ភ្នំពេញ ៖ប្រាក់ចំណូលពីការលក់សំបុត្រចូលទស្សនារមណីយអង្គរ បានកើនលើស ៤០ លានដុល្លារអាមេរិកក្នុងរយៈពេល១១ខែ នៃឆ្នាំ២០២៥ ។នេះបើតាមរបាយការណ៍របស់គ្រឹះស្ថានអង្គរ (Angkor Enterprise) ដែលចេញផ្សាយនាថ្ងៃទី១ខែធ្នូ។

ទិន្នន័យផ្លូវការ បង្ហាញថាចាប់ពីខែមករា ដល់ខែវិច្ឆិកាឆ្នាំ២០២៥ តំបន់បេតិកភណ្ឌពិភពលោករបស់អង្គការយូណេស្កូនេះបានស្វាគមន៍ភ្ញៀវអន្តរជាតិចំនួន ៨៦៧,១៩៥នាក់ ដែលបង្កើតប្រាក់ចំណូលបានចំនួន ៤០,៤៨ លានដុល្លារអាមេរិក។ តួលេខ​នេះ​បង្ហាញ​ពី​ការ​ថយ​ចុះ​ចំនួនភ្ញៀវប្រមាណ​៣​ភាគរយ ​ទាំង​បរិមាណ​ភ្ញៀវ​ទេសចរ និង​ចំណូល​ធៀប​នឹង​រយៈពេល​ដូច​គ្នា​ក្នុង​ឆ្នាំ​២០២៤។

របាយការណ៍នេះ បានគូសបញ្ជាក់ពីការធ្លាក់ចុះ នៅក្នុងខែវិច្ឆិកា ដោយចំនួនភ្ញៀវដែលមកទស្សនា ជាភ្ញៀវបរទេស បានធ្លាក់ចុះមក ១០១,៦៧៧  ប្រមាណ ១៨ភាគរយ ធៀបនឹងខែវិច្ឆិកា ឆ្នាំ២០២៤។ ប្រាក់ចំណូលសម្រាប់ខែវិច្ឆិកា មានចំនួន៤.៩ លានដុល្លារអាមេរិក ធ្លាក់ចុះជាង១៧ ភាគរយធៀបនឹងឆ្នាំ២០២៤។

សេចក្តីប្រកាសពត៌មានរបស់គ្រឹះស្ថានអង្គរ បានឱ្យដឹងថា៖ សម្រាប់ចំនួនភ្ញៀវទេស​ចរបរទេស ដែលបានចូលទស្សនារមណីយដ្ឋានអង្គរ ក្នុងរយៈពេលជិត១ឆ្នាំនេះ មានចំនួនជិត៨៧ម៉ឺននាក់ ធ្លាក់ចុះ៣.៤៧%។ ការលក់សំបុត្រជូនភ្ញៀវ គឺបានទទួលស្វាគមន៍ភ្ញៀវអន្តរជាតិចំនួន ៨៦៧,១៩៥នាក់ ដែលបានចូលទស្សនារមណីដ្ឋានអង្គរ ។ ថវិកាដែលលក់សំបុត្របាននេះ ត្រូវបានឧបត្ថម្ភចូលមូលនិធិគន្ធបុប្ផាកម្ពុជា ចំនួនជាង១.៧លានដុល្លារផងដែរ ក្នុងរយៈពេល១១ខែនេះ។

គ្រឹះស្ថានអង្គរ ក៏បានឱ្យដឹងដែរថា៖ទេសចរបរទេសចំនួន ២៨៩៧ នាក់ បានទិញបណ្ណចូលទស្សនាប្រាសាទកោះកេរ នៅខែវិច្ឆិកាឆ្នាំ២០២៥ និងរកចំណូលបាន៤៣,៤៥៥ ដុល្លារ។ សរុបចំណូលលក់ប័ណ្ណនៅប្រាសាទកោះកេរ រយៈពេល១១ខែមានចំនួន ១៨,៤៨១នាក់ ស្មើនឹង២៧៧,២១៥ ដុល្លារ។

ចំណូលពីការលក់សំបុត្រនៅប្រាសាទបេងមាលា ខែវិច្ឆិកាមានចំនួន២,២៣២ នាក់ ស្មើ២២,៣២០ ដុល្លារ។សរុបចំណូលលក់សំបុត្រនៅប្រាសាទបេងមាលា រយៈពេល១១ ខែឆ្នាំ២០២៥ ចំនួន១៤,៦៩៩នាក់ ស្មើនឹង១៤៦,៩៩០ដុល្លារ។ចំណូលពីការលក់សំបុត្រនៅភ្នំក្បាលស្ពាន ខែវិច្ឆិកាមានចំនួន២៨១នាក់ស្មើនឹង១,៤​០៥ដុល្លារ។ សរុបចំណូលលក់សំបុត្រនៅភ្នំក្បាលស្ពាន រយៈពេល១១ ខែឆ្នាំ២០២៥ មានចំនួន១៣១២  នាក់ស្មើ៦,៥៦០ ដុល្លារ។

ចំពោះចំណូលពីការលក់សំបុត្រទូក ខែវិច្ឆិកាក្នុងឆ្នាំ២០២៥ មានចំនួនសរុប១០២៥០៩ ដុល្លារ។ ក្នុងនោះសេវាឈ្នួលទូកសរុបចំនួន២,១៥៧ ទូក ស្មើនឹង ៤៥,៨៨៣ ដុល្លារ។សរុបចំណូលលក់សំបុត្រទូករយៈពេល ១១ខែ ក្នុងឆ្នាំ២០២៥ មានចំនួនស្មើនឹង១,១៦២,៨១០ ដុល្លារ។ សេវាឈ្នួលទូកសរុបចំនួន ២៤,៥២១ ទូកស្មើនឹង៥២១,៥២៦ ដុល្លារ៕