បាងកក ៖ នៅដើមខែកក្កដាកន្លងមកនេះ ថៃបានប្រកាសដាក់ឲ្យដំណើរការរោងចក្រផលិតរថយន្តអគ្គិសនីរបស់ចិន BYD ជាទីតាំងដំបូងបំផុតក្នុងប្រទេសថៃ និងក៏ដូចជាក្នុងតំបន់អាស៊ីអាគ្នេយ៍។ គម្រោងនេះបានទទួលការស្ញប់ស្ងែង និងកោតសរសើរយ៉ាងខ្លាំងទៅលើទស្សនៈវិស័យក្នុងវិស័យឧស្សាហកម្មរបស់ថៃ។

យ៉ាងណាក៏ដោយមិនដល់ប៉ុន្មានសប្តាហ៍ផង ស្ថានភាពនេះហាក់ដូចជាមិនដូចការរំពឹងទុកឡើយ។ ថៃមិនទាន់អាចទាញប្រយោជន៍បានច្រើននៅឡើយពីសង្វាក់ផលិតកម្មរបស់ BYD ប៉ុន្តែបែរជាបានខាតបង់ក្នុងទំហំមួយគួរឲ្យកត់សំគាល់ទៅវិញដោយក្រុមហ៊ុន Suzuki Motor បានប្រកាសបិទទ្វាររោងចក្ររបស់ខ្លួនមួយកន្លែង ខណៈដែលរោងចក្រមួយនេះអាចផលិតរថយន្តបានរហូតដល់ទៅ ៦០ ០០០គ្រឿងក្នុងមួយឆ្នាំ។

ការសម្រេចចិត្តរបស់ក្រុមហ៊ុនផលិតរថយន្តដ៏ធំរបស់ចិននៅក្នុងប្រទេសដែលមានសេដ្ឋកិច្ចធំបំផុតទី២របស់អាស៊ាននេះបានក្លាយជាកញ្ចក់ឆ្លុះបង្ហាញថា រដ្ឋាភិបាលថៃក៏នឹងចាប់ផ្តើមទទួលយកផលិតផលនាំចូលដែលមានតម្លៃធូរថ្លៃផ្សេងទៀតពីប្រទេសចិនផង ក៏ដូចជាបានបង្ហាញថាការប្រកួតប្រជែងផ្នែកឧស្សាហកម្មសម្រាប់ក្រុមហ៊ុនជប៉ុនក៏នឹងជួបផលលំបាកដែរនៅក្នុងប្រទេសមួយនេះ ហើយបន្ថែមពីនេះក៏មានកត្តាបង្ខំផ្សេងទៀតដូចជាការកើនឡើងនៃតម្លៃថាមពល និងបញ្ហាកង្វះខាតធនធានដែលមានអាយុពេញកម្លាំងផងដែរ។

តួលេខជាក់ស្តែងបានបង្ហាញយ៉ាងច្បាស់ថា រោងចក្រដល់ទៅជិត២០០០កន្លែងនៅទូទាំងប្រទេសថៃបានប្រកាសបិទទ្វារកាលពីឆ្នាំកន្លងទៅ ខណៈដែលការលើកកំពស់វិស័យផលិតកម្មរបស់ថៃជាចលករយ៉ាងធំធេង ឬរហូតទៅដល់ជាង ១​ ភាគ ៤ នៃផលិតផលក្នុងស្រុកសរុបរបស់សេដ្ឋកិច្ចថៃទាំងមូល។

វិស័យផលិតកម្មនេះដែរក៏ជាកិច្ចការងារអាទិភាពជាងគេបំផុតសម្រាប់លោកនាយករដ្ឋមន្ត្រី Srettha Thavisin ដែលបានឡើងកាន់តំណែងកាលពីឆ្នាំកន្លងទៅក្នុងការដោះស្រាយ។លោកធ្លាប់បានសន្យាថា លោកនឹងធ្វើឲ្យសេដ្ឋកិច្ចជាតិកើនឡើងជាប្រចាំឆ្នាំឡើងវិញ ៥ភាគរយក្នុងអាណត្តិទាំង៤ឆ្នាំរបស់លោក ខណៈដែលអត្រាកំណើនចាស់ដែលធ្វើបានត្រឹមតែ១,៧៣ភាគរយប៉ុណ្នោះកាលពីមួយទសវត្សរ៍មុន។

លោក Srettha បានថ្លែងប្រាប់សភាជាតិកាលពីសប្តាហ៍មុនបែបនេះថា ៖វិស័យ​ឧស្សាហកម្ម​បាន​ធ្លាក់​ចុះ ហើយ​ការ​ប្រើប្រាស់​សមត្ថភាព​បាន​ធ្លាក់​ចុះ​ក្រោម ៦០ ភាគរយ។ នេះមានន័យថាឧស្សាហកម្មថៃកំពុងធ្លាក់ចុះ ហើយទាមទារនូវការសម្របខ្លួនឡើងវិញចំពោះទីផ្សារថ្មីៗ។

ប្រភពពីរ៉យទ័រថ្មីៗនេះបានរាយការណ៍ទៀតថា គិតចាប់តាំងពីខែកក្កដា ឆ្នាំ២០២៣ ដល់ខែមិថុនា ឆ្នាំ២០២៤ អត្រានៃការបិទទ្វាររោងចក្រនៅទូទាំងប្រទេសបានបន្តកើនឡើងដល់ទៅ៤០ភាគរយធៀបទៅនឹងពេលវេលាដូចគ្នាកាលពីមួយឆ្នាំមុន។ ការបាត់បង់ការងារបានហក់ឡើងដល់ទៅ៨០ភាគរយក្នុងអំឡុងពេលនេះ ហើយពលករសរុបប្រមាណជា ៥១ ៥០០នាក់កំពុងអត់ការងារធ្វើ។

ត្រឡប់មកវិញចំនួននៃការបើករោងចក្រក៏មានភាពយឺតយ៉ាវផងដែរ ជាពិសេសរោងចក្រដែលបិទទ្វារសុទ្ធតែជារោងចក្រធំៗ ប៉ុន្តែរោងចក្រដែលបើកដំណើរការថ្មីៗភាគច្រើនសុទ្ធតែជារោងចក្រតូចៗ និងមធ្យម។

ក្នុងពេលជាមួយគ្នានេះ ថៃបានត្រៀមខ្លួនរួចជាស្រេចដើម្បីនាំចូលទំនិញធូរថ្លៃពីប្រទេសចិនដោយក្នុងនោះមានទាំងការកំណត់អត្រាពន្ធបន្ថែម ឬ VAT ទៅលើទំនិញទាំងឡាយណាដែលមានតម្លៃទាបជាតិ១៥០០បាត ឬ៤១ដុល្លារទាំងដែលទំនិញទាំងនោះស្ថិតនៅក្នុងករណីលើកលែងពន្ធគយនៅឡើយផងនោះ។

ការព្យាករណ៍បានបង្ហាញថា សេដ្ឋកិច្ចថៃនឹងអាចទទួលបានកំណើនត្រឹមតែ២,៥ភាគរយនៅក្នុងឆ្នាំនេះ ដែលជឿជាក់ថា ភារៈកិច្ចរបស់លោកនាយករដ្ឋមន្ត្រី Srettha នឹងមិនសូវទទួលបានជោគជ័យដូចការរំពឹងទុកឡើយចំពោះការអភិវឌ្ឍសេដ្ឋកិច្ចជាតិ៕