ភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុ ជាមួយក្រសួងពាក់ព័ន្ធ ព្រមទាំងក្រុមអ្នកវិនិយយោគក្នុងស្រុក បានជំរុញឱ្យមានការប្រើប្រាស់ផលិតផលថ្មអារក្នុងស្រុកឱ្យអស់លទ្ធភាពមុននឹងនាំចូល ជាពិសេសប្រើប្រាស់គ្រប់គម្រោងហេដ្ឋារចនាសម្ព័ន្ធ និងការដ្ឋានសំណង់នានាដែលប្រើប្រាស់ថវិការដ្ឋ។

ឯកឧត្តមបណ្ឌិត សួង ម៉េងគា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ឱ្យដឹងថា ក្រសួងសេដ្ឋកិច្ច និងហិរញ្ញវត្ថុ ព្រមទាំងក្រសួងរ៉ែ និងថាមពល បាន និងកំពុងយកចិត្តទុកដាក់ខ្ពស់លើការគ្រប់គ្រងធនធានរ៉ែ និងចំណូលពីវិស័យរ៉ែ ជាពិសេសវិស័យថ្មអារ ដោយបានដាក់ចេញនូវវិធានការសំខាន់ៗ និងដំណោះស្រាយបញ្ហាប្រឈមជាបន្តបន្ទាប់ ដូចជា៖ ទី១.ការកែសម្រួលអត្រាអាករនាំចេញលើមុខសញ្ញាទំនិញថ្មធម្មជាតិ, ទី២.ការសម្របសម្រួលការផ្តល់សេវាសាធារណៈ នីតិវិធីសម្រាប់ការធ្វើអាជីវកម្ម និងការនាំចេញថ្មអារជូនដល់វិនិយោគិនឱ្យកាន់តែមានភាពងាយស្រួល និងឆាប់រហ័ស, ទី៣.ការកសាងហេដ្ឋារចនាសម្ព័ន្ធគាំទ្រដល់ការដ្ឋានរ៉ែ ដូចជា ការដំឡើងអង់តែនទូរស័ព្ទ និងសេវាអ៊ិនធើណិតនៅតាមបណ្តាការដ្ឋានរ៉ែឆ្ងាយដាច់ស្រយាល, ទី៤.ការដាក់ចេញនូវវិធានការបញ្ចៀសនូវរាល់ការធ្វើអាជីវកម្មខុសច្បាប់របស់ក្រុមហ៊ុនដែលគ្មានអាជ្ញាបណ្ណ, ការគេចវេះពន្ធគយពីការនាំចេញថ្មការ និងការប្រកួតប្រជែងមិនស្មោះត្រង់, ទី៥ ការកាត់បន្ថយនីតិវិធីត្រួតពិនិត្យការនាំចេញផលិតផលថ្មអារ ដោយអនុញ្ញាតឱ្យមន្ត្រីគយ ត្រួតពិនិត្យមិនលើសពី៥% នៃបរិមាណទំនិញនាំចេញមួយលើកៗ រីឯទំនិញ៩៨% ទៀត ដែលមិនជាប់កាតព្វកិច្ចត្រួតពិនិត្យ ត្រូវសម្រួលនីតិវិធីឱ្យនាំចេញបានឆាប់រហ័ស. ទី៦.ក្រសួងរ៉ែនិងថាមពល និងអគ្គនាយកដ្ឋានគយ និងរដ្ឋាករកម្ពុជាបានបង្កើតខ្សែទូរស័ព្ទ Hot Line ដើម្បីទទួល និងដោះស្រាយបញ្ញានានាជាយថាហេតុ, ទី៧.ក្រសួងពាណិជ្ជកម្មត្រូវសម្រួលនីតិវិធីក្នុងការផ្តល់វិញ្ញាបនបត្របញ្ជាក់ប្រភពទំនិញមកត្រឹម ២ថ្ងៃ នៃថ្ងៃធ្វើការ។

ឯកឧត្តម ហ៊ាន ប៊ុនណិត អគ្គនាយករងនៃអគ្គនាយកដ្ឋានទ្រព្យសម្បត្តិរដ្ឋ និងចំណូលមិនមែនសារពើពន្ធ និងជាប្រធានលេខាធិការដ្ឋាននៃក្រុមការងារទារបំណុលអន្តរក្រសួង បានមានប្រាសាសន៍ថា ការអនុវត្តគោលនយោបាយលើវិស័យថ្មអារ ដែលមានការកើនឡើងគួរឱ្យកត់សម្គាល់នូវការនាំចេញផលិតផលថ្មការ ព្រមទាំងសន្ទុះនៃការកើនឡើងទាំងចំណូលសារពើពន្ធ និងចំណូលមិនមែនសារពើពន្ធពីវិស័យថ្មអារ ជាគុណប្រយោជន៍ដល់ថវិកាជាតិ ដោយប្រៀបធៀបរយៈពេល ១៥ខែ រវាងដំណាក់កាលមុនការដាក់ចេញនូវគោលនយោបាយជំរុញវិស័យថ្មអារត្រឹមខែកញ្ញា ឆ្នាំ២០២៣ (ពីខែកក្កដា ឆ្នាំ២០២២ ដល់ខែកញ្ញា ឆ្នាំ២០២៣) និងដំណាក់កាល ១៥ ខែក្រោយការដាក់ចេញនូវគោលនយោបាយជំរុញវិស័យថ្មអារ (ពីខែតុលា ឆ្នាំ២០២៣ ដល់ខែធ្នូ ឆ្នាំ២០២៤)។

ឯកឧត្តមបណ្ឌិត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានជំរុញឱ្យមានការពង្រឹងសមត្ថភាពជំនាញបច្ចេកទេសក្នុងការកែច្នៃ ការរចនាម៉ូដ និងពង្រឹងគុណភាពថ្មអារ ដើម្បីធានាការប្រកួតប្រជែងស្មើភាព តម្លាភាព និងយុត្តិធម៌ ព្រមទាំងបំពេញកាតព្វកិច្ចបង់ចំណូលជូនរដ្ឋឱ្យបានត្រឹមត្រូវ។

គួរបញ្ជាក់ថា ថ្មអារ សំដៅដល់ថ្មធម្មជាតិទាំងឡាយដែលកាត់យកចេញពីក្នុងដី មានសណ្ឋានជាថ្មប្លក ថ្មបន្ទះ ឬសន្លឹក ឬថ្មថ្មី ឬថ្មដុំតូចៗ (ការ៉ូឡា) ឬថ្មកែច្នៃជារូបចម្នាក់ផ្សេងៗ។ល។ ដែលប្រើប្រាស់ក្នុងការងារសាងសង់ ឬការតែងលម្អផ្នែកខាងក្នុងឬខាងក្រៅអគារ សំណង់សួនច្បារ និងហេដ្ឋារចនាសម្ព័ន្ធនានា៕