បរទេស ៖ យោងតាមប្រភពព័ត៌មានពី CNN រាយការណ៍​ថា ​តម្លៃប្រេងឡើងថ្លៃដល់កម្រិតខ្ពស់បន្ទាប់ពីមានការលេចឮថា អារ៉ាប៊ីសាអូឌីត និង​រុស្ស៊ី ដែល​ជា​ប្រទេស​នាំ​ចេញ​ប្រេងឆៅ​ធំ​ជាង​គេ​របស់​ពិភពលោកអាច​​នឹង​បន្ត​កាត់​បន្ថយ​ទិន្នផល​ប្រេងរហូតដល់ខែធ្នូ ដំណាច់ឆ្នាំនេះ។

តម្លៃប្រេងឆៅ Brent ឡើងថ្លៃ ១,៨ ភាគរយ ឬ ៩០ ដុល្លារក្នុងមួយបារ៉ែល ខណៈដែល West Texas Intermediate (WTI) ឡើងថ្លៃដល់ ៨៧,៥៤ ដុល្លារក្នុងមួយបារ៉ែល។

ទន្ទឹមនឹងនេះ អារ៉ាប៊ីសាអូឌីត និងរុស្ស៊ី មានបំណងចង់ពង្រឹងសម្ព័ន្នភាពជាមួយនឹង OPEC+ ដែលរួមមានសមាជិកនៃអង្គការនៃប្រទេសនាំចេញប្រេង និងអ្នកផលិតផ្សេងទៀត បានយល់ព្រមលើការកាត់បន្ថយផលិតកម្មយ៉ាងស៊ីជម្រៅ និងអូសបន្លាយរយៈពេលយូរ ដើម្បីគាំទ្រដល់តម្លៃប្រេង។ ប្រភពផ្លូវការមួយពីក្រសួងថាមពលអារ៉ាប៊ីសាអូឌីតបានលើកឡើងថា ដើម្បីគាំទ្រតម្លៃប្រេងនឹងបន្តកាត់បន្ថយផលិតកម្មរបស់ខ្លួនចំនួន ១ លានបារ៉ែលក្នុងមួយថ្ងៃរហូតដល់ចុងខែធ្នូ។ ការសម្រេចចិត្តនេះនឹងត្រូវបានពិនិត្យឡើងវិញជាប្រចាំខែ ដើម្បីពិចារណាឱ្យកាន់តែស៊ីជម្រៅលើការកាត់បន្ថយ ឬ បង្កើនផលិតកម្ម។ កាលពីលើកមុន អារ៉ាប៊ីសាអូឌីតមានវិធានការកាត់បន្ថយផលិតកម្មប្រេងចំនួន ១ លានបារ៉ែលក្នុងមួយថ្ងៃនឹងត្រូវបានអនុវត្តត្រឹមខែតុលានោះទេ។

លើសពីនេះ ការ​កាត់​បន្ថយ​ផលិតកម្ម​របស់​អារ៉ាប៊ីសាអូឌីតចាប់តាំងពីខែកក្កដាមក បានធ្វើឲ្យទិន្នផលប្រេងរបស់ខ្លួន ធ្លាក់ចុះមកនៅត្រឹម ៩ លានបារ៉ែលប៉ុណ្ណោះក្នុងមួយថ្ងៃ។ មិនត្រឹមតែប៉ុណ្ណោះ អារ៉ាប៊ីសាអូឌីតមានបំណងចង់ឲ្យតម្លៃប្រេងឆៅ Brent ជួញដូរក្នុងតម្លៃប្រហែល ៨១ ដុល្លារក្នុងមួយបារ៉ែល ដើម្បីរក្សាតុល្យភាពថវិការបស់ខ្លួនបន្ទាប់ពីធ្លាក់ចូលទៅក្នុងឱនភាពថវិកានៅឆ្នាំនេះ។ ស្របពេលនេះដែរ​ រុស្ស៊ី​កំពុង​ព្យាយាម​បង្កើន​ប្រាក់​ចំណូល​សម្រាប់ការធ្វើ​សង្រ្គាម​ជាមួយនឹងក្រែន។ កាលពីថ្ងៃអង្គារកន្លងទៅនេះ ឧបនាយករដ្ឋមន្ត្រីរុស្ស៊ី Alexander Novak បាននិយាយថា រុស្ស៊ីនឹងកាត់បន្ថយការនាំចេញរបស់ខ្លួនចំនួន ៣ សែនបារ៉ែលក្នុងមួយថ្ងៃរហូតដល់ដំណាច់ឆ្នាំនេះ។ ការសម្រេចចិត្តនេះត្រូវបានធ្វើឡើងដើម្បីរក្សាស្ថិរភាព និង តុល្យភាពនៅលើទីផ្សារប្រេង។

ក្នុងរយៈពេលប៉ុន្មានខែកន្លងមកនេះ ការកាត់បន្ថយផលិតកម្មដោយអង្គការ OPEC+ បានជំរុញឲ្យតម្លៃប្រេងឡើងថ្លៃ ដែលអាចមានផលប៉ះពាល់ចំពោះអតិផរណា និងអត្រាការប្រាក់ផងដែរ។ ការឡើងថ្លៃតម្លៃប្រេងនឹងក្លាយជាបញ្ហាប្រឈមថ្មីសម្រាប់ធនាគារកណ្តាល ខណៈដែលពួកគេកំពុងបន្តកិច្ចខិតខំប្រឹងប្រែងក្នុងការធ្វើឱ្យកម្រិតអតិផរណាត្រឡប់មកវិញស្របតាមគោលដៅដែលពួកគេចង់បាន៕