បរទេស៖ យោងតាមប្រភពព័ត៌មានពី BBC បានរាយការណ៍ថា ធនាគារកណ្តាលអាមេរិក Federal Reserve បានទម្លាក់អត្រាការប្រាក់ជាលើកដំបូងក្នុងរយៈពេល ៤ ឆ្នាំចុងក្រោយនេះ។

កាលពីថ្ងៃពុធកន្លងទៅនេះ ធនាគារកណ្តាលអាម៉េរិកបានកាត់បន្ថយអត្រាការប្រាក់កម្ចីក្នុងអត្រា ៤,៧៥ ភាគរយទៅ ៥ ភាគរយ ដើម្បីទប់ទល់នឹងអតិផរណា និងដោះស្រាយបញ្ហាទីផ្សារការងារ។ ការកាត់បន្ថយអត្រាការប្រាក់នេះនឹងមានឥទ្ធិពលលើការបញ្ចាំ ប័ណ្ណឥណទាន និងអត្រាសន្សំសម្រាប់មនុស្សរាប់លាននាក់នៅសហរដ្ឋអាមេរិក និងជុំវិញពិភពលោកផងដែរ។  អត្រាការប្រាក់សម្រាប់កម្ចីសំខាន់ៗរបស់ធនាគារកណ្តាលអាម៉េរិកមានឥទ្ធិពលលើសេដ្ឋកិច្ចទូលំទូលាយ ជាពិសេសតម្លៃនៃការខ្ចីប្រាក់។ វាជាអត្រាការប្រាក់ដែលធនាគារផ្តល់ប្រាក់កម្ចីដល់គ្នាទៅវិញទៅមក ហើយវាបម្រើជាគោលសម្រាប់អត្រាការប្រាក់នៅទូទាំងសេដ្ឋកិច្ច។ នៅពេលដែល Fed ដំឡើង ឬបន្ទាបអត្រានេះ វាប៉ះពាល់ដល់ចំនួនប្រាក់ដែលធនាគារត្រូវខ្ចី។ ផ្អែកទៅលើអត្រាការប្រាក់ដែលកំណត់ដោយ Fed ធនាគារទាំងនោះកែសម្រួលអត្រាការប្រាក់ដែលពួកគេត្រូវគិតពីអតិថិជនលើកម្ចីដូចជា កម្ចីទិញផ្ទះ ឥណទាន ឬ បំណុលផ្សេងៗជាដើម។ ប្រសិនបើ Fed ដំឡើងអត្រាការប្រាក់របស់ខ្លួន ធនាគារទាំងនោះនឹងដំឡើងអត្រាការប្រាក់របស់ពួកគេផងដែរ ដើម្បីរ៉ាប់រងការចំណាយកើនឡើងរបស់ពួកគេ ដែលធ្វើឱ្យការខ្ចីប្រាក់កាន់តែថ្លៃសម្រាប់អ្នកប្រើប្រាស់។

អត្រាការប្រាក់ស្ថិតនៅក្នុងកម្រិតប្រហែល ៥,៣ ភាគរយអស់រយៈពេលជាងមួយឆ្នាំមកហើយ ដែលជាកម្រិតខ្ពស់បំផុតចាប់តាំងពីឆ្នាំ ២០០១។ ដូច្នោះហើយ ការកាត់បន្ថយអត្រាការប្រាក់នឹងនាំមកនូវភាពធូរស្រាលខ្លះដល់អ្នកខ្ចី ប៉ុន្តែធនាគារទាំងនោះក៏អាចទម្លាក់អត្រាការប្រាក់របស់ពួកគេដែលកំពុងផ្តល់ជូនអ្នកសន្សំផងដែរ។ ពលរដ្ឋអាមេរិកនឹងរងផលប៉ះពាល់ដោយផ្ទាល់បំផុតចំពោះការការផ្លាស់ប្តូរនេះ ប៉ុន្តែអត្រាប្រាក់កម្ចីទិញផ្ទះនៅសហរដ្ឋអាមេរិកបានធ្លាក់ចុះបន្តិចរួចមកហើយ ដែលជាការរំពឹងទុកមួយសម្រាប់ការផ្លាស់ប្តូរនេះ។ លើសពីនេះ ធនាគារកណ្តាលមួយចំនួនដែលមានរូបិយប័ណ្ណភ្ជាប់ទៅនឹងប្រាក់ដុល្លារជារឿយៗកំណត់អត្រាការប្រាក់របស់ពួកគេផ្អែកទៅលើការសម្រេចចិត្តរបស់ Fed ក៏ទទួលរងឥទ្ធិពលផងដែរ។យ៉ាងណាមិញ ការ​កាត់​បន្ថយអត្រាការប្រាក់គឺ​ជា​ដំណឹង​ល្អ​សម្រាប់​មនុស្ស​នៅ​ក្រៅ​សហរដ្ឋ​អាមេរិក​ដែល​បាន​វិនិយោគ​នៅ​ក្នុង​ទីផ្សារ​ហ៊ុន​អាមេរិក ដោយសារអត្រាការប្រាក់ទាបមាននិន្នាការជំរុញតម្លៃភាគហ៊ុន។ វាមានន័យថា ក្រុមហ៊ុនអាចចំណាយតិចជាងមុនក្នុងខ្ចីបំណុល ហើយពួកគេនឹងបង្កើនការវិនិយោគដើម្បីធ្វើឱ្យអាជីវកម្មទទួលបានប្រាក់ចំណេញកាន់តែច្រើន។ មួយវិញទៀត អត្រាទាបមានន័យថា គណនីសន្សំអាចនឹងមិនសូវទាក់ទាញដូចមុន ដោយសារវិនិយោគិននឹងងាកទៅចាប់អារម្មណ៍លើទីផ្សារភាគហ៊ុនវិញ។

