សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងទៅតាមប្រភពពី Oil Price បានរាយការណ៍ថា ការកាត់បន្ថយផលិតកម្មប្រេងរបស់ក្រុមប្រទេសផលិតប្រេង OPEC បានបណ្តាលឱ្យតម្លៃប្រេងឡើងថ្លៃដល់ ៨៥ ដុល្លារក្នុងមួយបារ៉ែល។
ថ្មីៗនេះ ក្រុមប្រទេសផលិតប្រេង OPEC កំពុងផលិតប្រេងតិចជាងមុន ដោយសារអារ៉ាប៊ីសាអូឌីតស្ម័គ្រចិត្តកាត់បន្ថយការផលិត និងផ្អាកការផ្ទុកប្រេងឆៅនៅស្ថានីយ Forcados ប្រទេសនីហ្សេរីយ៉ាដោយសារហានិភ័យលេចធ្លាយ។ មូលហេតុនេះបានបណ្តាលឲ្យតម្លៃប្រេងឡើងថ្លៃ ដោយតម្លៃប្រេងម៉ាក Brent ឡើងថ្លៃដល់ ៨៥ ដុល្លារក្នុងមួយបារ៉ែល ខណៈដែល WTI ឡើងថ្លៃ ៨២ ដុល្លារក្នុងមួយបារ៉ែល។
មិនត្រឹមតែប៉ុណ្ណោះ អារ៉ាប៊ីសាអូឌីតមានបំណងចង់ឲ្យតម្លៃប្រេងឡើងថ្លៃដល់ ៩០ ដុល្លារក្នុងមួយបារ៉ែល ដើម្បីបន្តផែនការចំណាយលើវិស័យសាធារណៈរបស់ខ្លួនសម្រាប់បង្កើតកម្មវិធី Vision 2030 ។ វាក៏អាស្រ័យលើរយៈពេលដែលអារ៉ាប៊ីសាអូឌីតប្រកាន់ខ្ជាប់នូវការកាត់បន្ថយដោយស្ម័គ្រចិត្តផងដែរ ដោយសារការធ្លាក់ចុះនៃតម្លៃប្រេងបានធ្វើឲ្យផលិតផលក្នុងស្រុកសរុប (GDP) របស់ខ្លួនក្នុងត្រីមាសទីពីរនេះធ្លាក់ចុះ។ ដូច្នោះហើយការឡើងថ្លៃតម្លៃប្រេងប្រហែលអាចជម្រុញឲ្យសេដ្ឋកិច្ចអារ៉ាប៊ីសាអូឌីតងើបឡើងវិញ។ ស្របពេលដែលអារ៉ាប៊ីសាអូឌីតកំពុងកាត់បន្ថយការផលិត ប្រទេសដែលជាសមាជិកដូចជា នីហ្សេរីយ៉ា និងអង់ហ្គោឡាមិនអាចផលិតបានច្រើនដូចទៅនឹងកូតាដែល OPEC បានកំណត់នោះទេ ហើយទិន្នផលប្រេងរបស់ប្រទេសលីប៊ីត្រូវបានបង្អាក់ ខណៈដែលកំណើនផលិតកម្មនៅអាមេរិកក៏កំពុងធ្លាក់ចុះផងដែរ។
យោងតាមប្រភពដដែលព្យាករណ៍ថា តម្លៃប្រេងអាចឡើងថ្លៃដល់ ១០០ ដុល្លារក្នុងមួយបារ៉ែលនៅចុងឆ្នាំនេះ ប្រសិនបើការកាត់បន្ថយផលិតកម្មនៅតែបន្ត ខណៈដែលស្តុកប្រេងឆៅនៅក្នុងតំបន់មួយចំនួនកំពុងធ្លាក់ចុះ។ អ្នកវិភាគមកពី JP Morgan បាននិយាយថា កាលពីមុន កម្រិតស្តុកប្រេង និងឥន្ធនៈសកលមិនមានផលប៉ះពាល់ច្រើនលើទីផ្សារតម្លៃប្រេងអន្តរជាតិទេ។ ឥឡូវនេះ វាត្រូវបានប៉ះពាល់យ៉ាងខ្លាំងដោយសារតែការដាក់ទណ្ឌកម្មរបស់លោកខាងលិចលើប្រទេសរុស្ស៊ី ដែលធ្វើឲ្យប្រេង និងឥន្ធនៈភាគច្រើនកំពុងត្រូវបានជួញដូរជារូបិយប័ណ្ណផ្សេងក្រៅពីប្រាក់ដុល្លារអាមេរិក។
ទន្ទឹមនឹងនេះ ទីភ្នាក់ងារថាមពលអន្តរជាតិ IEA ប៉ាន់ប្រមាណថា កំណើនតម្រូវការប្រេងប្រចាំឆ្នាំនេះឡើងដល់ ២,២ លានបារ៉ែលជារៀងរាល់ថ្ងៃ ខណៈដែល OPEC មើលឃើញថាតម្រូវការប្រេងឡើងដល់ ២,៤ លានបារ៉ែលក្នុងមួយថ្ងៃ។ លើសពីនេះ កំណើននៃតម្រូវការប្រេងត្រូវបានជំរុញដោយចិន ដែលជាប្រទេសនាំចូលប្រេងធំបំផុតរបស់ពិភពលោក និង មានអំណាចទៅលើតម្លៃប្រេងផងដែរ។ ប្រសិនបើតម្លៃប្រេងឡើងថ្លៃខ្ពស់ពេក នោះទីក្រុងប៉េកាំងអាចនឹងចាប់ផ្តើមលក់ចេញនូវប្រេងឆៅដែលខ្លួនបានផ្ទុក។ ទន្ទឹមនឹងនេះដែរ ប្រទេសរុស្ស៊ីកំពុងខួងយកប្រេង ៦,៦ ភាគរយដែលខ្ពស់ជាងការរំពឹងទុក ដែលវាបង្ហាញពីលទ្ធភាពនៃការផ្គត់ផ្គង់បន្ថែមទៀតជាពិសេសការដឹកជញ្ជូនប្រេងរបស់រុស្ស៊ីទៅកាន់ប្រទេសចិន៕
Account
Security
Favourite Content