ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅព្រឹកថ្ងៃទី៣០ ខែវិច្ឆិកា ឆ្នាំ២០២៣នេះ បានថ្លែងបញ្ជាក់ជាថ្មីថា គោលដៅចម្បងរបស់រាជរដ្ឋាភិបាលកម្ពុជា គឺការធានាសន្តិសុខ សន្តិភាព និងឯករាជ្យភាពថាមពលជាតិ។

សម្តេចធិបតី ហ៊ុន ម៉ាណែត ថ្លែងបែបនេះ ក្នុងឱកាសអញ្ជើញជាអធិបតីក្នុងពិធីបិទស្ទឹងសាងសង់ទំនប់វារីអគ្គិសនីស្ទឹងតាតៃលើ ស្ថិតក្នុងស្រុកថ្មបាំង ខេត្តកោះកុង នៅថ្ងៃទី៣០ ខែវិច្ឆិកា ឆ្នាំ២០២៣ ដែលការប្រកាសរបស់សម្តេចធិបតី ដើម្បីធានាបានទាំងគោលដៅអព្យាក្រឹត្យភាពកាបូនផង និងគោលដៅផ្គត់ផ្គង់ថាមពលប្រកបដោយគុណភាព, ស្ថិរភាព, ប្រសិទ្ធភាព និងមានថ្លៃសមរម្យផង និងប្រកាសបញ្ឈប់ការអភិវឌ្ឍរោងចក្រផលិតអគ្គិសនីដុតធ្យូងថ្ម និងពិនិត្យលទ្ធភាពដាក់ឱ្យរោងចក្រផលិតអគ្គិសនីដុតធ្យូងថ្មមានស្រាប់ បញ្ឈប់ដំណើរការមុនកាលកំណត់។

សម្តេច​តេ​ជោ ហ៊ុន ម៉ា​ណែ​ត បាន​លើកឡើងថា ពេលនេះ​មាន​ប្រជាពលរដ្ឋ​តិចតួច​ណាស់​ដែល​មិន​ប្រើប្រាស់​ភ្លើង​ ដូច្នេះហើយត្រូវបន្តមានសន្តិសុខថាមពល និងឯករាជ្យ ដើម្បីធានាការអភិវឌ្ឍន៍ប្រកបដោយចីរភាពរបស់ប្រទេសជាតិ។

“យើងមិនអាចពឹងផ្អែកលើអ្នកដទៃបានទេ សន្តិសុខថាមពលមានសារៈសំខាន់ណាស់សម្រាប់យើង។ ប្រសិនបើយើងមិនមានមធ្យោបាយផ្ទាល់ខ្លួនទេ យើងនឹងជួបគ្រោះថ្នាក់ ដូច្នេះយើងត្រូវប្រឹងប្រែងឱ្យអស់ពីលទ្ធភាព ដើម្បីធានាឱ្យបាននូវចំណុចនេះ ជាពិសេសដើម្បីអភិវឌ្ឍវិស័យនេះ មិនមែនគ្រាន់តែសាងសង់ទំនប់វារីអគ្គិសនីប៉ុណ្ណោះទេ»។ នេះបើតាមសម្តេចធិបតីបានបញ្ជាក់។

សម្តេចធិបតី ហ៊ុន ម៉ាណែត បានមានប្រសាសន៍ថា ៖

«រហូតមកដល់ពេលនេះ យើងបានកំណត់គោលដៅលើកកម្ពស់វិស័យអគ្គិសនី មិនត្រឹមតែសម្រាប់ប្រជាពលរដ្ឋដែលត្រូវការសាកថ្មទូរស័ព្ទប៉ុណ្ណោះទេ ប៉ុន្តែថែមទាំងអនុញ្ញាតឱ្យកូនៗរបស់ពួកគេបានសិក្សានៅពេលយប់ ធ្វើអាជីវកម្មកាន់តែងាយស្រួល ជំនួសឱ្យការប្រើប្រាស់ម៉ាស៊ីនភ្លើង និងការទិញអគ្គិសនីពី វិស័យឯកជន»។

សម្តេចធិបតី ហ៊ុន​ ម៉ាណែត បានឱ្យដឹងទៀតថា វិស័យថាមពលក្នុងពិភពលោកបច្ចុប្បន្ននេះ កំពុងនៅក្នុងរបត់ដ៏សំខាន់មួយ ដែលប្រទេសនីមួយៗមានភារកិច្ច មិនត្រឹមតែធានាឱ្យការផ្គត់ផ្គង់ថាមពលមានគុណភាព, ស្ថិរភាព, ប្រសិទ្ធភាព និងថ្លៃសមរម្យប៉ុណ្ណោះទេ, ប៉ុន្តែ ក៏ត្រូវធ្វើឱ្យវិស័យថាមពលឈានទៅរកអព្យាក្រឹត្យភាពកាបូន ដើម្បីដោះស្រាយបញ្ហាការប្រែប្រួលអាកាសធាតុរបស់ពិភពលោកផងដែរ។

