក្រដើរដោយថាមពលព្រះអាទិត្យ។
បើតាមរបាយការណ៍ដដែល គិតត្រឹមឆ្នាំ ២០២១ កម្ពុជាមានរោងចក្រវារីអគ្គិសនីចំនួន ១០កំពុងដំណើរការ រោងចក្រអគ្គិសនីដើរដោយធ្យូងថ្មចំនួន៣ និងរោងចក្រអគ្គិសនីប្រើប្រាស់ជីវម៉ាសចំនួន៣។ ដោយឡែក ថាមពលស្អាតគឺសំដៅទៅលើប្រភពថាមពលអគ្គិសនីដែលមិនបង្កផលប៉ះពាល់ ឬមានផលប៉ះពាល់តិចតួចទៅដល់សហគមន៍ និងជីវៈចម្រុះ។ ប៉ុន្តែ ប្រភពថាមពលសំខាន់របស់កម្ពុជាបច្ចុប្បន្នគឺបានមកពីរោងចក្រវារីអគ្គិសនី ដែលជាប្រភេទថាមពលកកើតឡើងវិញ។
ថ្វីត្បិតថា វារីអគ្គិសនីជាប្រភពថាមពលកកើតឡើងវិញ ក៏ប៉ុន្តែតិច ឬច្រើនវាបានបង្កការប៉ះពាល់ទៅដល់សហគមន៍មួយក្រុមតូច និងប៉ះពាល់ដល់ជីវៈចម្រុះតាមរយៈការប្ដូរលំហូរទឹក។ ដូច្នេះហើយ ទាំងសង្គមស៊ីវិល និងរដ្ឋាភិបាល កំពុងតែជំរុញនូវថាមពលស្អាតឱ្យបានកាន់តែច្រើន ដើម្បីកាត់បន្ថយការពឹងផ្អែកលើថាមពលកកើតឡើងវិញ។
បើតាមកញ្ញា ពេជ្រ រតនា ដែលជាប្រធានផ្នែកថាមពលកកើតឡើងវិញនៃកម្មវិធី CAPRED បានឱ្យដឹងថា វិស័យថាមពលនេះគឺជារឿងសំខាន់ណាស់សម្រាប់ការរស់នៅប្រចាំថ្ងៃរបស់ប្រជាជន យើង ប៉ុន្តែអ្វីដែលកាន់តែសំខាន់ទៅទៀតនោះគឺត្រូវធានាពីភាពយូរអង្វែងរបស់ថាមពល។
បើតាមការឱ្យដឹងពីកញ្ញា ថាមពលស្អាត គឺជាការធានាបាននូវនិរន្តភាពនៃវិស័យថាមពលទាំងមូល។ ជាក់ស្ដែង ជីវម៉ាស់គឺជាវិធីក្នុងការបម្លែងថាមពលអគ្គីសនី ដោយប្រើប្រាស់កាកសំណល់ផ្ទះបាយ ដែលមិនមានផលប៉ះពាល់ដល់បរិស្ថាន ឬសហគមន៍នោះទេ។
ការប្រើប្រាស់សូឡាដើម្បីចាប់យកថាមពលព្រះអាទិត្យ ក៏រាប់ទុកថាជាប្រភេទថាមពល ស្អាតផងដែរ ប៉ុន្តែវិធីបម្លែងថាមពលទាំងពីរនេះនៅមានកម្រិតតូចនៅឡើយ ពោលគឺស្ថិតក្នុង កម្រិតគ្រួសារ និងសហគមន៍ ដែលមិនទាន់អាចផ្គត់ផ្គង់កម្រិតប្រទេសបាន។ ម្យ៉ាងទៀត ថ្វីត្បិតថាកម្ពុជាមានប្រភពថាមពលអគ្គិសនីច្រើនក៏ពិតមែន ប៉ុន្តែកម្ពុជាក៏នៅមានការខ្វះខាតអគ្គិសនីប្រើប្រាស់ក្នុងស្រុកផងដែរ។
