សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្ពៃជ្រក់ ជាអាហារកែច្នៃពីស្ពៃស្រស់ ដែលជាវិធីសាស្ត្រមួយអាចរក្សាទុកបានយូរ មានរសជាតិជូរ ស្រួយ ឆ្ងាញ់ និងអាចយកទៅចម្អិនជាម្ហូបអាហារ ដូចជា ស្ងោរ ឆា ឬទទួលទានផ្ទាប់ជាមួយត្រីអាំង ឬសាច់អាំងជាដើម។ ប៉ុន្តែតើធ្លាប់ដឹងទេថា មុនពេលដែលអ្នកទិញស្ពៃជ្រក់ពីទីផ្សារយកមកទទួលទទួលទាន តើអ្នកកែច្នៃមានវិធីសាស្ត្រដូចម្ដេចក្នុងការកែច្នៃ និងរក្សាទុកឱ្យមានគុណភាពឱ្យបានល្អ។
ស្ពៃ មានច្រើនប្រភេទ ដែលក្នុងនោះស្ពៃខៀវ ឬស្ពៃខ្មៅសម្រាប់កែច្នៃធ្វើជាស្ពៃជ្រក់បានគេអាចប្រមូលផលនៅពេលឃើញមានស្រទាប់ម្សៅលើធាងរបស់វា ដែលអាចមានអាយុចាប់ពី ២ ទៅ ២ខែកន្លះ។ កសិករតែងប្រមូលផលនៅពេលណាដែលមេឃត្រជាក់ មានសំណើម ចន្លោះម៉ោង៩ព្រឹក ដល់ ៣រសៀល ដោយសារពេលមេឃត្រជាក់ធាងស្ពៃនៅស្រួយល្អ ហើយត្រូវប្រើកូនកាំបិតដែលមុតល្អទើបងាយស្រួលកាត់។
បន្ថែមពីលើនេះ ពេលកាត់កសិករត្រូវប្រុងប្រយ័ត្នចៀសវាងការប៉ះទង្គិចខ្លាំង និងត្រូវប្រមូលទិន្នផលស្ពៃចូលក្នុងម្លប់ភ្លាមៗបន្ទាប់ពីកាត់ហើយ។ គេអាចធ្វើការសម្អាតដោយកាត់ស្លឹកចាស់ៗ និងធាងណាដែលរលួយចោល តែមិនទាន់លាងទឹកនោះទេ ព្រោះអាចធ្វើឱ្យស្ពៃបៀមទឹក ឆាប់ជាំ និងរលួយ។ បន្ទាប់មកទៀត គេត្រូវដាក់សំដិលក្រោមម្លប់ប្រមាន ៣០នាទី អាស្រ័យលើអាកាសធាតុ ដោយទុកឱ្យស្រពោនល្មម។
នៅពេលសំដិលនេះផងដែរ គេត្រូវតំរៀបស្ពៃចូលក្នុងកញ្ឆេ ឬដាក់លើរ៉ឺម៉កតែម្ដង ដោយរៀបជាស្រទាប់ និងគ្របពីលើដោយស្លឹកចេក។ គេត្រូវរៀបដោយដាក់គល់ស្ពៃចេញក្រៅ និងរៀបជារង្វង់ក្នុងកញ្ឆេ កុំឱ្យពេញហួសមាត់កញ្ឆេ។ ចំណែកការដឹកជញ្ជូន គេគួរតែដឹកនៅពេលព្រឹក ឬពេលរសៀល និងពេលយប់ ដោយដាក់រ៉ឺម៉ក ឬរថយន្ត ដោយរៀបកញ្ឆេជាថ្នាក់ៗ ចៀសវាងការអង្គុយលើ ឬដាក់របស់ធ្ងន់ពីលើដែលធ្វើឱ្យបែកបាក់ ហប់រលួយ និងមានឈើកល់ និងក្រណាត់សើមការពារធូលី។
សម្រាប់ការស្តុកទុកស្ពៃជ្រក់អាចទុកបាន ១យប់ ២ថ្ងៃ ដោយគេអាចសំដិលនៅលើគ្រែ នៅពេលយប់ទុកវាហាលសន្សើម និងពេលថ្ងៃយកចូលម្លប់។ បើទុករយៈពេល ២យប់ អាចបាត់បង់គុណភាពរហូតដល់ ៣៥% តែវាអាចយកទៅធ្វើជ្រក់បាន។ ការដាក់សំដិលនេះដែរអាចឱ្យត្រូវសន្សើមបាន តែមិនឱ្យត្រូវថ្ងៃនោះទេ ហើយគេអាចប្រើកំបោរ ឬសាច់ជូរលាបគល់របស់ស្ពៃដើម្បីអាចរក្សាទុកបានយូរ៕
Account
Security
Favourite Content