ភ្នំពេញ ៖ តម្លៃស្រូវនៅកម្ពុជាឆ្នាំនេះ កំពុងមានទីផ្សារល្អ ខណៈដែលប្រជាកសិករកំពុងមមាញឹកប្រមូលផលស្រូវដើមរដូវ បានផ្តល់ទិន្នផលខ្ពស់ ដែលធ្វើឱ្យប្រជាកសិករជាអ្នកផលិតបានសម្តែងក្តីត្រេកអរ ជាមួយនឹងតម្លៃស្រូវ​លក់បានថ្លៃថែមទៀត ហើយមន្ត្រីជំនាញបានជំរុញប្រជាកសិករឱ្យបន្តបង្កើនផលិតស្រូវនាដើមរដូវនេះបន្ថែមទៀត ជាពិសេសនៅតំបន់ដែលមានប្រភពទឹកគ្រប់គ្រាន់។

ឯកឧត្ដម បណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងនៅក្នុងហ្វេសប៊ុកផ្លូវការរបស់លោកថា ទីផ្សារ និងស្ថានភាពតម្លៃស្រូវនៅតែល្អសម្រាប់កសិករនាពេលបច្ចប្បន្ននេះ ជាពិសេសបើធៀបទៅនឹងឆ្នាំ២០២២ ក្នុងពេលវេលាដូចគ្នា (តម្លៃនៅខ្ពស់ជាង ១០០០ រៀលក្នុងមួយគីឡូ ដែលឆ្នាំកន្លងទៅចន្លោះពី ៨០០ ទៅ ៩០០ រៀលក្មុងមួយគីឡូ) បើទោះបីជារយ:ពេល ២ ឬ ៣ ថ្ងៃចុងក្រោយនេះមានការធ្លាក់ថ្លៃបន្តិចបន្តួចនៅតាមតំបន់មួយចំនួនក៏ដោយ។

លោកបណ្ឌិត បានគូសបញ្ជាក់ថា ឈ្មួញវៀតណាមនៅតែបន្តចូលមកទិញស្រូវដូចធម្មតា ហើយរោងម៉ាស៊ីនក្នុងស្រុកក៏នៅបន្តទិញស្រូវដែរ។ ដូច្នេះ យើងកំពុងធ្វើការណែនាំដល់កសិករឱ្យទុកស្រូវឱ្យបានទុំល្អចាំច្រូត ដើម្បីទទួលបានតម្លៃល្អ ហើយរោងម៉ាស៊ីនក៏បានស្រូវល្អសម្រាប់កែច្នៃជាអង្ករ។

ឯកឧត្ដម បណ្ឌិត យ៉ង សាំងកុមារ បានមានប្រសាសន៍ថា ៖

«ការសម្របសម្រួលឱ្យមានការសហការគ្នាល្អរវាងកសិករ និងកសិករ រវាងសហគមន៍កសិករ និងរោងម៉ាស៊ីន ដែលជាយុទ្ធសាស្រ្តវែងឆ្ងាយរបស់យើងក្នុងការពង្រីកទីផ្សារ និងរក្សាលំនឹងថ្លៃស្រូវអង្ករជូនកសិករ និងអ្នកពាក់ព័ន្ធ»។

ជាក់ស្តែង ព្រៃវែងជាខេត្តមួយ មានសក្ដានុពលក្នុងការធ្វើដំណាំស្រូវដែលមានផ្ទៃដីអនុវត្តន៍ឆ្នាំនេះ ប្រជាកសិករកំពុងមមាញឹកក្នុងការច្រូតកាត់ផលស្រូវដើមរដូវ ដែលទិន្នផលស្រូវមានការកើនឡើងជាងឆ្នាំមុន បានជួយផ្គត់ផ្គង់តម្រូវការទីផ្សារក្នុងស្រុក និងការនាំចេញ ខណៈតម្លៃវិញក៏សមរម្យថ្លៃជាង១០០០៛ក្នុង១គីឡូក្រាម។

ប្រធានមន្ទីរកសិកម្មខេត្តព្រៃវែង លោក អ៊ុក សំណាង បានឱ្យដឹងថា ស្រូវនាដើមរដូវនេះមានប្រមាណ១០ម៉ឺនហិកតា ខណៈដែលប្រជាកសិករចាប់ផ្ដើមប្រមូលផលនៃផ្ទៃដីសរុបចំនួនប្រមាណជា ២៥ម៉ឺនហិកតា ។

