សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ធនាគារពិភពលោក (World Bank) បានបង្ហាញពីឆន្ទៈរបស់ខ្លួនក្នុងការបន្តគាំទ្ររាជរដ្ឋាភិបាលកម្ពុជា ទៅលើកិច្ចខិតខំកែលម្អបរិយាកាសធុរកិច្ចឱ្យកាន់តែល្អប្រសើរ និងអភិវឌ្ឍសេដ្ឋកិច្ចក្រៅប្រព័ន្ធបន្ថែមទៀត។
ធនាគារពិភពលោក កាលពីថ្ងៃទី១២ ខែមករា ឆ្នាំ២០២៦ ក្នុងឱកាសបានជួបពិភាក្សាជាមួយឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបង្ហាញលទ្ធផលនៃរបាយការណ៍វិភាគថ្មីមួយ ស្តីពីសេដ្ឋកិច្ចក្រៅប្រព័ន្ធ និងភាពប្រកួតប្រជែងធុរកិច្ចនៅកម្ពុជា។ នេះជាផ្នែកមួយនៃកិច្ចខិតខំប្រឹងប្រែងរបស់ធនាគារពិភពលោក ក្នុងការគាំទ្រកំណែទម្រង់ជាបន្តបន្ទាប់របស់រាជរដ្ឋាភិបាលកម្ពុជា។ របាយការណ៍វិភាគនេះបម្រើជាការឆ្លុះបញ្ចាំងពីបច្ចុប្បន្នភាពនៃវិស័យសេដ្ឋកិច្ចក្រៅប្រព័ន្ធ ចំពេលវេលាដែលកម្ពុជាកំពុងជំរុញកំណែទម្រង់។
ឯកឧត្តមរដ្ឋមន្ត្រី ហែម វណ្ណឌី បានលើកឡើងថា៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងផ្សារភ្ជាប់ការងារវិភាគនេះទៅនឹងគោលនយោបាយរបស់ក្រសួង រួមទាំងសេចក្តីព្រាងយុទ្ធសាស្ត្រអភិវឌ្ឍន៍សហគ្រាសធុនមីក្រូ តូច និងមធ្យម។
លោកស្រី Tania Meyer នាយកប្រចាំប្រទេសរបស់ធនាគារពិភពលោកបានបញ្ជាក់ជំហរបន្តការគាំទ្ររាជរដ្ឋាភិបាលកម្ពុជា និងបានលើកឡើងពីសារសំខាន់នៃការកែលម្អបរិយាកាសធុរកិច្ច និងការអភិវឌ្ឍសេដ្ឋកិច្ចក្រៅប្រព័ន្ធ ហើយថា សម្រាប់កម្ពុជា ធនាគារពិភពលោកបានផ្តោតការយកចិត្តទុកដាក់ជាពិសេសលើសេដ្ឋកិច្ចក្រៅប្រព័ន្ធនៅក្នុងការសិក្សាវិភាគរបស់ខ្លួន។
លោក Faya Hayati សេដ្ឋវិទូជាន់ខ្ពស់របស់ធនាគារពិភពលោកបានលើកឡើងថា៖ ក្នុងនាមជាធនាគារដែលជាមានជំនាញ និងចំណេះដឹង គឺគាំទ្ររបៀបវារៈកំណែទម្រង់ដែលរដ្ឋាភិបាលកំពុងជំរុញដឹកនាំ តាមរយៈការវិភាគផ្អែកលើភស្តុតាងច្បាស់លាស់។
លោក Faya បានសង្កត់ធ្ងន់ថា កំណើនផលិតភាពមានសារសំខាន់បំផុត សម្រាប់កម្ពុជាសម្រេចចក្ខុវិស័យឆ្នាំ២០៥០ ក្នុងការក្លាយជាប្រទេសដែលមានចំណូលខ្ពស់។ ការស្រាវជ្រាវនេះបានបង្ហាញពីគម្លាតដ៏ធំនៃកំណើនផលិតភាពរបស់កម្ពុជាបច្ចុប្បន្ន ដែលមានប្រមាណ ០.៨% ខណៈដែលការសម្រេចចក្ខុវិស័យយ២០៥០ នឹងទាមទារកំណើនផលិតភាពលើស ២% ជារៀងរាល់ឆ្នាំសម្រាប់រយៈពេល ២៥ ឆ្នាំខាងមុខ ដែលកំណើនបែបនេះ មានតែប្រទេសកូរ៉េខាងត្បូងប៉ុណ្ណោះដែលធ្លាប់សម្រេចបាន។
នៅក្នុងកិច្ចពិភាក្សាខាងលើនេះក៏បានពិនិត្យលទ្ធផលនៃការអង្កេតពិសេសរបស់ធនាគារពិភពលោកស្តីពីសេដ្ឋកិច្ចក្រៅប្រព័ន្ធ ដែលចាត់ថ្នាក់សហគ្រាសក្រៅប្រព័ន្ធជា៣ក្រុមគឺ សហគ្រាសបានត្រឹមតែមួយរស់ (៤១%) សហគ្រាសសក្តានុពល (៤៤%) និងសហគ្រាសសមិទ្ធកម្មខ្ពស់ (១៥%)។
ការសិក្សាក៏ផ្តោតលើការធ្វើកំណែទម្រង់ចំគោលដៅដោយប្រុងប្រយ័ត្ន ដោយរួមបញ្ចូលការផ្តល់កិច្ចគាំពារសង្គមសម្រាប់ក្រុមងាយរងគ្រោះ រួមជាមួយនឹងការលើកទឹកចិត្ត ការកែលម្អលើការចុះបញ្ជីអាជីវកម្ម និងបរិយាកាសធុរកិច្ច ដើម្បីជួយដល់សហគ្រាសសក្តានុពល និងមានសមិទ្ធកម្មខ្ពស់ដែលកំពុងធ្វើប្រតិបត្តិការក្រៅប្រព័ន្ធ អាចឈានចូលក្នុងប្រព័ន្ធបាន។
ឯកឧត្តម ហែម វណ្ណឌី បានស្នើធនាគារពិភពលោកឱ្យរៀបចំអនុសាសន៍គោលនយោបាយជាក់លាក់ ដើម្បីគាំទ្រកិច្ចពិភាក្សាជាមួយក្រសួងស្ថាប័នពាក់ព័ន្ធ លើកំណែទម្រង់ដែលអាចអនុវត្តបាន។
ជាមួយគ្នានេះ ឯកឧត្តមក៏បានស្នើឱ្យធនាគារពិភពលោករៀបចំកម្មវិធីឥណទានប្រតិបត្តិការគោលនយោបាយអភិវឌ្ឍន៍ (DPO) របស់ខ្លួនឱ្យស្របនឹងរបៀបវារៈកំណែទម្រង់របស់រាជរដ្ឋាភិបាល ជាពិសេសគាំទ្រអាណត្តិរបស់ក្រសួង រួមទាំងការអនុវត្តយុទ្ធសាស្ត្រអភិវឌ្ឍន៍សហគ្រាសធុនមីក្រូ តូច និងមធ្យម និងវិធានការឱ្យចំគោលដៅដើម្បីគាំទ្រវិស័យសេដ្ឋកិច្ចក្រៅប្រព័ន្ធ៕
Account
Security
Favourite Content