សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា តាមរយៈធនាគារអភិវឌ្ឍន៍ជនបទ និងកសិកម្ម (ARDB) រាជរដ្ឋាភិបាលបានត្រៀមផ្តល់កម្ចី៣០លានដុល្លារ ដែលកញ្ចប់ថវិកានេះធ្វើឡើងក្នុងគោលដៅលើកស្ទួយខ្សែច្រវាក់កែច្នៃស្វាយចន្ទីក្នុងស្រុក ដើម្បីកាត់បន្ថយការនាំចេញគ្រាប់ចន្ទីស្រស់ទៅបរទេសដោយការប្រមូលទិញគ្រាប់ស្វាយចន្ទីសម្រាប់រដូវកាលឆ្នាំ២០២៤។
ឯកឧត្តម ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានថ្លែងនៅក្នុងវេទិកាសាធារណៈស្តីពីការគ្រប់គ្រងសេដ្ឋកិច្ច និងច្បាប់ថវិកាឆ្នាំ២០២៤ កាលពីពេលថ្មីៗនេះថា រាជរដ្ឋាភិបាល បានរៀបចំនូវយន្តការសំខាន់ជាច្រើនក្នុងការជួយគាំទ្រ និងលើកទឹកចិត្តដល់សហគ្រាសធុនតូច និងមធ្យម (SME) ដើម្បីជំរុញឱ្យវិស័យនេះឱ្យមានភាពរឹងមាំ ដោយបច្ចុប្បន្នធនាគារអភិវឌ្ឍន៍ជនបទ និងកសិកម្ម បានត្រៀមកញ្ចប់ថវិកាប្រមាណ៣០លានដុល្លារ សម្រាប់ផ្តល់កម្ចីលើការប្រមូលទិញគ្រាប់ស្វាយចន្ទីក្នុងឆ្នាំ២០២៤។
ឯកឧត្តម រដ្ឋលេខាធិការ បានគូសបញ្ជាក់ថា សម្រាប់ការអភិវឌ្ឍន៍វិស័យដ៏មានសក្តានុពលនេះ រាជរដ្ឋាភិបាលបានបញ្ចេញទុនជាបន្តបន្ទាប់ ដើម្បីចូលរួមលើកកម្ពស់ផលិតកម្មដំណាំស្វាយចន្ទី និងជំរុញការនាំចេញគ្រាប់ស្វាយចន្ទីកែច្នៃទៅកាន់ទីផ្សារអន្តរជាតិ តាមរយៈធនាគារអភិវឌ្ឍន៍ជនបទ និងកសិកម្ម និងធនាគារសហគ្រាសធុនតូច និងមធ្យម(SME Bank) ។
ឯកឧត្តម ផាន់ ផល្លា បានបញ្ជាក់ថា សម្រាប់វិស័យស្វាយចន្ទី កន្លងមកនេះ ARDB បានផ្តល់កម្ចីប្រមាណ៣០លានដុល្លារ ហើយក៏បានត្រៀម (ផ្តល់កម្ចី) ៣០លានដុល្លារទៀត លើការប្រមូលទិញគ្រាប់ស្វាយចន្ទីនៅក្នុងរដូវកាលនេះ។ ដោយឡែក ធនាគារសហគ្រាសធុនតូច និងមធ្យម ក៏ទទួលបានកញ្ចប់ថវិកាពីរដ្ឋាភិបាលប្រមាណ១០០លានដុល្លារ សម្រាប់ផ្តល់ទៅឱ្យសហគ្រាសធនតូច និងមធ្យម ដើម្បីដោះស្រាយបញ្ហាប្រឈមក្នុងខ្សែច្រវ៉ាក់ផលិតកម្មស្វាយចន្ទី ព្រមទាំងជួយលើកកម្ពស់វិស័យឧស្សាហកម្មកែច្នៃស្វាយចន្ទីនៅកម្ពុជាឱ្យរីកចម្រើន។
ឯកឧត្តម ផាន់ ផល្លា បញ្ជាក់បន្ថែមថា ៖