ដោយឡែក លោក ប៉ាង វណ្ណាសេដ្ឋ ប្រធានមន្ទីរកសិកម្មខេត្តបន្ទាយមានជ័យ បានលើកឡើងថា ៖ បច្ចុប្បន្នប្រជាកសិករកំពុងសម្រុកប្រមូលស្រូវរយៈពេល១សប្ដាហ៍មកហើយបានប្រហែលជា ២០% ដោយមានឈ្មួញចុះមកទិញដល់ទីតាំងច្រូតកាត់តែម្ដង។ តម្លៃឆ្នាំនេះល្អសម្រាប់ប្រជាកសិករ ដោយស្រូវសើមនាដើមរដូវ ពូជ ៥៤ និង៥១ វាឡើងថ្លៃដល់ ១១០០ – ១២០០៛ ក្នុង១គីឡូក្រាម ខុសពីឆ្នាំមុនៗ ស្រូវមានតម្លៃត្រឹមតែ ៧០០ ទៅ ៨០០៛ ក្នុង១គីឡូក្រាមប៉ុណ្ណោះ។

ងាកទៅខេត្តតាកែវវិញ លោក ញឹប ស្រ៊ន ប្រធានមន្ទីរកសិកម្មខេត្ត បានបញ្ជាក់ថា ការប្រមូលស្រូវដើមរដូវបានដល់ទីបញ្ចប់ហើយនៅលើផ្ទៃដីជាង៨ម៉ឺនហិកតា ខណៈតម្លៃក៏ខ្ពស់ដែរបើធៀបទៅនឹងឆ្នាំមុនៗ។ តម្លៃស្រូវសើមចន្លោះពី ១ ២០០ ទៅ ១ ៣០០៛ ធៀបទៅឆ្នាំមុន ហើយបច្ចុប្បន្នប្រជាកសិករមួយចំនួនក៏កំពុងសម្រុកសាបព្រោះស្រូវស្រាលជាលើកទី២ផងដែរ ដើម្បីឱ្យទាន់ពេលវេលានៃរដូវភ្លៀងធ្លាក់។ ស្រូវនៅខេត្តតាកែវ ភាគច្រើននាំចេញទៅកាន់ប្រទេសជិតខាងដែលតម្រូវការស្រូវច្រើន។

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានលើកឡើងកាលពីថ្មីៗនេះថា នារយៈពេលចុងក្រោយនេះ តម្លៃស្រូវ​-អង្ករមានការកើនឡើង ប៉ុន្តែមិនទាន់មានបញ្ហាប្រឈម ឬហានិភ័យណាមួយដែលឈានដល់សន្តិសុខស្បៀងកម្ពុជានៅ​ឡើយនោះទេ ហើយក្រសួងកសិកម្មមានយន្តការច្បាស់លាស់ក្នុងការតាមដាន អង្កេត និងវិភាគនូវទិន្នផល​ស្រូវ​ដែលប្រមូលបាន និងការនាំចេញស្រូវអង្ករទៅកាន់ទីផ្សារអន្តរជាតិ ហើយយន្តការដាក់ចេញគោលការណ៍ថ្មីៗដើម្បីធានារក្សាបាននូវសន្តិសុខស្បៀង និងរក្សាតម្លៃស្រូវ-អង្ករឱ្យមាន​ស្ថិរភាព​នៅលើទីផ្សារក្នុងស្រុក​។

តាមរបាយការណ៍ ក្រសួងកសិកម្ម បានបង្ហាញថា អង្ករក្រអូបធម្មតា ម្លិះស្រូវប្រាំង/សែន​ក្រអូប​មានតម្លៃពី ១៥៥ ០០០-១៦០ ០០០រៀល/ការ៉ុង (៥០គីឡូក្រាម)។ តម្លៃអង្ករសប្រណិត ដូចជា ផ្កាខ្ញី នាងខុន ក្ងោកពង្ស ពីមុនមា​នតម្លៃ ១០៥ ០០០ – ១៣០ ០០០រៀល/ការ៉ុង (៥០គីឡូក្រាម) បានឡើងដល់ ១៤ ០០០០ – ១៥០ ​០​០០រៀល/​ការ៉ុង៥០​គីឡូក្រាម ពោលគឺតម្លៃលក់រាយពី ២ ៥០០ – ៣​ ០០០រៀល ឡើងដល់ ៣ ០០០ -​ ៣ ៥០០រៀល/១គីឡូក្រាម។ ចំណែក​តម្លៃអង្ករចម្រុះប្រភេទ IR និងនាងមិញពីមុនមានតម្លៃ ១០០ ០០០ -​ ១០៥ ០០០រៀល/ការ៉ុង៥០គីឡូក្រាម បានកើនឡើងដល់ ១៤០ ០០០រៀល/ការ៉ុង ពោលគឺតម្លៃអង្ករលក់រាយបានកើនឡើងចន្លោះពី ២០០ – ៥០០ រៀលក្នុង១គីឡូក្រាម ៕