សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ លើនិន្នាការសកលឆ្នាំ២០២៤នេះ ជាឆ្នាំដែលពិភពលោកត្រូវដោះស្រាយនូវបញ្ហាកាន់តែច្រើន ដែលបញ្ហាទាំងនោះរួមមាន សង្គ្រាមអ៊ីស្រាអែល-ហាម៉ាស់ សង្គ្រាមរុស្ស៊ី-អ៊ុយក្រែន ការវាយប្រហារកប៉ាល់ដឹកទំនិញនៅសមុទ្រក្រហម និងសមុទ្រមេឌីទែរ៉ាណេ ជម្លោះសមុទ្រចិនខាងត្បូង និងការបោះឆ្នោតប្រធានាធិបតីអាមេរិកជាដើម។
បញ្ហាទាំងអស់នេះ ចង់ ឬមិនចង់នឹងបន្តជះឥទ្ធិពលទូទាំងពិភពលោកតែម្ដង គ្រាន់តែប្រទេសខ្លះត្រូវរងផលប៉ះពាល់ដោយផ្ទាល់ និងខ្លះទៀតដោយប្រយោល។
សម្រាប់កម្ពុជាឯណេះវិញ គេហាក់មិនទាន់កត់សម្គាល់ឃើញការប៉ះពាល់ធំដុំនៅឡើយទេ ម្យ៉ាងទៀត រាជរដ្ឋាភិបាលកម្ពុជាក៏មានការខិតខំប្រឹងប្រែងក្នុងការរុញសេដ្ឋកិច្ចជាតិ បើទោះបីជាពិភពលោកកំពុងជាប់រវល់ជាមួយបញ្ហានានាក៏ដោយ។
ទាក់ទិននឹងរឿងនេះ អ្នកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា និងជាអ្នកជំនាញសេដ្ឋកិច្ចមួយរូបបានបង្ហាញពីភាពសុទិដ្ឋិនិយម និងគាំទ្រយ៉ាងពេញទំហឹងទៅលើយន្តការរបស់រាជរដ្ឋាភិបាលនៃអាណត្តិទី៧ ដែលដឹកនាំដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា ជាមួយនឹងភាពជឿជាក់ថាអាចជួយរុញកំណើនសេដ្ឋកិច្ចជាតិកម្ពុជាបានយ៉ាងពិតប្រាកដ។
អ្នកឧកញ៉ា លឹម ហេង បានគូសបញ្ជាក់ថា ៖
«កិច្ចខិតខំប្រឹងប្រែងរបស់រាជរដ្ឋាភិបាលអាណត្តិថ្មីក្នុងការសម្រួលការវិនិយោគនេះហើយ ដែលជាអាវក្រោះការពារសេដ្ឋកិច្ចកម្ពុជា»។
អ្នកឧកញ៉ាបន្តថា កម្ពុជាមានភាពអំណោយផលលើទីផ្សារស្រាប់ ដោយកម្ពុជាមានកិច្ចព្រមព្រៀងពាណិជ្ជកម្មសេរីជាមួយប្រទេសនានា កិច្ចព្រមព្រៀង RCEP ច្បាប់វិនិយោគថ្មីរបស់កម្ពុជាដែលមានភាពទាក់ទាញជាងមុន និងកត្តាធំជាងគេនោះគឺកត្តាសន្តិសុខ សុវត្ថិភាពនៅក្នុងផ្ទៃប្រទេស។
អ្នកឧកញ៉ាបន្តសង្កត់ធ្ងន់ថា៖
«យើងធ្វើយ៉ាងណាទាក់ទាញវិនិយោគចូលមកប្រទេសយើងឱ្យបានច្រើន ដើម្បីបង្កើនការផលិត ការនាំចេញ និងបង្កើតការងារជូនប្រជាពលរដ្ឋដើម្បីជំរុញសេដ្ឋកិច្ចយើង»។
យោងតាមច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ២០២៤ បានព្យាករថា សេដ្ឋកិច្ចកម្ពុជានៅឆ្នាំ២០២៤ នឹងងើបឡើងវិញ ហើយរំពឹងថានឹងសម្រេចបានកំណើនក្នុងរង្វង់ ៦,៦%។ កំណើននេះនឹងធ្វើឱ្យផលិតផលក្នុងស្រុកសរុប (ផ.ស.ស) ថ្លៃបច្ចុប្បន្នស្ថិតក្នុងរង្វង់ ១៤២ ៩៥៧ ប៊ីលានរៀល សមមូលនឹងប្រមាណ ៣៥ ១៦៨ លានដុល្លារអាមេរិក ស្របពេលដែល ផ.ស.ស សម្រាប់មនុស្សម្នាក់ត្រូវបានរំពឹងថា នឹងកើនឡើងដល់ ២ ០៧១ដុល្លារអាមេរិក ខណៈឆ្នាំ២០២៣ មានត្រឹម១ ៩១៧ ដុល្លារអាមេរិក ។ ក្រៅពីនេះ រាជរដ្ឋាភិបាលកម្ពុជាក៏បានដាក់ចេញនូវគោលនយោបាយនានា ដើម្បីទាក់ទាញវិនិយោគិនមកបណ្ដាក់ទុនបន្ថែមទៀតផងដែរ៕
Account
Security
Favourite Content