សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានបង្ហាញគម្រោងរៀបចំកំពង់ផែទេសចរណ៍កម្សាន្តតាមដងទន្លេមេគង្គ និងទន្លេសាប ដោយបានបើកកិច្ចប្រជុំពិភាក្សាជាមួយអន្តរក្រសួង ស្ថាប័នពាក់ព័ន្ធ ដើម្បីប្រមូលធាតុចូលក្នុងការរៀបចំទីតាំងកំពង់ផែទេសចរណ៍កម្សាន្ត និងរៀបចំក្រុងនៅតាមទីប្រជុំជននៃបណ្ដាខេត្តជុំវិញដងទន្លេមេគង្គ និងទន្លេសាបឱ្យកាន់តែមានភាពទាក់ទាញដើម្បីបង្កើនចំណូលសេដ្ឋកិច្ចជាតិ ។
កិច្ចប្រជុំពិភាក្សាលើការរៀបចំទីតាំងកំពង់ផែទេសចរណ៍កម្សាន្តតាមបណ្ដោយទន្លេមេគង្គ និងទន្លេសាបនេះ ត្រូវបានធ្វើឡើងនៅទីស្ដីការក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី៨ ខែ មេសា ឆ្នាំ២០២៥ ក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ។
នៅក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានសង្កេតឃើញថា មានទូកទេសចរណ៍ដែលធ្វើដំណើរមកពីប្រទេសវៀតណាម តាមដងទន្លេមេគង្គមកកាន់កម្ពុជា ក្នុងនោះនៅខេត្តកំពង់ចាមមានទូកទេសចរណ៍ចូលមក ៦គ្រឿង និងកំពង់ឆ្នាំងមាន ៦គ្រឿង ហើយឯកឧត្តមយល់ឃើញថា នេះគឺជាឧស្សាហកម្មមួយដែលមានដំណើរការល្អ ហើយអាចផ្ដល់ឱកាសការងារ និងថវិកាច្រើនដល់ប្រជាពលរដ្ឋកម្ពុជា។
ឯកឧត្តមឧបនាយករដ្ឋមន្ត្រីបានលើកឡើងថា ក្រសួងរៀបចំដែនដី នគរូបនីយកម្ម និងសំណង់ បានផ្លាស់ប្ដូរការគិតគូរ និងកំណត់យកការងារអាទិភាព ក្នុងនោះមានការចុះបញ្ជីដីធ្លីដែលមកដល់បច្ចុប្បន្ននេះបានចុះបញ្ជីជិតរួចរាល់ជាស្ថាពរហើយនៅទូទាំងប្រទេស, កិច្ចការបញ្ចប់វិវាទដីធ្លីក៏បានដោះស្រាយរួចរាល់អស់ជាច្រើនករណី និងនៅសល់តិចតួចប៉ុណ្ណោះ, បានដោះស្រាយបញ្ហាបុរី, និងបញ្ហាវិវាទរវាងប្រជាពលរដ្ឋជាមួយអាជ្ញាធរជាតិអប្សរានៅខេត្តសៀមរាបដែលនឹងត្រូវដោះស្រាយបញ្ចប់ក្រោយពិធីបុណ្យចូលឆ្នាំថ្មីប្រពៃណីជាតិខ្មែរ, ហើយបញ្ហាទន្លេសាបដែលក្រោយពិធីបុណ្យចូលឆ្នាំថ្មីប្រពៃណីជាតិរួចរាល់នោះក៏នឹងអាចត្រូវដោះស្រាយបញ្ចប់ជាមួយនឹងអាជ្ញាធរទន្លេសាបផងដែរ។
ឯកឧត្តម សាយ សំអាល់ បញ្ជាក់ថា ៖
«ទាក់ទិននឹងបញ្ហានៅខេត្តសៀមរាប និងទន្លេសាប គឺយើងត្រូវគិតគូរបង្កើនចំណូល និងបង្កើនឱកាសសេដ្ឋកិច្ចទាំងក្នុងខេត្តសៀមរាបនិងក្នុងតំបន់ទន្លេសាបទាំងមូលតែម្ដង ដូច្នេះហើយទើបក្រសួងរៀបចំដែនដី នគរូបនីយកម្ម និងសំណង់ បានរៀបចំឱ្យមានកិច្ចប្រជុំពិភាក្សាជាមួយក្រសួងធនធានទឹក និងឧតុនិយម, ក្រសួងទេសចរណ៍, ខេត្តនៅតាមបណ្ដោយដងទន្លេមេគង្គ និងជុំវិញទន្លេសាប, ក្រុមហ៊ុនដឹកជញ្ជូនវីរៈប៊ុនថាំ, និងអ្នកផលិតជីកសិកម្ម ដើម្បីរួមគ្នារិះរកវិធីសាស្រ្តបង្កើតយន្តការស្វែងរកប្រាក់ចំណូលនៅតំបន់ទន្លេមេគង្គ និងទន្លេសាបនេះ»។
អ្វីដែលក្រសួងរៀបចំដែនដី នគរូបនីយកម្ម និងសំណង់ បានធ្វើនៅពេលនេះ គឺក្នុងគោលបំណងដើម្បីរៀបចំទីតាំងកំពង់ផែទេសចរណ៍កំសាន្តតាមបណ្ដោយទន្លេមេគង្គ និងជុំវិញទន្លេសាប និងប្រមូលធាតុចូលបន្ថែមទៀតពីភាគីពាក់ព័ន្ធទាំងអស់ក្នុងការរៀបចំក្រុងនៃបណ្ដាខេត្តជាប់ទន្លេមេគង្គ និងទន្លេសាបឲ្យមានជីវិតរស់រវើក, មានលំហរសាធារណៈ, មានបរិស្ថានស្អាត,មានម្ហូបអាហារ និងទីតាំងកំសាន្តផ្សេងៗសម្រាប់ទាក់ទាញទេសចរដែលធ្វើដំណើរតាមទូកទេសចរណ៍ឆ្លងកាត់ខេត្តនីមួយៗតាមបណ្ដោយទន្លេមេគង្គ និងទន្លេសាប ដើម្បីទាញយកប្រាក់ចំណូលពីអ្នកទេសចរបន្ថែមទៀតសំដៅបង្កើនជីវភាពប្រជាពលរដ្ឋ និងបង្កើនចំណូលសេដ្ឋកិច្ចជាតិ ៕
Account
Security
Favourite Content