បរទេស៖ យោងតាមប្រភពព័ត៌មានពី New York Times បានរាយការណ៍ថា ស្របពេលសេដ្ឋកិច្ចអ៊ឺរ៉ុបកំពុងចុះខ្សោយ ការដំឡើងពន្ធរបស់ប្រធានាធិបតីអាម៉េរិក Donald Trump កំពុងក្លាយជាការគំរាមកំហែងថ្មីមួយទៀតសម្រាប់តំបន់នេះ។

កាលពីថ្ងៃសៅរ៍សប្ដាហ៍កន្លងទៅនេះ Trump បានគំរាមដាក់ពន្ធ ៣០% លើទំនិញនាំចូលពីសហភាពអឺរ៉ុប ដែលនឹងចូលជាធរមាននៅថ្ងៃទី​ ១ ខែសីហា។ ដោយឡែក កាលពីថ្ងៃអាទិត្យ មន្ត្រីសហភាពអឺរ៉ុបបានជួបប្រជុំគ្នានៅទីក្រុងប្រ៊ុចសែល ដោយសម្រេចចិត្តផ្អាកដាក់វិធានការតបតណាមួយ ហើយបន្តការចរចាជាមួយនឹងក្តីសង្ឃឹមថា អឺរ៉ុប និងអាម៉េរិកអាចឈានដល់កិច្ចព្រមព្រៀងមួយមុនពេលពន្ធថ្មីចូលជាធរមាននៅថ្ងៃទី ១ ខែសីហា។

លោកស្រី Ursula von der Leyen ប្រធានគណៈកម្មការអឺរ៉ុប បានលើកឡើងថា ៖

«ក្នុងពេលជាមួយគ្នានេះ ពួកយើងនៅបន្តរៀបចំវិធានការសម្រាប់តបតទៅវិញ ប៉ុន្តែយើងតែងតែចង់បាន​ការចរចាជា​ដំណោះស្រាយ​»។

ថ្មីៗនេះ អ្នកសេដ្ឋកិច្ចបានបន្ទាបការព្យាករណ៍របស់ពួកគេសម្រាប់កំណើនតំបន់ចាយប្រាក់អឺរ៉ូមកត្រឹម ០,៩% ប៉ុណ្ណោះ ដែលធ្លាក់ចុះពីការព្យាករណ៍លើកមុន ១,៣%។

លោក Bert Colijn ប្រធានសេដ្ឋវិទូនៅធនាគារ ING Bank បានលើកឡើងថា ពន្ធគយ ៣០% របស់អាម៉េរិកលើទំនិញអឺរ៉ុបនឹងធ្វើឱ្យកំណើនសេដ្ឋកិច្ចរបស់សហភាពអឺរ៉ុបជាប់គាំងនៅជុំវិញបន្ទាត់សូន្យរយៈពេលយូរ។ លើសពីនេះ ពន្ធខ្ពស់នឹងប៉ះពាល់ដល់ឧស្សាហកម្មមួយចំនួនក្នុងទ្វីបអឺរ៉ុបចាប់តាំងស្រា និងទំនិញប្រណីតៗ រហូតដល់សារធាតុគីមី និងឱសថ ដែល Trump គំរាមយកពន្ធ ២០០% នៅឆ្នាំក្រោយ។ កាលពីថ្ងៃសៅរ៍ Trump ប្រកាសពន្ធ ២៥% លើការនាំចូលរថយន្តពីអឺរ៉ុប ជាមួយនឹងពន្ធ ៥០% លើអាលុយមីញ៉ូម និងដែកផងដែរ។ ជាក់ស្តែង ការដំឡើងពន្ធលើរថយន្តដែលដាក់តាំងពីខែឧសភា បានធ្វើឱ្យក្រុមហ៊ុនផលិតរថយន្តអាល្លឺម៉ង់ខាតបង់ប្រាក់រាប់ពាន់លានរួចទៅហើយ។

កាលពីខែមេសា Trump បានដំឡើងពន្ធឆ្លើយតបឲ្យភាពស្មើគ្នា ២០% លើការនាំចូលពីអឺរ៉ុប ប៉ុន្តែត្រូវបន្ទាបមកត្រឹម ១០% វិញក្នុងរយៈពេល ៩០ ថ្ងៃ។ យ៉ាងណាមិញ អ៊ីតាលី បានព្រមានថា ពន្ធ ១០% នឹងធ្វើឱ្យប្រទេសខាតបង់ ២០ ពាន់លានអឺរ៉ូ (២៣,៦ ពាន់លានដុល្លារ) លើការនាំចេញ និងការបាត់បង់ការងារ ១១៨ ០០០ កន្លែងនៅឆ្នាំក្រោយ។ លើសពីនេះ ឧស្សាហកម្មធំៗនៅអឺរ៉ុប ដូចជា ស្រា និងផលិតផលកសិកម្មផ្សេងទៀតដែលមានសារៈសំខាន់សម្រាប់សេដ្ឋកិច្ចបារាំង អ៊ីតាលី និងអេស្ប៉ាញ កំពុងប្រឈមនឹងការយកពន្ធខ្ពស់ពីអាម៉េរិក។ ជាក់ស្តែង ប្រហែល ៩០% ភាគរយនៃផលិតកម្មប្រភេទស្រាខូញ៉ាក់របស់បារាំងត្រូវបាននាំចេញទៅកាន់អាម៉េរិក។ ប្រសិនបើ Trump អនុវត្តការដំឡើងពន្ធ ៣០% លើអឺរ៉ុបពិតមែន នោះក្រុមហ៊ុនអឺរ៉ុបជាច្រើននឹងកាន់តែខាតបង់។

យ៉ាងណាមិញ ការដំឡើងពន្ធរបស់ Trump នឹងធ្វើឲ្យអ្នកនាំចូលរបស់អាម៉េរិកប្រឈមមុខនឹងការចំណាយខ្ពស់សម្រាប់ទំនិញនាំចូលដែលផ្តល់ឱ្យពួកគេនូវជម្រើសតិចតួចប៉ុណ្ណោះ ឬ ពួកគេត្រូវទទួលយកតម្លៃខ្ពស់ទាំងបង្ខំចិត្ត។ លើសពីនេះ ប្រទេសភាគច្រើននៅអឺរ៉ុបភាគខាងត្បូងមិនសូវរងផលប៉ះពាល់ពីពន្ធគយនោះទេ ដោយសារពួកគេមិនបាននាំចេញទៅអាម៉េរិកច្រើនដូចប្រទេសសេដ្ឋកិច្ចធំៗនៅអឺរ៉ុបខាងជើងដូចជា អាល្លឺម៉ង់ និងបារាំងជាដើម។ ស្របពេលដែលអាល្លឺម៉ង់សង្ឃឹមថា សេដ្ឋកិច្ចរបស់ខ្លួនអាចនឹងកើនឡើង ១,៥% នៅឆ្នាំក្រោយ សេដ្ឋវិទូជាច្រើនបានព្យាករណ៍ថា ពន្ធគយថ្មីរបស់អាម៉េរិកនឹងកាត់បន្ថយកំណើនសេដ្ឋកិច្ចរបស់អាល្លឺម៉ង់ ០,៥%៕