សៀមរាប ៖ ការជិះរទេះគោ មើលភូមិអ្នកស្រុក និងជីវភាពរស់នៅរបស់ប្រជាជន បានក្លាយជាគោលដៅទេសចរណ៍យ៉ាងសំខាន់របស់ទេសចរបរទេស។
ការជិះរទេះគោនេះពិតជាប្លែក ដូច្នេះភ្ញៀវទេសចរនិយមជិះរទេះគោ ព្រោះបានទស្សនាពីភូមិឋានក្នុងតំបន់អង្គរ និងជីវភាពរស់នៅរបស់ប្រជាជន ខណៈដែលរទេះគោ និងរទេះក្របី កំពុងចូលរួមយ៉ាងសកម្មក្នុងសហគមន៍ទេសចរណ៍នៅក្នុងឃុំប្រដាក ខេត្តសៀមរាប។
លោក យស់ សា មគ្គុទេសក៍ទេសចរណ៍ថ្នាក់ជាតិប្រចាំខេត្តសៀមរាប និងប្រចាំសហគមន៍ទេសចរណ៍ភូមិប្រដាកបានឱ្យដឹងថា ៖ ប្រជាពលរដ្ឋនៅភូមិប្រដាក ក្នុងខេត្តសៀមរាប ប្រមាណជា ៩០ភាគរយ នៅតែប្រើប្រាស់រទេះគោ និងរទេះក្របី ហើយសំខាន់បំផុត រទេះគោ និងរទេះក្របី នៅទីនោះបានចូលរួមយ៉ាងសកម្ម និងយ៉ាងមានកិត្តិយស ក្នុងការដឹកជញ្ជូនភ្ញៀវទេចរជាតិ-អន្តរជាតិ និងបង្ហាញមុខមាត់ទៅកាន់ពិភពលោក។
ទេចរណ៍រទេះគោ និងរទេះក្របី គឺជាផ្នែកមួយនៃសហគមន៍ទេចរណ៍ព្រះដាក់ នៃខេត្តសៀមរាប ដែលនៅទីនោះមានផលិតផលទេចរណ៍ជាច្រើនត្រូវបានប្រជាពលរដ្ឋប្រកបជាប្រចាំថ្ងៃដូចជា ការផលិតស្ករត្នោត នំបញ្ចុក នំអាកោត្នោត ទឹកត្នោត ធ្វើធូប កន្ត្រក ត្បាញក្រមា និងការផលិតខ្លុយជាដើម ។
លោក យស់ សា បានបន្ថែមថា សហគមន៍ទេសចរណ៍រទេះគោបានចាប់ផ្ដើមកាលពីឆ្នាំ២០០៩ ហើយនៅភូមិប្រដាកនេះមានប្រជាពលរដ្ឋប្រមាណជា ៣ ២៥០ គ្រួសារ ដែលក្នុងនោះ ប្រជាពលរដ្ឋភាគច្រើននៅតែប្រើរទេះគោ និងរទេះក្របី រហូតដល់ប្រមាណជា ៩០ ភាគរយ ចំណែកតម្រូវការបច្ចុប្បន្ននេះ មានរទេះគោ និងរទេះក្របី ប្រមាណជា ៥០ គ្រឿង កំពុងប្រតិបត្តិការបម្រើសេវាដឹកភ្ញៀវទេសចរទាំងជាតិ និងអន្តរជាតិ ជាលក្ខណៈវិលជុំឆ្លាស់ ឬ ចែកវេនគ្នា ហើយចំនួននេះ សង្ឃឹមថានឹងកើនឡើងថែមទៀតជាបន្តបន្ទាប់ ទៅតាមស្ថានភាពវិស័យទេចរណ៍ ៕