សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ស្ថានទូតឥណ្ឌូណេស៊ីនៅទីក្រុងភ្នំពេញបានឲ្យដឹងថា ភ្ញៀវទេសចរឥណ្ឌូនេស៊ីមកកម្ពុជាបានកើនឡើង ១១ ដងក្នុងអំឡុងពេល ៥ ឆ្នាំកន្លងទៅ ជាពិសេសចំនួនអ្នកទេសចរឥណ្ឌូនេស៊ីចូលមកកម្ពុជាបានកើនឡើងយ៉ាងខ្លាំងក្នុងរយៈពេល៥ឆ្នាំចុងក្រោយនេះ។ ក្នុងឆ្នាំ ២០២៤ ចំនួនភ្ញៀវទេសចរ ១៦៦.៧៩៥ នាក់ត្រូវបានកត់ត្រា កើនឡើង ១១ ដងបើធៀបនឹងឆ្នាំ២០២០ ដែលមានចំនួន ១៤.៥៦៤ នាក់។ កម្ពុជាបច្ចុប្បន្ននេះស្ថិតក្នុងចំណោមគោលដៅទេសចរណ៍កំពូលទាំង ១០ ដែលប្រជាជនឥណ្ឌូនេស៊ីបានទស្សនាច្រើនបំផុត។
កម្ពុជាកំពុងរំពឹងថានឹងទាក់ទាញទេសចរឥណ្ឌូនេស៊ី មកទស្សនាកម្ពុជាកាន់តែច្រើន ជាពិសេសនៅក្នុងរដូវកាលបៃតង(Green Season)។ ក្តីរំពឹងនេះ បានបង្ហាញបន្ទាប់ពីជំនួបពិភាក្សាថ្មីៗរវាងឯកឧត្តម ហួត ហាក់ រដ្ឋមន្រ្តីក្រសួងទេសចរណ៏ និងឧត្តមបណ្ឌិត សាន់តូ ដាម៉ូស៊ូម៉ាតូ (Santo Darmosumarto) ឯកអគ្គរដ្ឋទូតវិសាមញ្ញ និងពេញសមត្ថភាពរបស់សាធារណរដ្ឋឥណ្ឌូនេស៊ីប្រចាំកម្ពុជា។
គួររំលឹកថា៖ កិច្ចពិភាក្សាការងារ និងទទួលទានអាហារថ្ងៃត្រង់នេះ គឺដើម្បីពិភាក្សាការងារលើការផ្សព្វផ្សាយទេសចរណ៍ និងយុទ្ធសាស្រ្តទាក់ទាញទេសចរឥណ្ឌូនេស៊ី-កម្ពុជានារដូវកាលបៃតងដ៏ស្រស់ស្អាតចាប់ពីខែឧសភា ដល់ខែតុលា។
ឯកឧត្តមរដ្ឋមន្រ្តី បានជម្រាបពីសក្តានុពលទេសចរណ៍កម្ពុជា និងយុទ្ធនាការទស្សនាកម្ពុជានារដូវកាលបៃតងដ៏ស្រស់ស្អាត ព្រមទាំងការទទួលបដិសណ្ឋាកិច្ចដែលរៀបចំជាពិសេសសម្រាប់អ្នកទេសចរម៉ូស្លីម គឺ Muslim Friendly Tourism ដែលបានដាក់ចេញដោយរាជរដ្ឋាភិបាលកម្ពុជា ដើម្បីឱ្យកម្ពុជាក្លាយជាគោលដៅទេសចរណ៍ម៉ូស្លីមពេញនិយមមួយផងដែរ។
ឯកឧត្តមរដ្ឋមន្ត្រីបានលើកឡើងថា៖ តាមរយៈយុទ្ធនាការដ៏មានសារៈសំខាន់នេះ និងការដាក់ចេញនូវ Muslim Friendly Tourism ក្រសួងទេសចរណ៍ ត្រូវបានរដ្ឋាភិបាលប្រគល់តួនាទីដ៏សំខាន់ក្នុងការជួយសម្របសម្រួលការងារជាមួយការីទេសចរណ៍គ្រប់ប្រភេទលើការបញ្ចុះតម្លៃលើរាល់សេវាកម្ម និងផលិតផលទេសចរណ៍ ពិសេសការទទួលបដិសណ្ឋារកិច្ចដែលរួមមានសម្រាប់អ្នកទេសចរម៉ូស្លីម ព្រមទាំងជាមួយអាជ្ញាធរពាក់ព័ន្ធ ដើម្បីសម្រួលការធ្វើទេសចរណ៍ប្រកបដោយផាសុកភាព សន្តិសុខ និងសុវត្ថិភាពដែលជាការទាក់ទាញលំហូរទេសចរជាតិ និងអន្តរជាតិមកទស្សនាកម្ពុជាឱ្យបានច្រើននារដូវកាលបៃតងដ៏ស្រស់ស្អាតដែលរុក្ខជាតិកំពុងតែរីកស្រស់បំព្រងពណ៌បៃតង អមនឹងធម្មជាតិស្រស់ត្រកាល ដោយការប្រោះព្រំពីតំណក់ទឹកភ្លៀងប្រៀបដូចជាពរជ័យពីឋានសួគ៌ ក្រោមបរិយាកាសដ៏ស្ងប់ស្ងាត់សែនមនោរម្យខ្យល់ត្រជាក់ស្រួល ជួយឱ្យអារម្មណ៍ស្រស់ថ្លា បំបាត់រាល់ទុក្ខកង្វល់ ផ្តល់នូវថាមពលផ្លូវកាយ និងផ្លូវចិត្តឱ្យពេញលេញ។
ឯកឧត្តមរដ្ឋមន្ត្រី ហួត ហាក់ បានមានប្រសាសន៍ថា កម្ពុជា បាន និងកំពុងប្រែក្លាយរដូវ Low Season ជំនួសដោយ រដូវ Green Season ដែលបង្ហាញនូវទេសភាពដ៏ស្រស់ស្អាត ជាពិសេសនៅតំបន់ទេសចរណ៍ធម្មជាតិ សហគមន៍កសិទេសចរណ៍ពោរពេញទៅដោយពណ៌បៃតងដ៏ស្រស់បំព្រង។
យោងតាមក្រសួងទេសចរណ៍ កម្ពុជាបានទាក់ទាញភ្ញៀវទេសចរបរទេសចំនួន ៦,៧ លាននាក់ក្នុងឆ្នាំ២០២៤ កើនឡើង ២២,៩ ភាគរយធៀបនឹងឆ្នាំ២០២៣ ហើយបើតាមលោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ និងជាអ្នកនាំពាក្យក្រសួងទេសចរណ៍ បានឱ្យដឹងថា សម្រាប់ឆ្នាំ២០២៥ កម្ពុជា រំពឹងថានឹងទាក់ទាញភ្ញៀវទេសចរអន្តរជាតិចំនួន ៧ លាននាក់។
Account
Security
Favourite Content