ភ្នំពេញ ៖ ការដាំដើមអម្ពិលធ្វើជាអាជីវកម្ម ស្ដាប់ទៅដូចជាគ្មានអ្វីដែលគួរឱ្យចាប់អារម្មណ៍ដូចទៅនឹងការដាំដំណាំផ្សេងនោះទេ ប៉ុន្តែ អ្វីដែលគួរឱ្យចាប់អារម្មណ៍នោះ គឺតម្រូវការទីផ្សារជាក់ស្ដែង និងតម្លៃ ដែលអាចលក់បានរហូតដល់ប្រមាណ ១៨០០០រៀល ទៅ ២០ ០០០ រៀល ក្នុងមួយគីឡូក្រាម។

ត្រួយអម្ពិល ជាបន្លែម្យ៉ាងដែលមានរសជាតិជូរស្រស់ ហើយបងប្អូនខ្មែរ ជាពិសេសអ្នករស់នៅតាមបណ្តាខេត្ត និងទីជនបទនិយមដាំជិតៗផ្ទះធ្វើជារបង ងាយស្រួលបេះយកមកច្នៃជាម្ហូបអាហារ ឬស្លរសម្លរផ្សេងៗតាមចំណង់ចំណូលចិត្ត ចំណែកឯទីផ្សារត្រួយអម្ពិលក៏មានតម្រូវការ។ ងាកមកមើលពីការដាំជាលក្ខណៈអាជីវកម្មវិញ ការដាំដើមអម្ពិលយកត្រួយលក់ ក៏មានភាពងាយស្រួល មិនចំណាយកម្លាំងក្នុងការថែទាំច្រើន និងអាចបេះលក់បានក្នុងតម្លៃសមរម្យ។

សម្រាប់ទីផ្សារត្រួយអម្ពិលគេអាចលក់បានក្នុងចន្លោះពី ១៨០០០ – ២០០០០រៀលក្នុងមួយគីឡូក្រាម ដោយភាគច្រើនគេអាចលក់ទៅឱ្យឈ្មួញដើម្បីលក់បន្ត។ ចំណែកឯបច្ចេកទេសក្នុងការដាំដុះ និងថែទាំក៏មិនពិបាកអ្វីនោះដែរ ពោលឱ្យតែកសិករមានដី និងមានកម្លាំងក្នុងការដាំ ហើយឧស្សាហ៍បេះត្រួយ ព្រោះដំណាំប្រភេទនេះកាន់តែបេះ កាន់លូតលាស់ល្អ។  

ពាក់ព័ន្ធនឹងបច្ចេកទេសដាំ ដើម្បីដាំដើមអម្ពិលបាន កសិករត្រូវទិញគ្រាប់អំពិលមកបណ្ដុះលើថ្នាលផ្សេងមួយ សាបកូនរហូតវាលូតបានប្រមាណ ១ចំអាមដៃ រួចយកកូនអម្ពិលមកដាក់កន្ទោង ឬថង់បណ្ដុះ មើលទៅកូនចាប់ផ្ដើមលាស់ល្អ គេអាចដាក់ដាំបានហើយ។ ប្រសិនបើមិនដាក់បំប៉នកូនដំណាំក្នុងកន្ទោង ហើយយកកូនអម្ពិលទៅដាំតែម្ដង នោះដើមអម្ពិលនឹងឆាប់អន់ មិនមានកម្លាំងលូតលាស់ ឬលូតមិនសូវល្អនោះទេ។

ចំពោះការធ្វើរង គេត្រូវឆូតជារង រួចជីករណ្ដៅទំហំល្មមដាំបាន ដោយការដាំត្រូវទុកចន្លោះទៅមួយដើមទៅមួយដើមប្រមាណ ៣តឹក ឯចន្លោះរងអាចទុកល្មមដើរបេះបាន ឬអាចទុកចន្លោះឱ្យធំសម្រាប់ដាំបន្លែផ្សេងទៀតក៏បាន។ សម្រាប់រណ្ដៅដាំ គេអាចប្រើជីលាមកគោ និងផេះអង្កាមសម្រាប់ទ្រាប់បាតក្នុងបរិមាណ ១ក្ដាប់ក្នុងមួយរណ្ដៅ ហើយមុនដាំ ត្រូវយកកន្ទោងទៅជ្រលក់ទឹកដើម្បីឱ្យសើមជាមុនសិនទើបស្រួលចាក់យកកូនដំណាំចេញ ដោយមិនដាច់ឫស និងផ្ដល់សំណើមផងដែរ។

សម្រាប់ការថែទាំ ដោយសារយើងបានដាក់ផេះអង្កាមនៅខាងក្រោម ហេតុនេះអម្ពិលមិនសូវស៊ីទឹកច្រើននោះទេ ក្រៅពីនេះយើងត្រូវកាត់មែកអម្ពិលជាប្រចាំដើម្បីឱ្យវាលាស់មកល្អ និងមិនលូតទៅខ្ពស់ដែលធ្វើឱ្យពិបាកបេះ ដោយឡែកចំពោះការបេះត្រួយអម្ពិលទៀតសោត ក៏ត្រូវបេះជាទៀងទាត់ដែរ ទើបអាចឱ្យត្រួយថ្មីៗលាស់ជាបន្តបន្ទាប់គ្រប់រដូវ។

សូមចងចាំថា នៅពេលដើមអម្ពិលលូតបានប្រហែលត្រឹមជង្គង់ គេអាចដើរបេះត្រួយបណ្ដើរៗបាន តែមិនត្រូវបូតស្លឹកចេញនោះទេ អាចធ្វើឱ្យត្រួយលាស់មកមិនសូវល្អ ផ្ទុយទៅវិញ គេត្រូវទុកឱ្យវាលាស់តាមធម្មជាតិ តែត្រូវលះមែកក្រោមៗ ឬមែកណាដែលលូតមកស្ដុកក្នុងៗចេញ ទើបដើមមានកម្លាំង និងចេញត្រួយបានល្អ។

ជាយោបល់ ដើម្បីឱ្យបានប្រមូលផលបានរាល់ថ្ងៃ កសិករគួរដាំបន្លែផ្សេងទៀតនៅចន្លោះរង ព្រោះកាលណាយើងស្រោចទឹកជាប្រចាំគឺបានផលច្រើន បានទាំងត្រួយអម្ពិល បានទាំងផលដំណាំគួបផ្សំដែលដាំដុះនៅក្បែរ។ ក្រៅពីផ្គត់ផ្គង់ទឹកឱ្យបានគ្រប់គ្រាន់ ដើមអម្ពិលគឺមិនត្រូវការថែទាំអ្វីខ្លាំងនោះទេ ឱ្យតែដាំកូនរស់ហើយ គឺអាចបេះត្រួយបានជារឿយៗតែម្ដង ៕