យោងតាមទិន្នន័យពីអាជ្ញាធរអគ្គិសនីកម្ពុជា (EAC) បានបង្ហាញថា កម្ពុជាមានអានុភាពដំឡើងថាមពលអគ្គិសនីទាំងប្រភពអគ្គិសនីក្នុងស្រុក និងនាំចូលសរុបចំនួន ៤ ៤៩៥ មេហ្គាវ៉ាត់ នៅក្នុងឆ្នាំ ២០២២ កន្លងទៅដែល ក្នុងនោះប្រភពអគ្គិសនីក្នុងស្រុកមានចំនួនជាង ៣ ៤៦៤ មេហ្គាវ៉ាត់។
ការនាំចូលភ្លើងអគ្គិសនីពីប្រទេសជិតខាងបែបនេះហើយ ដែលនាំឱ្យតម្លៃភ្លើងអគ្គិសនីក្នុងប្រទេសមានតម្លៃថ្លៃ ហើយដែលវាប៉ះពាល់បន្តទៅដល់ជម្រើសក្នុងការវិនិយោគរបស់វិនិយោគិនបរទេស។ ប៉ុន្តែ ប្រសិនបើកម្ពុជាអាចពង្រឹងនូវការផលិតថាមពលស្អាតបានកាន់តែច្រើន នោះកម្ពុជាអាចនឹងកាត់បន្ថយ ឬបញ្ឈប់ការទិញថាមពលអគ្គិសនីពីគេតែម្ដង។
ទាក់ទិននឹងចំណុចនេះ កញ្ញា ពេជ្រ រតនា បានរៀបរាប់ថា៖
«អ្វីដែលរដ្ឋាភិបាលកំពុងតែដោះស្រាយដូចគ្នាគឺបញ្ហាអគ្គិសនីយើងនៅថ្លៃបើធៀបនឹងប្រទេសជិតខាង។ នៅពេលដែលអគ្គិសនីថ្លៃ វាក៏មានបញ្ហាប្រឈមដល់សេដ្ឋកិច្ចដូចគ្នា ព្រោះមុននឹងគេចូលមកវិនិយោគ គេច្បាស់ជាត្រូវមើលលើតម្លៃអគ្គិសនី ជាពិសេសការវិនិយោគលើវិស័យឧស្សាហកម្មធន់ធ្ងន់ ដែលត្រូវការប្រើប្រាស់ភ្លើងអគ្គិសនីច្រើន។»
ដំណោះស្រាយសម្រាប់បញ្ហានេះ បើតាមកញ្ញាគឺ ត្រូវផ្ទេរថាមពលស្អាតចូលក្នុងបណ្ដាញអគ្គិសនីឱ្យ បានកាន់តែច្រើន។
កញ្ញាបន្តថា៖
«កាលពីមុនយើងមានការផ្ទេរថាមពលចេញពីរោងចក្រវារីអគ្គិសនីច្រើន ប៉ុន្តែពេលនេះ ការប្រើប្រាស់សូឡាមានការកើនឡើង ប៉ុន្តែក៏នៅក្នុងកម្រិតតិចតួចនៅឡើយ។ យ៉ាងណាក៏ដោយ រឿងនេះត្រូវការធ្វើម្ដងមួយជំហានៗ មិនអាចធ្វើបានត្រឹមរយៈពេល១ឆ្នាំ ២ឆ្នាំនោះទេ។»
កញ្ញាបន្តគូសបញ្ជាក់ថា ប្រសិនបើកម្ពុជាអាចសម្រេចបាននូវការប្រើប្រាស់ថាមពលស្អាត ១០០% នោះកម្ពុជានឹងចំណេញទាំងបរិស្ថាន ចំណេញទាំងសេដ្ឋកិច្ច៕
Account
Security
Favourite Content