សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលកម្ពុជាបានចំណាយទឹកប្រាក់រាប់ពាន់លានដុល្លារអាមេរិក ដើម្បីអភិវឌ្ឍន៍ហេដ្ឋារចនាសម្ព័ន្ធ តភ្ជាប់ពីភ្នំពេញដែលជាមជ្ឈមណ្ឌលពាណិជ្ជកម្មពិសេសប្រចាំប្រទេស ទៅកាន់បណ្ដាខេត្តនានា ក៏ដូចជាភ្ជាប់ទៅកាន់ប្រទេសជិតខាង និងពិភពលោកផងដែរ ដោយជាប្រយោជន៍សម្រាប់ជួយសម្រួលដល់ការធ្វើដំណើរ ការដឹកជញ្ជូន ជាពិសេសវិស័យពាណិជ្ជកម្ម។ ជាក់ស្ដែងហេដ្ឋារចនាសម្ព័ន្ធចំនួន៤ប៉ុណ្ណោះ ដែលតភ្ជាប់ចេញពីភ្នំពេញមានតម្លៃរហូតដល់ជាង៦០០០លានដុល្លារអាមេរិក ។
គម្រោងហេដ្ឋារចនាសម្ព័ន្ធសំខាន់ៗទាំង៤ ដែលរាជរដ្ឋាភិបាលបាន និងកំពុងយកចិត្តទុកដាក់ក្នុងការអភិវឌ្ឍន៍យ៉ាងសកម្ម រួមមាន ផ្លូវល្បឿនលឿនភ្នំពេញ-បាវិត, ស្ពានឆ្លងទន្លេពីផ្លូវជាតិលេខ១ ទៅល្វាឯម, អាកាសយានដ្ឋានអន្តរជាតិតេជោ ក្រុងតាខ្មៅ ដែលស្ថិតនៅភាគខាងត្បូងរាជធានីភ្នំពេញ និងគម្រោងព្រែកជីកហ្វូណនតេជោ ដែលទើបបើកការដ្ឋានសាងសង់ជាប្រវត្តិសាស្ត្ររបស់កម្ពុជាកាលពីពេលថ្មីៗនេះ ។
- គម្រោងផ្លូវល្បឿនលឿនភ្នំពេញ-បាវិត ៖ បានបើកការដ្ឋានសាងសង់ជាផ្លូវការកាលពីអំឡុងដើមខែមិថុនា ឆ្នាំ២០២៣កន្លងទៅក្រោមអធិបតីភាពសម្ដេចអគ្គមហាសេនាបតីតេជោហ៊ុន សែន អតីតនាយករដ្ឋមន្ត្រីនៃកម្ពុជា។ គម្រោងនេះ មានតម្លៃប្រមាណ ១,៣៥ពាន់លានដុល្លារអាមេរិក តភ្ជាប់ពីភ្នំពេញ កាត់តាមខេត្តកណ្ដាល ខេត្តព្រៃវែង និងស្វាយរៀង ។ គម្រោងនេះនឹងផ្ដល់នូវប្រយោជន៍ដល់សេដ្ឋកិច្ចកម្ពុជាបន្ថែមទៀតតាមរយៈការដឹកជញ្ជូនឆ្លងប្រទេសពីកម្ពុជាទៅកាន់ប្រទេសវៀតណាម និងទៅកាន់បណ្ដាប្រទេសផ្សេងទៀត ។
- គម្រោងស្ពានឆ្លងទន្លេពីផ្លូវជាតិលេខ១ ទៅល្វាឯម ខេត្តកណ្ដាល ៖ ជាគម្រោងសំខាន់មួយជួយជំរុញការអភិវឌ្ឍនៅក្នុងតំបន់ល្វាឯម ដែលកន្លងមកទំនាក់ទំនងរវាងតំបន់នេះទៅកាន់តំបន់ផ្សេងទៀត គឺត្រូវឆ្លងស្រឡាង ប៉ុន្តែបើស្ពាននេះសាងសង់រួច ពលរដ្ឋនៅតំបន់ល្វាឯមនឹងអាចឆ្លងចេញចូលដោយសេរីទៅកាន់តំបន់ផ្សេងទៀត ងាយស្រួលធ្វើការដឹកជញ្ជូន និងធ្វើដំណើរកាន់តែលឿនរហ័ស និងបានគ្រប់ពេលវេលា ។ គម្រោងនេះ រាជរដ្ឋាភិបាលគ្រោងចំណាយថវិកាប្រមាណជាង ២០០លានដុល្លារអាមេរិក ដើម្បីដំណើរការសាងសង់ ហើយគ្រោងនឹងបញ្ចប់ដំណាលគ្នានឹងផ្លូវល្បឿនលឿនភ្នំពេញ-បាវិតផងដែរ ។
