សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖៖ អគ្គនាយកដ្ឋានពន្ធដារ (GDT) និងសភាពាណិជ្ជកម្មកម្ពុជា (CCC) បានបើកកិច្ចពិភាក្សា អំពីបញ្ហាប្រឈមទាក់ទងនឹងពន្ធដារ ដើម្បីបង្កើនការអនុលោមតាមពន្ធដារ និងលើកកម្ពស់បរិយាកាសអាជីវកម្មកាន់តែអំណោយផលនៅកម្ពុជា ព្រមទាំងជំរុញឱ្យមានការបង្កើតគណៈកម្មាធិការមួយសម្រាប់ត្រួតពិនិត្យកំណែទម្រង់ និងវិសោធនកម្មច្បាប់ទាក់ទងនឹងពន្ធដារ ដើម្បីទាក់ទាញវិនិយោគិន។
កិច្ចប្រជុំនេះត្រូវបានធ្វើឡើងក្រោមអធិបតីភាពឯកឧត្តម គង់ វិបុល អគ្គនាយកនៃ GDT និងជាសហប្រធាននៃយន្តការភាពជាដៃគូអគ្គនាយកដ្ឋានពន្ធដារ-ផ្នែកឯកជន និង អ្នកឧកញ៉ា គិត ម៉េង ប្រធានសភាពាណិជ្ជកម្មនិងជាសហប្រធាននៃយន្តការភាពជាដៃគូអគ្គនាយកដ្ឋានពន្ធដារ-ផ្នែកឯកជន។
អ្នកឧកញ៉ា គិត ម៉េង បានគូសបញ្ជាក់ថាកិច្ចសហការនេះ ដើម្បីបង្កើនការអនុលោមតាមពន្ធដារនៅក្នុងវិស័យឯកជន ក្នុងន័យចូលរួមចំណែកលើកកម្ពស់សេដ្ឋកិច្ចប្រទេសជាតិ និងក៏បានស្នើសុំឱ្យផ្នែកឯកជនខ្លួនឯងផ្ទាល់ ត្រូវធ្វើយ៉ាងណាឱ្យ ការធ្វើធុរកិច្ចប្រកបដោយការទទួលខុសត្រូវខ្ពស់ និងគោរពច្បាប់ផងដែរ។
អ្នកឧកញ៉ា គិត ម៉េង បានមានប្រសាសន៍ថា ៖
«កិច្ចប្រជុំនេះមានសារៈសំខាន់ណាស់ ដោយសារវាជាយន្តការភាពជាដៃគូរវាងអគ្គនាយកដ្ឋានពន្ធដារ និងវិស័យឯកជន។ វិស័យឯកជន ប្រើប្រាស់យន្តការនេះដើម្បីលើកឡើងពីបញ្ហាប្រឈមទាក់ទងនឹងពន្ធដារ ដើម្បីស្នើសុំដំណោះស្រាយ ដើម្បីចូលរួមចំណែកក្នុងការកែលម្អសេដ្ឋកិច្ចជាតិ»។
អ្នកឧកញ៉ា ក៏បានជំរុញឱ្យអគ្គនាយកដ្ឋានពន្ធដារ បង្កើតគណៈកម្មាធិការមួយដើម្បីត្រួតពិនិត្យកំណែទម្រង់ និងវិសោធនកម្មច្បាប់ទាក់ទងនឹងពន្ធដារ ក្នុងន័យធ្វើយ៉ាងណា ដើម្បីទាក់ទាញវិនិយោគិនបន្ថែមទៀតចូលមកក្នុងព្រះរាជាណាចក្រកម្ពុជា។
សូមជ្រាបដែរថា កិច្ចប្រជុំក៏បានពិនិត្យ និងពិភាក្សាអំពីបញ្ហាប្រឈមរបស់វិស័យឯកជន ទាក់ទងនឹងអាជ្ញាធរពន្ធដារ។ វាក៏ផ្តោតលើការធ្វើឱ្យនីតិវិធីមានភាពសាមញ្ញ ការបញ្ជាក់អំពីបទប្បញ្ញត្តិថ្មី និងការដោះស្រាយបញ្ហាជាក់លាក់ ដែលវិស័យឯកជនប្រឈម ដើម្បីធានាបាននូវការអនុលោមតាមពន្ធដារ។
