ព្រះសីហនុ ៖ ក្នុងឱកាសអញ្ជើញបើកការដ្ឋានសាងសង់ចំណតផែកុងតឺន័រទឹកជ្រៅជំហានទី១ នៅកំពង់ផែ​ស្វយ័តក្រុងព្រះសីហនុ តម្លៃ ២៤៣លានដុល្លារ នាព្រឹកថ្ងៃទី២២ ខែធ្នូ ឆ្នាំ២០២៣ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឱ្យដឹងពីផលប្រយោជន៍​នៃ​សមិទ្ធផលថ្មីនេះ។

ឯកឧត្តមបានមានប្រសាសន៍ឱ្យដឹងថា ក្នុងរយៈពេល១១ខែ ឆ្នាំ២០២៣ បរិមាណទំនិញឆ្លងកាត់មាន​ចំនួន​ប្រមាណជាង ៧លានតោន កើនឡើង ១១,៣៤% និងចំណូលអាជីវកម្មសរុបមានចំនួន​ប្រមាណជាង ៨៥លានដុល្លារអាមេរិក កើនឡើង ២,៧១% បើធៀបនឹងរយៈពេលដូចគ្នាក្នុងឆ្នាំ២០២២។

បន្ថែមពីនេះ បរិមាណកុងតឺណឺឆ្លងកាត់កំពង់ផែមានចំនួនសរុបប្រមាណជាង ៧៥ម៉ឺន  ដែលមានកំណើនជាមធ្យម ១០,៨៣% ។ ក្នុងរយៈពេល ១២ឆ្នាំចុងក្រោយ គិតចាប់ពីឆ្នាំ២០១០ ដល់ឆ្នាំ២០២២ ការណ៍នេះបានចូលរួមចំណែកក្នុងការរក្សាកំណើនសេដ្ឋកិច្ចជាតិក្នុងមួយរង្វង់ ៧% ប្រចាំឆ្នាំ ប្រកបដោយចីរភាពក្នុងរយៈពេល ២ទសវត្សរ៍ចុងក្រោយ មុនការរីករាលដាលនៃជំងឺកូវីដ១៩។ ក្រោយមកក៏បន្តកើនឡើងក្នុងអាត្រា ៥,៦% ក្នុងឆ្នាំ ២០២៣ និង៦,៦% ក្នុងឆ្នាំ២០២៤។

រដ្ឋមន្ត្រីក្រសួងសាធារណៈការ ក៏បានបន្តគូសបញ្ជាក់ទៀតថា ៖

«ចំណតផែកុងតឺណឺថ្មីនេះ ជំហានទី១ នឹងអនុញ្ញាតឱ្យនាវាប្រមាណ ៩៣% ក្នុងតំបន់ចូលចតនៅកំពង់ផែស្វយ័តព្រះសីហនុបាន ដែលបច្ចុប្បន្ន​​មានត្រឹមតែ ១៨%តែប៉ុណ្ណោះអាចចូលចតបាន។ ហើយតម្លៃដឹកជញ្ជូនតាម សមុទ្រ​នឹងថយចុះប្រមាណ ២០០ដុល្លារ ក្នុងមួយកុងតឺណឺ ដែលតម្លៃនេះគឺនឹង ប្រហាក់ប្រហែល​ជាមួយ​បណ្ដាប្រទេសក្នុងតំបន់។»

ចំណតផែកុងតឺណឺទឹកជ្រៅថ្មី ជំហានទី១នេះ មានប្រវែង ៣៥០ម៉ែត្រ ជម្រៅទឹកសាងសង់ ១៤,៥ម៉ែត្រ អាចអនុញ្ញាតឱ្យនាវាកុងតឺណឺមានចំណុះផ្ទុក ៦ម៉ឺនតោន ឬស្មើនឹង ៤០០០ TEU ហើយមានផ្លូវទឹកដឹកជញ្ជូនក្នុងតំបន់អាស៊ីប៉ាស៊ីហ្វីកទៅមកកំពង់ផែស្វយ័តព្រះសីហនុ ហើយនឹង​បង្កើនសមត្ថភាពកំពង់ផែសរុបកើនដល់ប្រមាណ ១,២៥លាន TEU ក្នុងមួយឆ្នាំ។

យ៉ាងណាមិញ គម្រោងនេះគ្រោងនឹងបញ្ចប់នៅឆ្នាំ២០២៦ ហើយគ្រោងនឹងចំណាយថវិកាសាង​សង់ ២៤៣លានដុល្លារ រួមបញ្ចូលទាំងថវិកាបដិភាគរដ្ឋាភិបាលកម្ពុជា សម្រាប់ពន្ធអាករ​ផ្សេងទៀត។

គួរបញ្ជាក់ថា សមិទ្ធផលនៃហេដ្ឋារចនាសម្ព័ន្ធកំពង់ផែនៅកម្ពុជាប៉ុន្មានឆ្នាំចុងក្រោយនេះ មានការវិវត្ត ដូចជា ការសាងសង់ផែកុងតឺណឺជម្រៅទឹក ១១,៥ម៉ែត្រ ការសាងសង់ផែពហុបំណងជម្រៅទឹក ១៣,៥ម៉ែត្រ ការសាងសង់ចំណតមូលដ្ឋាន ផ្គត់ផ្គង់ភ័ស្តុភាសម្រាប់ការរុករកប្រេង ការបំពាក់​ឧបករណ៍ និងមធ្យោបាយលើកដាក់កុងតឺណឺ ការសាងសង់ទីលានស្តុកកុងតឺណឺ ឃ្លាំងទំនិញ ចំណតច្រាំងទំនិញទូទៅ និងការសាងសង់តំបន់សេដ្ឋកិច្ចពិសេសជាដើម៕