- គម្រោងអាកាសយានដ្ឋានអន្តរជាតិតេជោ ៖ ជាគម្រោងដែលអាចតភ្ជាប់គោលដៅពីភ្នំពេញទៅកាន់ពិភពលោក តាមរយៈជើងហោះហើរខ្នាតធំៗ ដែលនឹងអាចចុះចតនៅអាកាសយានដ្ឋានមួយនេះបាន ។ អាកាសយានដ្ឋានអន្តរជាតិតេជោ ដំណាក់កាលទី១ នឹងដាក់ដំណើរការនៅអំឡុងពេលកណ្ដាលឆ្នាំ២០២៥ខាងមុខ ហើយក៏ជាពេលវេលាបើកទំព័រថ្មីនៃវិស័យអាកាសចរកម្ពុជា ដោយអាចភ្ជាប់ជើងហោះហើរត្រង់ជាមួយបណ្ដាប្រទេសលើពិភពលោកឆ្ងាយៗ ខណៈកន្លងមកត្រូវផ្ទេរជើងហោះហើរជាមួយប្រទេសជិតខាង ឬប្រទេសក្នុងតំបន់ ។គម្រោងអាកាសយានដ្ឋានអន្តរជាតិតេជោ មានតម្លៃប្រមាណ ១,៥ពាន់លានដុល្លារអាមេរិក ដោយបច្ចុប្បន្ននេះ បានចាយទឹកប្រាក់ប្រមាណ១,២ពាន់លានដុល្លារអាមេរិកហើយដែរ ។
- គម្រោងព្រែកជីកហ្វូណនតេជោ ៖ ជាគម្រោងដែលប្រជាពលរដ្ឋទូទាំងប្រទេសទើបតែអបអរសាទរព្រោងព្រាតកាលពីថ្ងៃទី៥ ខែសីហា ឆ្នាំ២០២៤ ជាគម្រោងប្រវត្តិសាស្ត្រដ៏ធំមួយរបស់កម្ពុជា ។ គម្រោងនេះនឹងតភ្ជាប់ពីកំពង់ផែទឹកសាប ទៅកាន់កំពង់ផែសមុទ្រទឹកជ្រៅរបស់កម្ពុជា ហើយនឹងបន្តទៅកាន់កំពង់ផែអន្តរជាតិនៅប្រទេសក្នុងតំបន់ ក៏ដូចជាកំពង់ផែនៅតាមបណ្ដាប្រទេសជាច្រើនទៀតលើពិភពលោក។ គម្រោងនេះមានតម្លៃប្រមាណ ១,៧ពាន់លានដុល្លារ វិនិយោគដោយក្រុមហ៊ុនចំនួន ៤រួមគ្នា ដែលក្នុងនោះ រួមមានក្រុមហ៊ុនសាធារណរបស់រដ្ឋចំនួន២, ក្រុមហ៊ុនឯកជនក្នុងស្រុកចំនួន១ និងក្រុមហ៊ុនរដ្ឋរបស់ចិន ( CBRE ) ចំនួន១ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានមានប្រសាសន៍ថា ការអភិវឌ្ឍហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់បណ្ដាខេត្តនានាក្នុងប្រទេស ក៏ដូចជាទៅកាន់តំបន់ព្រំដែន នឹងជួយជំរុញការវិនិយោគទៅកាន់តំបន់នោះបន្ថែម ដោយមិនផ្ដោតតែលើរាជធានីភ្នំពេញនោះឡើយ ។ ជាក់ស្ដែង ផ្លូវល្បឿនលឿនភ្នំពេញ-ក្រុងព្រះសីហនុ ផ្លូវល្បឿនលឿនភ្នំពេញ -បាវិត នឹងជួយជំរុញវិនិយោគិនក្នុងស្រុក និងមកពីបរទេសងាកទៅកាន់តំបន់គោលដៅនៃផ្លូវល្បឿនលឿនទាំងនោះ ដូចជា ខេត្តព្រះសីហនុ និងក្រុងបាវិតខេត្តស្វាយរៀងជាដើម ដើម្បីបណ្ដាក់ទុនវិនិយោគលើវិស័យផ្សេងៗជាច្រើនទៀត ៕
Account
Security
Favourite Content