សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រោងចក្រផលិតសំបកកង់រថយន្តតម្លៃជាង១៣០លានដុល្លារនៅខេត្តក្រចេះ នឹងសម្ពោធបើកឱ្យដំណើរការផលិតកម្មជាផ្លូវការនៅថ្ងៃទី០៦ ខែកញ្ញា ឆ្នាំ២០២៤។ នេះបើតាមការឱ្យដឹងរបស់លោក វ៉ា ថន អភិបាលនៃគណៈអភិបាលខេត្តក្រចេះ។
រោងចក្រផលិតសំបកកង់រថយន្ត ក្រុមហ៊ុន ញូ ប៊ូស្តា (ខេមបូឌា) មានទីតាំងស្ថិតនៅក្នុងតំបន់រដ្ឋបាលសេដ្ឋកិច្ចពិសេស យូប៊ីអ៊ី ស្រុក ស្នួល ខេត្តក្រចេះ។ រោងចក្រនេះ បានចាប់ផ្តើមសាងសង់នៅថ្ងៃទី០៩ ខែឧសភា ឆ្នាំ២០២៣ និងបានបញ្ចប់នៅខែសីហា ឆ្នាំ២០២៤នេះ។
លោកអភិបាល ខេត្តក្រចេះបានថ្លែងបញ្ជាក់ថា៖
« នេះជាសក្តានុពលសេដ្ឋកិច្ចរបស់ខេត្តក្រចេះ ដែលនឹងផ្តល់ផលប្រយោជន៍ផ្នែកសេដ្ឋកិច្ច និងការងារដល់ប្រជាពលរដ្ឋប្រមាណជិត១០០០កន្លែង»។
គួរបញ្ជាក់ថា៖ ក្រុមហ៊ុនដែលមានប្រភពមកពីទីក្រុងឈីងតាវ ខេត្តសានទុង នៃសាធារណរដ្ឋប្រជាមានិតចិននេះ បានបោះទុនវិនិយោគប្រមាណជាង១៣៨លានដុល្លារ អាមេរិកក្នុងការសាងសង់រោងចក្រផលិតសំបកកងរថយន្ត នៅលើផ្ទៃដីទំហំជាង៤០ហិកតា។
លោក ម៉ែន សុភ័ក្រ ប្រធានសមាគមអភិវឌ្ឍន៍កៅស៊ូកម្ពុជា ធ្លាប់បានលើកឡើងថា ចំពោះដំណឹងពីកិច្ចដំណើរការផលិតកម្មរបស់រោងចក្រផលិតសំបកកង់រថយន្តនៅកម្ពុជា គឺជារឿងដែលល្អបំផុតសម្រាប់ទីផ្សារជ័រកៅស៊ូកម្ពុជា ដោយសារកន្លងមកនេះ ទីផ្សារកៅស៊ូកម្ពុជាភាគច្រើនរំពឹងលើការនាំចេញស្ទើរតែ ១០០ ភាគរយ។
លោកបាននិយាយថា៖
«អ្វីៗកាន់តែប្រសើរសម្រាប់ផលិតផលកៅស៊ូរបស់កម្ពុជាយើងជាមួយខាងរោងចក្រនានា ជាពិសេស រោងចក្រផលិតកង់រថយន្តដែលជាអ្នកប្រើប្រាស់ផលិតផលជ័រកៅស៊ូធម្មជាតិច្រើនជាងគេ ហើយបច្ចុប្បន្ននេះ ក្រុមហ៊ុនផលិតកង់រថយន្ដនៅកម្ពុជាដែលកំពុងតែដំណើរការក៏បានទិញផលិតផលជ័រកៅស៊ូកម្ពុជាជាបណ្ដើរៗរួចហើយ»។
សូមជម្រាបផងដែរថា គិតត្រឹមសប្ដាហ៍ទី១ ខែកញ្ញា ឆ្នាំ២០២៤នេះ ចំពោះតែរោងចក្រផលិតសំបកកង់រថយន្ដនៅកម្ពុជា បានដំណើរការចំនួន ៣ ដូចជា ក្រុមហ៊ុន General Tires Technology (Cambodia) Co., Ltd នៅក្នុងតំបន់សេដ្ឋកិច្ចពិសេសក្រុងព្រះសីហនុ។ ក្រុមហ៊ុន Sailun Group Co Ltd ប្រតិបត្តិការតាមរយៈក្រុមហ៊ុនបុត្រសម្ព័ន្ធរបស់ខ្លួនគឺក្រុមហ៊ុន Cart Tire Co Ltd ដែលមានទីតាំងនៅតំបន់សេដ្ឋកិច្ចពិសេស Qi Lu (Cambodia) ក្រុងបាវិត ជិតព្រំដែនវៀតណាម និងក្រុមហ៊ុនផលិតសំបកកង់ធំទី៣ គឺ Qingdao Double star Group បានសាងសង់រោងចក្រសំបកកង់ថ្មីនៅខេត្តក្រចេះ ដោយសហការជាមួយក្រុមហ៊ុន UBE Development Co Ltd៕
Account
Security
Favourite Content