សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កម្ពុជា គឺជាគោលដៅដ៏ទាក់ទាញបំផុតមួយក្នុងតំបន់សម្រាប់ក្រុមវិនិយោគិនក្រៅស្រុក ដោយសារមើលឃើញគុណសម្បត្តិសំខាន់ៗជាច្រើនដូចជា កំណើនសេដ្ឋកិច្ចរឹងមាំ ទីតាំងភូមិសាស្រ្ត បរិយាកាសវិនិយោគអំណោយផល ធនធានធម្មជាតិដ៏សម្បូរបែប ទីផ្សារការងារប្រកួតប្រជែង កិច្ចព្រមព្រៀងពាណិជ្ជកម្មជាយុទ្ធសាស្ត្រ ការអភិវឌ្ឍន៍ហេដ្ឋារចនាសម្ព័ន្ធ ក្របខ័ណ្ឌច្បាប់គាំទ្រ និងស្ថិរភាពសង្គម រួមទាំងភាពចាស់ទុំផ្នែកនយោបាយផងដែរ។
យោងតាមរបាយការណ៍ដែលមានចេញផ្សាយនៅក្នុងសៀវភៅស្តីពីការវិនិយោគនៅកម្ពុជាសម្រាប់ឆ្នាំ២០២៣បានបង្ហាញថា គណកម្មការវិនិយោគកម្ពុជាហៅកាត់ថា CIB នៃក្រុមប្រឹក្សាអភិវឌ្ឍកម្ពុជាហៅកាត់ថា CDC និងក្រុមប្រឹក្សាតំបន់សេដ្ឋកិច្ចពិសេស (SEZB) កាលពីឆ្នាំ២០២២បានអនុម័តគម្រោងវិនិយោគចំនួន ១៨៦ ដែលមានតម្លៃសរុប ៤,០៣ ពាន់លានដុល្លារ ហើយក្នុងនោះគេសង្កេតឃើញវិនិយោគិនបរទេសសំខាន់ៗរួមមាន ចិន ថៃ និងជប៉ុន បានផ្តោតសំខាន់ទៅលើការវិនិយោគលើវិស័យកសិកម្ម ផលិតកម្ម ទេសចរណ៍ និងហេដ្ឋារចនាសម្ព័ន្ធ។
របាយការណ៍ដដែលបានបង្ហាញដែរថា កាលពីឆ្នាំមុន ការវិនិយោគក្នុងស្រុកមានចំនួន ៥៣,៥៤ភាគរយ នៃការវិនិយោគសរុប ខណៈដែលការវិនិយោគផ្ទាល់ពីបរទេស ឬហៅកាត់ថា FDI មានចំនួន ៤៦,៤៦ភាគរយ។ ប្រទេសចិនឈរក្នុងនាមជាអ្នកវិនិយោគបរទេសដ៏សំខាន់មួយដែលបានរួមចំណែកដល់ទៅ៤២នៃចំនួនវិនិយោគសរុប។ ប្រទេសថៃ និងជប៉ុនជាប្រភពវិនិយោគបរទេសធំទីពីរ និងទីបី ជាពិសេសតាមរយៈសកម្មភាពក្នុងវិស័យទេសចរ។
ដោយឡែកបើយើងមើលរបាយការណ៍នៃការនាំចេញរបស់កម្ពុជាវិញ សហរដ្ឋអាមេរិកស្ថិតនៅក្នុងចំណាត់ថ្នាក់គោលដៅកំពូលរបស់កម្ពុជាពោលគឺក្នុងអត្រាដល់ទៅ ៤៣,៦ភាគរយនៃការនាំចេញសរុប និងតាមពីក្រោយដោយសហភាពអឺរ៉ុប ១៩,៧ភាគរយ។ គិតត្រឹមតែខែមករាដល់ខែវិច្ឆិកាឆ្នាំ ២០២២ប៉ុណ្ណោះ ការនាំចេញរបស់កម្ពុជាទៅកាន់សហរដ្ឋអាមេរិកបានកើនឡើងចំនួន ៤២ភាគរយបើធៀបនឹងឆ្នាំចាស់ ឬប្រមាណជា ១១ ៣៩១ពាន់លានដុល្លារ។
ទំហំពាណិជ្ជកម្មកម្ពុជា-អាមេរិក មានការកើនឡើងស្ទើររៀងរាល់ឆ្នាំដោយក្នុងនោះ កាលពីឆ្នាំ២០២១ ទំហំពាណិជ្ជកម្ម កម្ពុជា-អាមេរិក មានទឹកប្រាក់ជាង ៧ ៨២៦លានដុល្លារ ហើយកម្ពុជានាំចេញ បាន ៧ ៤៩០លានដុល្លារអាមេរិក ខណៈអាមេរិក នាំចូលមកកម្ពុជាវិញ មានតែជាង៣៣៦លានដុល្លារប៉ុណ្ណោះ។ ការនាំចេញរបស់កម្ពុជាភាគច្រើនទៅកាន់ទីផ្សារអន្តរជាតិរួមមានសម្លៀកបំពាក់ ស្បែកជើង កង់ និងគ្រឿងសង្ហារិម។
គួរឲ្យដឹងដែរថា កន្លងមកសម្តេចតេជោ ហ៊ុន សែន បានមានប្រសាសន៍ថា សេដ្ឋកិច្ចរបស់ប្រទេសត្រូវបានរំពឹងថានឹងកើនឡើង ៥,៦ភាគរយនៅក្នុងឆ្នាំ២០២៣នេះធៀបទៅនឹងការកើនឡើងពីឆ្នាំ២០២២មានត្រឹមតែ ៥,២ភាគរយដែលការនាំចេញសំខាន់ៗរួមមានយានយន្ត ស្បែកជើង កៅស៊ូធម្មជាតិ និងត្រី។ ដោយសារកម្ពុជាអាចទទួលបានអត្ថប្រយោជន៍ជាច្រើនដូចជាពន្ធអនុគ្រោះពាណិជ្ជកម្ម និងកិច្ចព្រមព្រៀងពាណិជ្ជកម្មសេរីថ្នាក់តំបន់ និងអន្តរជាតិជាច្រើនផង បូករួមទាំងការវិនិយោគដ៏មានសក្តានុពលរបស់ចិន និងការនាំចេញទៅទីផ្សារដ៏សំខាន់របស់អាមេរិកផង បានជួយរុញឲ្យកម្ពុជាអាចស្រូបទាញយកចំណូលយ៉ាងច្រើនជារៀងរាល់ឆ្នាំគាំទ្រដល់កំណើនសេដ្ឋកិច្ចជាតិកាន់តែរឹងម៉ាំ ជាពិសេសនៅក្នុងគ្រាដែលរាជរដ្ឋាភិបាលអាណត្តិថ្មីអាណត្តិទី៧ដំណើរការជាផ្លូវការក្នុងពេលឆាប់ៗខាងមុខនេះ ៕
Account
Security
Favourite Content