សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងវារីអគ្គិសនីសេសានក្រោម២ ដែលស្ថិតនៅក្នុងស្រុកសេសាន ខេត្តស្ទឹងត្រែង បានចូលរួមចំណែកដ៏សំខាន់ក្នុងការផលិត និងចែកចាយថាមពលអគ្គិសនីក្នុងប្រទេសកម្ពុជា ដោយវារីអគ្គិសនីនេះ អាចផលិតថាមពលបានរហូតដល់៤០០មេហ្កាត់ និងចែកចាយទៅខេត្តរតនគិរី ក្រចេះ ស្ទឹងត្រែង រាជធានីភ្នំពេញ និងបណ្ដាខេត្តជាច្រើនទៀតក្នុងប្រទេសកម្ពុជា ។
ទំនប់វារីអគ្គិសនីសេសានក្រោម២ ត្រូវបានវិនិយោគដោយក្រុមហ៊ុនចំនួន៣រួមគ្នា រួមមានក្រុមហ៊ុនចិន គឺ Huaneng Lancang River Hydropwer ក្រុមហ៊ុនកម្ពុជា Royal Group និងក្រុមហ៊ុនមួយទៀតរបស់វៀតណាម ។ ក្រុមហ៊ុនទាំងបីនេះ ខាងភាគីចិនកាន់ភាគហ៊ុនច្រើនជាងរហូតដល់៥១ភាគរយ ក្រុមហ៊ុនកម្ពុជា កាន់កាប់ភាគហ៊ុន៣៩ភាគរយ និងវៀតណាមចំនួន១០ភាគរយ។
បើតាមលោក លឹម ហុង ជំនួយការវិស្វកររបស់ក្រុមហ៊ុន Hydropower Lower Sesan 2 Co.,Ltd ដែលជាក្រុមហ៊ុនគ្រប់គ្រងវារីអគ្គិសនីសេសានក្រោម២ បានឱ្យដឹងថា គម្រោងបានចាប់ផ្ដើមដាក់ដំណើរការតាំងពីអំឡុងចុងឆ្នាំ២០១៨ ហើយរហូតមកដល់ពេលនេះ ថាមពលអគ្គិសនីដែលផលិតចេញពីវារីអគ្គិសនីសេសានក្រោម២ បានរួមចំណែកយ៉ាងធំធេងដល់វិស័យថាមពលនៅក្នុងប្រទេសកម្ពុជា ជាពិសេសអាចកាត់បន្ថយការនាំចូលភ្លើងពីប្រទេសជិត ព្រមទាំងកាត់បន្ថយតម្លៃប្រើប្រាស់របស់ពលរដ្ឋបានមួយកម្រិតផងដែរ ។
លោកបានឱ្យដឹងថា ទំនប់វារីអគ្គិសនីសេសានក្រោម២ អាចចាត់ទុកជាគម្រោងវារីអគ្គិសនីដែលធំជាងគេមួយនៅកម្ពុជា ហើយអាចផលិតភ្លើងបានគ្រប់រដូវកាល ជាក់ស្ដែងនៅរដូវប្រាំងនេះ វារីអគ្គិសនីផ្សេងៗទៀតបានផ្អាកដំណើរការ ឬផលិតបានតិចតួច តែសម្រាប់គម្រោងវារីអគ្គិសនីសេសានក្រោម២វិញ នៅតែអាចផលិតថាមពលអគ្គិសនីបានដដែល ប៉ុន្តែមិនអាចផលិតបានរហូតដល់៤០០មេហ្កាវាត់ដូចនៅក្នុងរដូវវស្សានោះទេ ព្រោះត្រូវការសន្សំទឹកទុកសម្រាប់ប្រើប្រាស់ និងផលិតភ្លើងជានិរន្តរ៍ ។
លោកបានបន្ថែមថា ក្នុងគម្រោងវារីអគ្គិសនីសេសានក្រោម២ មានតួប៊ីនសម្រាប់ផលិតភ្លើងចំនួន៨តួប៊ីន ដោយតួប៊ីនមួយអាចផលិតថាមពលបាន៥០មេហ្កាវ៉ាត់ ប៉ុន្តែជាទូទៅការផលិតថាមពលអតិបរមាបែបនេះ គឺអាចធ្វើទៅបានក្នុងរយៈពេលខ្លីប៉ុណ្ណោះ ។
យ៉ាងណាក៏ដោយ បើតាមយុទ្ធសាស្ត្ររបស់រាជរដ្ឋាភិបាលកម្ពុជានឹងជំរុញការប្រើប្រាស់ថាមពលស្អាតឱ្យបានដល់៧០ភាគរយត្រឹមឆ្នាំ២០២៩ ឬឆ្នាំ២០៣០ ដោយបច្ចុប្បន្ននេះ រាជរដ្ឋាភិបាលក៏បានទាក់ទាញ និងជំរុញការវិនិយោគថាមពលស្អាតបន្ថែមទៀតដើម្បីជំនួសនូវថាមពលដែលប្រើប្រាស់ដោយរោងចក្រដើរដោយធ្យូងថ្ម ឬប្រេងខ្មៅ ។ សម្រាប់ វារីអគ្គិសនី សេសានក្រោម២ ជាគម្រោងវិនិយោគទម្រង់ BOT គឺសាងសង់ ធ្វើអាជីវកម្មផ្ទេរ ដោយមានរយៈពេល៤០ឆ្នាំ ហើយនៅក្រោយរយៈពេល៤០ឆ្នាំ ក្រុមហ៊ុននឹងត្រូវប្រគល់គម្រោងនេះមករាជរដ្ឋាភិបាលជាអ្នកគ្រប់គ្រងវិញ ៕
Account
Security
Favourite Content