សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា តួកគី បានដាក់ពាក្យជាផ្លូវការដើម្បីស្នើសុំចូលរួមជាមួយក្រុមប្រទេស BRICS ហើយប្រទេសជាសមាជិកនឹងពិចារណាលើការចូលរួមនេះ។
ប្រធានាធិបតី តួកគី លោក Recep Tayyip Erdogan បានទទួលយកការអញ្ជើញរបស់វិមានក្រឹមឡាំង ដើម្បីចូលរួមកិច្ចប្រជុំកំពូល BRICS នៅទីក្រុង Kazan នៃប្រទេសរុស្ស៊ី ដែលគ្រោងនឹងប្រព្រឹត្តទៅនៅថ្ងៃទី២២-២៤ ខែតុលាខាងមុខនេះ ខណៈដែលបច្ចុប្បន្ននេះ រុស្ស៊ី កំពុងធ្វើជាប្រធាន BRICS។ កាលពីប៉ុន្មានខែមុន ទីក្រុងអង់ការ៉ាបានដាក់សំណើដើម្បីក្លាយជាផ្នែកមួយនៃក្រុមប្រទេស BRICS ដោយសារមានភាពរង្គោះរង្គើររវាងតួកគី និងសមាជិកអង្គការណាតូជុំវិញជម្លោះអ៊ុយក្រែន។ តួកគី ជាសមាជិកដំបូងរបស់ណាតូដែលស្វែងរកសមាជិកភាពនៅក្នុងក្រុមប្រទេស BRICS ។
លោក Omer Celik អ្នកនាំពាក្យរបស់គណបក្សដែលស្ថិតក្រោមការគ្រប់គ្រងដោយប្រធានាធិបតីតួកគីបានលើកឡើងថា ការដាក់ពាក្យស្នើសុំធ្វើជាសមាជិកកំពុងស្ថិតក្រោមការពិចារណារបស់ BRICS ខណៈដែលប្រធានាធិបតីតួកគី លោក Erdogan បាននិយាយជាច្រើនដងមកហើយអំពីបំណងប្រាថ្នាចង់ក្លាយជាសមាជិក BRICS ។ ឥឡូវនេះ ដំណើរការនេះកំពុងបន្ត ប៉ុន្តែមិនទាន់ចេញលទ្ធផលនោះទេ។ យ៉ាងណាមិញ ប្រធានាធិបតីតួកគីបានបញ្ជាក់យ៉ាងច្បាស់ថា តួកគី ចង់ចូលរួមក្នុងវេទិកាសំខាន់ៗរបស់ BRICS ផងដែរ។
គួរឲ្យបញ្ជាក់ដែរថា ក្រុមប្រទេស BRICS ត្រូវបានបង្កើតឡើងក្នុងឆ្នាំ២០០៦ ដោយ ប្រេស៊ីល រុស្ស៊ី ឥណ្ឌា និងចិន ជាមួយនឹងប្រទេសអាហ្វ្រិកខាងត្បូងចូលរួមនៅក្នុងឆ្នាំ២០១១។ ក្រុមប្រទេស BRICS បានចាប់ផ្តើមពង្រីកនៅឆ្នាំនេះ នៅពេលដែលប្រទេសនាំចេញប្រេងធំៗមួយចំនួនរបស់ពិភពលោករួមមាន អេហ្ស៊ីប អេត្យូពី អ៊ីរ៉ង់ និងអារ៉ាប់រួម បានក្លាយជាសមាជិកពេញលេញ។ ឥឡូវនេះ មានប្រទេសជាង ៣០ បានដាក់ពាក្យសុំចូលរួមជាផ្លូវការហើយ។ ទន្ទឹមនឹងនេះ គេឃើញថា សមាជិក BRICS កំពុងធ្វើការយ៉ាងសកម្មដើម្បីបោះបង់ប្រាក់ដុល្លារអាម៉េរិកនៅក្នុងពាណិជ្ជកម្មរបស់ពួកគេ។ ប្រសិនបើ BRICS ទទួលបានជោគជ័យក្នុងការផ្លាស់ប្តូរការទូទាត់នៃប្រតិបត្តិការប្រេងជាមួយនឹងរូបិយប័ណ្ណផ្សេងទៀត នោះអាចជះឥទ្ធិពលលើភាគហ៊ុននៃប្រាក់ដុល្លារក្នុងពាណិជ្ជកម្មអន្តរជាតិ និងទុនបំរុងប្តូររូបិយប័ណ្ណសកល។ ទន្ទឹមនឹងនេះដែរ ការដាក់ពាក្យរបស់តួកគីបានបង្កឱ្យមានការព្រួយបារម្ភនៅក្នុងសហភាពអឺរ៉ុប។
លោក Peter Stano អ្នកនាំពាក្យរបស់ប្លុក លើកឡើងថា ក្នុងនាមជាបេក្ខជនមានបំណងចង់ចូលសហភាពអឺរ៉ុប ទីក្រុងអង់ការ៉ាត្រូវគោរពតម្លៃសហភាពអឺរ៉ុប និងគោលនយោបាយការបរទេស បើទោះបីជាមានសិទ្ធិជ្រើសរើសអង្គការអន្តរជាតិណាមួយដើម្បីចូលរួមក៏ដោយ។ ក្នុងឆ្នាំ ១៩៩៩ តួកគីត្រូវបានប្រកាសថាជាប្រទេសបេក្ខភាពសហភាពអឺរ៉ុប ហើយស្ថិតនៅក្រោមការចរចាចាប់តាំងពីឆ្នាំ ២០០៥។ ទោះជាយ៉ាងណាក្តី សភាអឺរ៉ុបបានផ្អាកការពិភាក្សាអំពីការចូលជាសមាជិកជាមួយតួកគីក្នុងឆ្នាំ ២០១៩ ជុំវិញការចោទប្រកាន់ថាមានការរំលោភសិទ្ធិមនុស្ស។ ដូច្នោះហើយ តួកគីមានការខកចិត្តចំពោះកង្វះវឌ្ឍនភាពនៅក្នុងការចរចារជាមួយប្លុកអឺរ៉ុបអស់រយៈពេលជាច្រើនទសវត្សរ៍៕
Account
Security
Favourite Content