សម្រាប់កម្ពុជា ដើម្បីធានាបានទាំងគោលដៅអព្យាក្រឹត្យភាពកាបូនផង និងគោលដៅផ្គត់ផ្គង់ថាមពលប្រកប​ដោយគុណភាព, ស្ថិរភាព, ប្រសិទ្ធភាព និងមានថ្លៃសមរម្យផង, កាលពីថ្ងៃទី១១ ខែតុលា ឆ្នាំ២០២៣កន្លងទៅ, សម្តេចក៏បានសម្រេច ប្រគល់ភារកិច្ចឱ្យក្រសួងរ៉ែ និងថាមពល ដឹកនាំ និងសម្របសម្រួលលើការងារអន្តរកាលវិស័យថាមពល រួមមាន៖

_ ជំរុញការអនុវត្តការងារប្រសិទ្ធភាពថាមពល ស្របតាមគោលនយោបាយជាតិស្តីពីប្រសិទ្ធភាពថាមពល ២០២២-២០៣០ ដែលរាជរដ្ឋាភិបាលបានអនុម័ត និងស្របទៅតាមផែនការសកម្មភាពដែលបានគ្រោង។

_ធ្វើការងារការទូតផ្នែកថាមពលបៃតង ដើម្បីទាក់ទាញការគាំទ្រ និងការផ្តល់ហិរញ្ញ-ប្បទានសម្បទានសម្រាប់ធ្វើការអភិវឌ្ឍ។

សូមបញ្ជាក់ដែរថា បច្ចុប្បន្នកម្ពុជាមានលទ្ធភាពផលិតថាមពលនៅក្នុងស្រុកបាន ៣ ៤៦៤មេហ្កាវ៉ាត់ ដែលផលិតចេញពីថាមពលពន្លឺព្រះអាទិត្យ វារីអគ្គិសនី ជីវម៉ាស ធ្យូងថ្ម និងប្រេង ក្នុងនោះអគ្គិសនីបានពីថាមពលស្អាតមានប្រមាណ ៦២ភាគរយ។ សម្រាប់តម្រូវការប្រើប្រាស់អគ្គិសនីខ្ពស់បំផុតបច្ចុប្បន្ននេះ ត្រឹមតែប្រមាណ ២ ៤០០មេហ្កាវ៉ាត់ប៉ុណ្ណោះ មានន័យថាកម្ពុជាមានសមត្ថភាពផលិតថាមពលបានច្រើនលើស ពីតម្រូវការប្រើប្រាស់ ដូច្នេះយើងពុំមានបញ្ហាខ្វះអគ្គិសនីនោះទេ។

គិតត្រឹមចុងឆ្នាំ២០២២ មានភូមិចំនួន ១៣ ៩២៣ ស្មើនឹង ៩៨.២៧ភាគរយ បានតខ្សែបណ្តាញអគ្គិសនីពីបណ្តាញជាតិ សម្រាប់ប្រើប្រាស់រួចហើយ ខណៈនៅសល់ភូមិតែ ២៤៥ប៉ុណ្ណោះ ស្មើនឹង ១.៧៣ភាគរយ មិនទាន់តខ្សែបណ្តាញអគ្គិសនីពីបណ្តាញជាតិ ដោយសារតែភូមិទាំងនោះ នៅក្នុងតំបន់ព្រៃភ្នំដាច់ស្រាយាល នៅរាយប៉ាយ ហើយភូមិខ្លះនៅផ្ទៃទឹក តំបន់កោះ ឬភូមិខ្លះទើបនឹងបង្កើតថ្មី ដែលគ្មានផ្លូវធ្វើដំណើរជាដើម។ ប៉ុន្តែបើទោះបីជា ភូមិទាំង ២៤៥នោះ មិនទាន់ទទួលបានប្រភពអគ្គិសនីពីបណ្តាញជាតិក្តី ក៏ភូមិមួយចំនួនបានទទួលការផ្គត់ផ្គង់អគ្គិសនី ពីប្រភពថាមពលពន្លឺព្រះអាទិត្យរួចហើយ៕