សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី Oil Price បានរាយការណ៍ថា តម្លៃប្រេងបានឡើងថ្លៃ ១ ភាគរយ បន្ទាប់ពីមានការវាយប្រហារគ្នារវាងអ៊ីស្រាអែល និងអ៊ីរ៉ង់កាលពីដើមខែតុលានេះ។
ទន្ទឹមនឹងនេះ តម្លៃប្រេងឆៅម៉ាក Brent បានឡើងថ្លៃ ១ ភាគរយ ឬ ៧៧,១១ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate បានឡើងថ្លៃ ០,៨ ភាគរយ ឬ ៧៣,៨៥ ដុល្លារក្នុងមួយបារ៉ែល។ តម្លៃប្រេងម៉ាកទាំងពីរបានឡើងថ្លៃបន្ទាប់ពីអ៊ីរ៉ង់បានបាញ់មីស៊ីលជាង ១៨០ គ្រាប់ទៅលើអ៊ីស្រាអែលកាលពីថ្ងៃទី ១ ខែតុលា កន្លងទៅនេះ។ អ៊ីស្រាអែលបានគំរាមសងសឹកដោយជំរុញឱ្យមានការព្រួយបារម្ភពីការរំខានដល់លំហូរប្រេង និងឧស្ម័នពីមជ្ឈិមបូព៌ាដែលជាតំបន់សម្បូរថាមពល។ ក្នុងកម្រិតប្រចាំឆ្នាំ តម្លៃប្រេងសកលបានកើនឡើង ៩ ភាគរយរួចទៅហើយ ខណៈដែលអ្នកជំនាញបានព្រមានថា ជម្លោះទ្រង់ទ្រាយធំរវាងអ៊ីស្រាអែល និងអ៊ីរ៉ង់អាចប៉ះពាល់ដល់ការផ្គត់ផ្គង់ថាមពលអន្តរជាតិ និងប៉ះពាល់ដល់សេដ្ឋកិច្ចពិភពលោកទាំងមូល។
ក្នុងពេលជាមួយគ្នានេះដែរ របាយការណ៍ប្រព័ន្ធផ្សព្វផ្សាយរបស់អ៊ីស្រាអែលបានបង្ហាញថា អ៊ីស្រាអែលអាចកំណត់គោលដៅទីតាំងនុយក្លេអ៊ែរ និងកន្លែងផលិតប្រេង ឬប្រេងរបស់អ៊ីរ៉ង់។ ទន្ទឹមនឹងនេះ ប្រធានាធិបតីសហរដ្ឋអាម៉េរិក លោក Joe Biden បានព្រមានអ៊ីស្រាអែលពីការវាយលុកទីតាំងប្រេងនៅក្នុងប្រទេសអ៊ីរ៉ង់ ដែលជាប្រទេសផលិតធំបំផុតមួយរបស់ពិភពលោក។ អ៊ីរ៉ង់បានព្រមានថា ការវាយប្រហារណាមួយមកលើហេដ្ឋារចនាសម្ព័ន្ធរបស់ខ្លួន ពួកគេនឹងឆ្លើយតបទៅវិញកាន់តែខ្លាំង។
នៅក្នុងព្រឹត្តិការណ៍នេះមានការវិភាគថា ប្រសិនបើអ៊ីស្រាអែលធ្វើការវាយប្រហារដ៏ធំមួយប្រឆាំងនឹងកន្លែងផលិតប្រេង ឬឧស្ម័នរបស់អ៊ីរ៉ង់ ទីក្រុងតេអេរ៉ង់អាចដាក់សម្ពាធលើច្រកឆ្លងកាត់សំខាន់ៗដូចជាច្រកសមុទ្រ Hormuz ជាដើម ដែលជាច្រើនឆ្នាំមកហើយ អ៊ីរ៉ង់បានគំរាមកំហែងបិទច្រកសមុទ្រ Hormuz ជាផ្លូវដឹកជញ្ជូនប្រេងមួយភាគប្រាំរបស់ពិភពលោក។
លោក Neil Quilliam អ្នកជំនាញខាងគោលនយោបាយថាមពល និងភូមិសាស្ត្រនយោបាយនៅ Chatham House លើកឡើងថា ច្រកសមុទ្រ Hormuz មានសារៈសំខាន់ចំពោះសេដ្ឋកិច្ចពិភពលោក។ សូម្បីតែប្រទេសកាតា ដែលជាប្រទេសផលិតឧស្ម័នធម្មជាតិដ៏ធំបំផុតមួយរបស់ពិភពលោក ក៏ប្រើប្រាស់ច្រកសមុទ្រ Hormuz សម្រាប់ការនាំចេញរបស់ខ្លួនផងដែរ។ គេកំពុងព្រួយបារម្ភថា ប្រសិនបើអ៊ីរ៉ង់ត្រូវបានវាយប្រហារដោយអ៊ីស្រាអែល នោះវាអាចនឹងប៉ះពាល់ដល់ប្រតិបត្តិការប្រេងនៅក្នុងប្រទេសជិតខាងរួមមាន អ៊ីរ៉ាក់ គុយវ៉ែត អារ៉ាប់រួម អារ៉ាប៊ីសាអូឌីត និងអ៊ីរ៉ង់ សុទ្ធសឹងតែជាប្រទេសផលិតប្រេងច្រើនជាងគេលើពិភពលោក។ លោក Quilliam យល់ឃើញថា អ៊ីស្រាអែលទំនងជាវាយប្រហារគោលដៅដែលប៉ះពាល់ដល់សេដ្ឋកិច្ចអ៊ីរ៉ង់ជាជាងប៉ះពាល់ដល់ទីផ្សារប្រេងពិភពលោក។
អ្នកជំនាញបាននិយាយថា ទោះបីជាមានការរំខានខ្លាំងដល់លំហូរប្រេង និងឧស្ម័នពីមជ្ឈិមបូព៌ាដោយសារជម្លោះ ប៉ុន្តែវានឹងមិនធ្វើឱ្យសេដ្ឋកិច្ចពិភពលោកធ្លាក់ចុះទាំងស្រុងនោះទេ ដោយសារតែការកើនឡើងនៅសហរដ្ឋអាមេរិកក្នុងនាមជាអ្នកផ្គត់ផ្គង់ប្រេង និងឧស្ម័នដ៏សំខាន់ ក៏ដូចជាការថយចុះនៃការពឹងផ្អែកជាសកលលើឥន្ធនៈហ្វូស៊ីល។ យ៉ាងណាមិញ ការរំខានដល់លំហូរប្រេង និងឧស្ម័នពីមជ្ឈិមបូព៌ានឹងមាន ឥទ្ធិពលលើសេដ្ឋកិច្ចចិន ខណៈដែលទីក្រុងប៉េកាំងបាននាំចូលប្រេងប្រមាណ ១,៥ លានបារ៉ែលក្នុងមួយថ្ងៃពីប្រទេសអ៊ីរ៉ង់ ដែលស្មើនឹង ១៥ ភាគរយនៃការនាំចូលប្រេងរបស់ខ្លួនពីតំបន់មជ្ឈីមបូព៌ា៕
Account
Security
Favourite Content