សូមជម្រាបថា៖គិតចាប់ពីថ្ងៃទី២ ខែវិច្ឆិកា ឆ្នាំ២០២៣ ដល់ ថ្ងៃទី២២ ខែតុលា ឆ្នាំ២០២៥ បញ្ហាប្រឈមក្នុងវិស័យពន្ធដារដែលផ្នែកឯកជន បានលើកឡើងសរុបមានចំនួន ៥៦។ ក្នុងនោះបញ្ហាទាំងនោះមិនបានរាប់បញ្ចូលវិធានការទាំង៥៦ ដែលបានដោះស្រាយរួចរាល់ កាលពីឆ្នាំ២០២៤ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ នោះទេ។
កិច្ចប្រជុំនេះក៏បានពិភាក្សាផងដែរ អំពីការរៀបចំ«វេទិកាពន្ធដារ» ដែលជាគំនិតផ្តួចផ្តើមរបស់អគ្គនាយកដ្ឋានពន្ធដារ ដើម្បីលើកកម្ពស់ និងជជែកពិភាក្សាអំពីប្រធានបទសំខាន់ៗមួយចំនួនទាក់ទងនឹងពន្ធដារ ក៏ដូចជាដើម្បីលើកកម្ពស់ការអនុលោមតាមពន្ធដារ និងជាពិសេស ដើម្បីទទួលយក និងដោះស្រាយបញ្ហាប្រឈមពីវិស័យឯកជន។ ការរៀបចំវេទិកានេះ នឹងក្លាយជាយន្តការមួយ ដើម្បីបំពេញបន្ថែមយន្តការដែលមានស្រាប់នៃកិច្ចសហការជាមួយវិស័យឯកជន និងអ្នកជាប់ពន្ធ។
គួរបញ្ជាក់បន្ថែមថា ការរៀបចំវេទិកានេះនឹងក្លាយជាយន្តការមួយថ្មី ដើម្បីបំពេញបន្ថែមទៀតពីលើយន្តការនៃកិច្ចសហការជាមួយវិស័យឯកជន និងអ្នកជាប់ពន្ធដែលកំពុងអនុវត្តស្រាប់ជាធរមាន។ ក្នុងន័យនេះ បន្ទាប់ពីមានការរៀបចំ “វេទិកាស្តីពីពន្ធដារ-Tax Forum” យន្តការសហការជាមួយអ្នកជាប់ពន្ធពាក់ព័ន្ធនឹងពន្ធដារជាធរមានក៏មានផងដែរ រួមមាន៖
១. យន្តការ ក្រុមការងារផ្នែកនីតិកម្ម ពន្ធដារ និងអភិបាលកិច្ច (ក្រុម “ឃ”) នៃយន្តការវេទិការាជរដ្ឋាភិបាល-ផ្នែកឯកជន និងក្រុមការងារអគ្គនាយកដ្ឋានពន្ធដារ-ផ្នែកឯកជន ដែលជាក្រុមការងារសម្រួលដល់ក្រុម “ឃ” ជាយន្តការទទួល ពិភាក្សា និងដោះស្រាយ បញ្ហាប្រឈម និងការស្រាយបំភ្លឺចំណុចនានាពាក់ព័ន្ធនឹងពន្ធដារកម្រិតបច្ចេកទេសជូនដល់សហគ្រាសជាអ្នកជាប់ពន្ធធំ ឬអ្នកជាប់ពន្ធមធ្យម ដែលយន្តការនេះត្រូវឆ្លងកាត់កិច្ចពិភាក្សានិងដោះស្រាយដោយលក្ខណៈបច្ចេកទេស។
២.យន្ដការ “វេទិកាស្តីពីពន្ធដារ-Tax Forum” ជាយន្តការលើកកម្ពស់ការ យល់ដឹង និងការផ្សព្វផ្សាយការងារពាក់ព័ន្ធនឹងពន្ធដារ ជូនអ្នកជាប់ពន្ធពីគ្រប់ស្រទាប់ទាំងអស់ ដែលរួមមាន សហគ្រាសអាជីវកម្ម សហគ្រាសអ្នកជាប់ពន្ធតូចនិងមធ្យម សហគ្រាសមីក្រូ សហគ្រាសស្ថិតនៅក្នុងសេដ្ឋកិច្ចក្រៅប្រព័ន្ធ និងរូបវន្តបុគ្គលដែលជាប្រជាពលរដ្ឋទូទៅ ពោលគឺជាយន្តការផ្សព្វផ្សាយ អប់រំលក្ខណៈទូលាយ៕
Account
Security
Favourite Content