បើប្រៀបធៀបទៅនឹងធនាគារកណ្តាលផ្សេងៗទៀត Fed មានភាពយឺតបន្តិចចំពោះការកាត់បន្ថយអត្រាការប្រាក់។ ជាក់ស្តែង អឺរ៉ុប ចក្រភពអង់គ្លេស នូវែលសេឡង់ និងកាណាដាបានកាត់បន្ថយអត្រាការប្រាក់រួចហើយ ហើយធនាគារនៅក្នុងប្រទេសទីផ្សារកំពុងរីកចម្រើនមួយចំនួនក៏កាត់បន្ថយការប្រាក់រួចផងដែរ។ ជាទូទៅ ការកាត់បន្ថយ ឬដំឡើងអត្រាការប្រាក់របស់ធនាគារកណ្តាលអាម៉េរិក Fed ផ្អែកទៅលើកត្តាពីរគឺ អតិផរណា និងទីផ្សារការងារ។ កាលពីឆ្នាំ ២០២២ អត្រាអតិផរណា និងតម្លៃទំនិញប្រើប្រាស់បានកើនឡើងខ្ពស់ក្នុងល្បឿនដ៏លឿនបំផុតចាប់តាំងពីទសវត្សរ៍ឆ្នាំ១៩៨០ ដែលធ្វើឲ្យធនាគារកណ្តាលអាម៉េរិកដំឡើងអត្រាការប្រាក់ ដើម្បីប្រយុទ្ធប្រឆាំងនឹងអតិផរណា។ ការកើនឡើងអត្រាការប្រាក់មាននិន្នាការធ្វើឱ្យតម្លៃធ្លាក់ចុះ ប៉ុន្តែកាន់តែពិបាកក្នុងការខ្ចី ហើយមនុស្សបានកាត់បន្ថយចំណាយ។ ជាលទ្ធផល តម្រូវការ​តិច​ដែលធ្វើឲ្យកំណើនសេដ្ឋកិច្ច​​កើន​ឡើងយឺត ហើយ​ប្រសិន​បើ​វា​យឺត​ខ្លាំង​ពេក នោះ​ប្រទេសអាចនឹងធ្លាក់ចូល​វិបត្តិ​សេដ្ឋកិច្ច។ កាលពីមុន សេដ្ឋកិច្ចអាមេរិកជារឿយៗបានធ្លាក់ចូលក្នុងវិបត្តិសេដ្ឋកិច្ច បន្ទាប់ពីការដំឡើងអត្រាការប្រាក់ជាបន្តបន្ទាប់ ដែលធ្វើឲ្យមនុស្សរាប់លាននាក់បាត់បង់ការងារ។ ក្នុងរយៈពេលមួយឆ្នាំចុងក្រោយនេះ ភាពអត់ការងារធ្វើនៅសហរដ្ឋអាមេរិកបានបានកើនឡើងខ្ពស់ ដោយសារការជួលបុគ្គលិកធ្លាក់ចុះយ៉ាងខ្លាំង គួបផ្សំនឹងការកាត់បន្ថយបុគ្គលិកនៅក្រុមហ៊ុនមួយចំនួន៕