សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្វាយរៀង៖ ក្រុមហ៊ុន Guangzhou Industrial Investment Holding Group ដែលជាក្រុមហ៊ុនដ៏ធំមួយរបស់ចិន បានសម្រេចចិត្តយកប្រទេសកម្ពុជាធ្វើទីតាំងមូលដ្ឋានផលិតកម្មរបស់ខ្លួនក្រោមការបណ្តាក់ទុនយ៉ាងសន្ធឹកសន្ធាប់វិនិយោគដោយបង្កើតរោងចក្រលើកដំបូងនៅក្រៅប្រទេស ។ ជាក់ស្ដែង នៅថ្ងៃទី១២ ខែមករា ឆ្នាំ២០២៦ ក្រុមហ៊ុននេះបានប្រកាសសម្ពោធដាក់ឱ្យដំណើរការជាផ្លូវការដំណាក់កាលទី១ នៃរោងចក្រផលិតសំបកកង់រថយន្តវ៉ាន់លី ថាយអឺ ស្ថិតក្នុងតំបន់សេដ្ឋកិច្ចពិសេស ស៊ីន បាវិត នៃខេត្តស្វាយរៀង។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានថ្លែងថា៖ដំណើរការនៃរោងចក្រ វ៉ាន់លី ថាយអឺ ដំណាក់កាលទី១ នេះ នឹងផ្តល់ផលប្រយោជន៍ជាច្រើនដល់កម្ពុជា តាមរយៈផ្តល់ឱកាសការងារជូនប្រជាពលរដ្ឋរាប់ពាន់កន្លែង ព្រមទាំងការផ្ទេរចំណេះដឹង និងបច្ចេកវិទ្យាទំនើបដល់កម្មករ និយោជិតខ្មែរ, ជំរុញវិស័យកសិកម្ម (កៅស៊ូ) ដែលរោងចក្រនេះនឹងក្លាយជាទីផ្សារដ៏សំខាន់សម្រាប់ស្រូបយកវត្ថុធាតុដើមកៅស៊ូធម្មជាតិក្នុងស្រុក ដែលជួយលើកកម្ពស់ជីវភាពកសិករកៅស៊ូកម្ពុជា ធ្វើពិពិធកម្មឧស្សាហកម្ម តាមរយៈការប្រែក្លាយកម្ពុជាពីការផលិតសម្លៀកបំពាក់ និងស្បែកជើង ទៅជាមជ្ឈមណ្ឌលផលិតគ្រឿងបន្លាស់រថយន្ត និងឧស្សាហកម្មធុនធ្ងន់ និងជំរុញកំណើនការនាំចេញ និងការបង្កើនទំហំពាណិជ្ជកម្មក្រៅប្រទេស។
ឯកឧត្តមឧបនាយករដ្ឋមន្ត្រី បានបង្ហាញនូវសុទិដ្ឋិនិយមយ៉ាងមុតមាំថា វត្តមានរបស់ក្រុមហ៊ុន វ៉ាន់លី ថាយអឺ លើទឹកដីកម្ពុជានាពេលនេះ មិនត្រឹមតែជាជោគជ័យនៃអាជីវកម្មប៉ុណ្ណោះទេ ប៉ុន្តែក្រុមហ៊ុននឹងក្លាយជានិមិត្តរូបនៃភាពជោគជ័យ និងជាសាក្សីរស់ក្នុងការចែករំលែកបទពិសោធន៍ដ៏ឧត្តម ក៏ដូចជាផ្សព្វផ្សាយនូវតថភាពវិជ្ជមាននានានៃបរិយាកាសវិនិយោគនៅកម្ពុជាទៅកាន់ពិភពលោក។
ឯកឧត្តមបានសង្កត់ធ្ងន់ថា៖
«ជោគជ័យរបស់ក្រុមហ៊ុន វ៉ាន់លី ថាយអឺ គឺជាការបង្កើនទំនុកចិត្ត ដើម្បីទាក់ទាញបណ្តាញវិនិយោគិន និងសហគមន៍ធុរកិច្ចចិនកាន់តែច្រើនសន្ធឹកសន្ធាប់ ឱ្យបន្តមកបណ្តាក់ទុននៅកម្ពុជា ដែលនឹងជួយរុញច្រានសេដ្ឋកិច្ចជាតិឱ្យកាន់តែមានសន្ទុះខ្លាំងក្លាបន្ថែមទៀត»។
លោក JING GUANGJUN ប្រធានក្រុមប្រឹក្សាភិបាល ក្រុមហ៊ុន Guangzhou Industrial Investment Holding Group បានលើកឡើថា៖
«រោងចក្រនៅកម្ពុជា គឺជាតំណភ្ជាប់ដ៏សំខាន់មួយក្នុងការកសាងបណ្តាញដ៏រឹងមាំ និងការអនុវត្តន៍ថ្មីមួយសម្រាប់ការបង្កើនសមត្ថភាពប្រកួតប្រជែងជាសកលរបស់ក្រុមហ៊ុន។ នាពេលអនាគតយើងនឹងយករោងចក្រនេះជាចំណុចស្នូល ដើម្បីពន្លឿនយុទ្ធសាស្ត្រឈរជើងនៅអាស៊ានពង្រីកឥទ្ធិពលទៅកាន់ទីផ្សារពិភពលោក និងកម្ពស់ខ្សែច្រវាក់ផ្គត់ផ្គង់ ការស្រាវជ្រាវ និងអភិវឌ្ឍន៍ផលិតកម្ម ការលក់ សេវាកម្ម ការបម្រើទីផ្សារឱ្យកាន់តែល្អប្រសើរនៅក្នុងប្រទេស និងតំបន់ជាង១៦០ នៅទូទាំងពិភពលោក»។
លោក JING GUANGJUN បានប្រកាសបន្តគាំទ្រពេញទំហឹងលើដំណើរការរបស់ក្រុមហ៊ុន វ៉ាន់លី ថាយអឺរ ពន្លឿនការអភិវឌ្ឍន៍របស់រោងចក្រឱ្យក្លាយទៅជាសសរស្តម្ភដ៏សំខាន់មួយនៃឧស្សាហកម្មគ្រឿងបន្លាស់រថយន្តដែលមានទុនពាន់លានដុល្លារព្រមទាំង ជំរុញនូវច្រវាក់ផលិតកម្មទំនើប បច្ចេកវិទ្យាបៃតង ដោយនាំចូលនូវបច្ចេកវិទ្យាទំនើបចុងក្រោយរបស់ក្រុមហ៊ុន ។
Guangzhou Industrial Investment Holdings Group Co., Ltd. ( GIIHG) គឺជាក្រុមហ៊ុនដ៏ធំមួយរបស់ចិន ដែលមានក្រុមហ៊ុនជាបុត្រសម្ព័ន្ធរហូតដល់ទៅ៦០០ក្រុមហ៊ុន។ ក្រុមហ៊ុន វ៉ាន់លី ថៃអឺរ ជាបុត្រសម្ព័ន្ធមួយរបស់ GIIHG មានអាជីវកម្មផលិតសំបកកង់រថយន្តម៉ាកល្បីៗជាច្រើនសម្រាប់ចែកចាយទៅកាន់ទីផ្សារពិភពលោក មានដូចជា WANLI, MILEVER, SUNNY, APTANY, DIAMOND៕
Account
Security
Favourite Content