« យើងអនុញ្ញាតឱ្យអ្នកដែលមានបំណងចង់បង្កើតសិប្បកម្ម ឬសហគ្រាសកែច្នៃស្វាយចន្ទីនេះ គឺចាប់ពីកែច្នៃចន្ទីឡើងទៅ អាចមកសុំកម្ចីបានពីធនាគារសហគ្រាសធុនតូច និងមធ្យមបាន ហើយហិរញ្ញប្បទានដែលផ្ដល់ដោយធនាគារអភិវឌ្ឍន៍ជនបទ និងកសិកម្ម និងធនាគារសហគ្រាសធុនតូច និងមធ្យម មានអត្រាការប្រាក់ត្រឹម ៥,៥ភាគរយក្នុងមួយឆ្នាំ ឬស្មើ ០,៤១ ភាគរយក្នុងមួយខែប៉ុណ្ណោះ»។
តាមរយៈការត្រៀមខ្លួនរបស់សមាគមស្វាយចន្ទីកម្ពុជា (ស.ស.ក) និង SME Bank បានបង្ហាញពីក្ដីរំពឹងខ្ពស់ថានឹងអាចទាក់ទាញបាននូវវិនិយោគិនក្នុងស្រុក និងបរទេសបន្ថែមទៀតក្នុងការវិនិយោគលើការកែច្នៃបង្កើតរោងចក្រស្វាយចន្ទីនៅកម្ពុជានាពេលខាងមុខ និងដើម្បីលើកស្ទួយវិស័យកែច្នៃស្វាយចន្ទីនៅកម្ពុជា ក៏ដូចជាជំរុញការនាំចេញគ្រាប់ស្វាយចន្ទីកែច្នៃទៅកាន់ទីផ្សារអន្តរជាតិ ធនាគារសហគ្រាសធុនតូច និងមធ្យម កម្ពុជា និងសមាគមស្វាយចន្ទីកម្ពុជា បាន និងកំពុងបន្តកសាងភាពជាដៃគូប្រកបដោយបរិយាបន្ន និងចីរភាព។
តាមរយៈកិច្ចសហប្រតិបត្តិការនេះ ម្ចាស់សហគ្រាសទាំងអស់ដែលជាសមាជិកនៃសមាគមស្វាយចន្ទីកម្ពុជា អាចស្នើសុំគម្រោងហិរញ្ញប្បទានប្រកបដោយលក្ខខណ្ឌអនុគ្រោះពីធនាគារសហគ្រាសធុនតូច និងមធ្យម កម្ពុជា ដើម្បីពង្រីកអាជីវកម្មរបស់ខ្លួន ជាមួយនឹងការបញ្ចុះអត្រាការប្រាក់ស្របតាមលក្ខខណ្ឌដៃគូសហការ។
សូមបញ្ជាក់ថា ឆ្នាំ២០២៣ កម្ពុជាផលិតគ្រាប់ស្វាយចន្ទីបានប្រមាណ ៦៥ម៉ឺនតោន។ ក្នុងចំណោមនោះមានគ្រាប់ស្វាយចន្ទី៦១,៨ម៉ឺនតោន បាននាំចេញ មានន័យថា គ្រាប់ស្វាយចន្ទីជាង៩០ភាគរយ បាននាំចេញក្នុងទម្រង់ជាគ្រាប់ចន្ទីឆៅមិនទាន់កែច្នៃ។
យោងតាមក្រសួងកសិកម្ម រុក្ខាប្រមាញ់ និងនេសាទ ព្រះរាជាណាចក្រកម្ពុជា មានផ្ទៃដីដាំដុះស្វាយចន្ទីប្រមាណ ៤៧២ ៩៤៦ ហិកតា ផ្តល់ទិន្នផលសរុប ៧០៩ ៤១៩ តោន ក្នុងឆ្នាំ ២០២៣។ នៅក្នុងវិស័យស្វាយចន្ទី គិតមកដល់បច្ចុប្បន្ននេះ កម្ពុជាមាន ៤២សហគ្រាស ក្នុងនោះជាសមាជិករបស់សមាគមមានចំនួន ៣៥សហគ្រាស។ រោងចក្រខ្នាតមធ្យម ដែលមានសមត្ថភាពផលិតគ្រាប់ចន្ទីឆៅបាន៧ពាន់តោន ក្នុងមួយឆ្នំាមានចំនួន៣ ស្ថិតនៅខេត្តកំពង់ចាម ខេត្តត្បូងឃ្មុំ និងនៅខេត្តព្រះវិហារ៕
Account
Security
Favourite Content