សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសអញ្ជើញប្រកាសដាក់ឱ្យអនុវត្តជាផ្លូវការនូវប្រព័ន្ធបញ្ជរតែមួយជាតិ នាព្រឹកថ្ងៃទី ០៧ ឧសភា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់អំពីសារៈសំខាន់នៃការពង្រឹងផ្នែករដ្ឋបាលរបស់ក្រសួង-ស្ថាប័ន ដើម្បីជំរុញភាពប្រកួតប្រជែងរបស់វិស័យឯកជន។ យ៉ាងណាមិញ ការដាក់ឱ្យអនុវត្តនូវប្រព័ន្ធបញ្ជរតែមួយជាតិនាពេលនេះ គឺបម្រើឱ្យគោលបំណងនៃការពង្រឹងសេវារដ្ឋបាលតាមរយៈការប្រើប្រាស់ប្រព័ន្ធបច្ចេកវិទ្យាឌីជីថល។
វត្តមាននៃប្រព័ន្ធបញ្ជរតែមួយជាតិនេះផងដែរ នឹងសម្រួលដល់ការរត់ឯកសាររបស់ប្រជាពលរដ្ឋ ជាពិសេសវិស័យឯកជនពីក្រសួងមួយទៅក្រសួងមួយទៀត មកនៅត្រឹមតែកន្លែងមួយដែលងាយស្រួល កាត់បន្ថយការចំណាយ និងចំណេញពេលវេលាបានច្រើនជាងមុន។
ក្នុងឱកាសខាងលើនេះដែរ សម្ដេចបានមានប្រសាសន៍ថា៖
« ដើម្បីឱ្យវិស័យឯកជនរបស់យើងរីកចម្រើន ប្រកួតប្រជែងបាននៅក្នុងពាណិជ្ជកម្ម គឺទាមទាររដ្ឋបាលមួយដែលមានប្រសិទ្ធភាព ហើយការការរៀបចំប្រព័ន្ធបញ្ជរតែមួយជាតិនេះ ស្ថិតក្នុងអភិក្រមនៃការរៀបផ្ទះរបស់យើងឱ្យមានលំដាប់លំដោយ។»
បើតាមប្រសាសន៍របស់សម្ដេច ប្រព័ន្ធបញ្ជរតែមួយជាតិនេះនឹងអាចកាត់បន្ថយភាពស្មុគស្មាញ បង្កើនប្រសិទ្ធភាពនៃការចាប់យកបច្ចេកវិទ្យាឌីជីថល ជាជាងប្រជាពលរដ្ឋត្រូវធ្វើដំណើរឆ្ងាយដើម្បីចាំយកឯកសារពីស្ថាប័នដែលកកស្ទះ មកជាការអនុវត្តតាមឌីជីថល។ រីឯស្ថាប័នរដ្ឋក៏មិនចាំបាច់ពង្រីកទីតាំងធំពេកដែរ។
សម្រាប់កម្ពុជា នេះជាការត្រៀមខ្លួនឱ្យរួចរាល់ដើម្បីឆ្លើយតបទៅនឹងវិបត្តិណាមួយដែលអាចកើតឡើងជាយថាហេតុ តាមរយៈការជំរុញការកែទម្រង់ឱ្យកាន់តែស៊ីជម្រៅ និងកាន់តែខ្លាំងក្លាឡើង សំដៅលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់នៃសេដ្ឋកិច្ច និងសង្គមជាតិ។
សម្ដេចបានដាក់ក្ដីរំពឹងយ៉ាងមុតមាំថា ប្រព័ន្ធបញ្ជរតែមួយជាតិនឹងក្លាយជាគំរូជោគជ័យមួយទៀតនៃការខិតខំប្រឹងប្រែងរួមគ្នារបស់ក្រសួងស្ថាប័ន នៃរដ្ឋាភិបាលដែលបានជំនះនូវការលំបាកទាំងឡាយក្នុងដំណើរការសម្របសម្រួលស្ថាប័ន។
ការធ្វើការរួមគ្នាប្រកបដោយជោគជ័យនេះក៏បានហុចផលដល់វិស័យឯកជន និងទទួលបានផលប្រ យោជន៍ជាច្រើនពីប្រព័ន្ធបញ្ចរតែមួយជាតិរួមមាន៖ ចំណេញពេល កាត់បន្ថយចំណាយដោយមិនចាំ បាច់រត់ការពីស្ថាប័នមួយទៅមួយ៕
Account
Security
Favourite Content