បរទេស៖​ យោងតាមប្រភពព័ត៌មានពីរ៉យទ័រ បានរាយការណ៍ថា ទីក្រុងវ៉ាស៊ីនតោនបានផ្អាកការអនុម័តសម្រាប់ការនាំចេញឧស្ម័នរាវធម្មជាតិ (LNG) ដោយសារហេតុផលនៃការប្រែប្រួលអាកាសធាតុ។

លោក Wael Sawan នាយកប្រតិបត្តិក្រុមហ៊ុនថាមពល Shell បានលើកឡើងថា ការផ្អាកបណ្តោះអាសន្ននៃការអនុម័តសម្រាប់ការនាំចេញឧស្ម័នរាវធម្មជាតិដោយរដ្ឋបាលរបស់ប្រធានាធិបតីអាមេរិក Joe Biden នឹងធ្វើឱ្យខូចទំនុកចិត្តក្នុងឧស្សាហកម្មនេះ។  លោក Sawan គិតថា ការប្រកាសនាពេលថ្មីៗនេះដោយទីក្រុងវ៉ាស៊ីនតោនអាចនឹងមិនប៉ះពាល់ខ្លាំងដល់ការផ្គត់ផ្គង់ឧស្ម័ន LNG ក្នុងរយៈពេលខ្លី ឬមធ្យមនោះទេ ប៉ុន្តែវានឹងបំផ្លាញទំនុកចិត្តក្នុងរយៈពេលវែងជាងនេះ។ បន្ថែមពីនេះ ការសម្រេចចិត្តរបស់ប្រធានាធិបតីអាម៉េរិក Joe Biden រួមជាមួយនឹង Venture Global ឆ្ពោះទៅរកការមិនគោរពកិច្ចសន្យាជាមួយអ្នកទិញប្រចាំរបស់ពួកគេ ហើយអ្នកទិញនឹងចាប់ផ្តើមចោទជាសំណួរបន្ថែមទៀតអំពីស្ថិរភាព និងសុវត្ថិភាពនៃ LNG ពីសហរដ្ឋអាម៉េរិក។

ទន្ទឹមនឹងនេះ គេយល់ឃើញថា ការផ្អាកអនុម័តការនាំចេញ LNG បានកើតឡើងនៅពេលដែលក្រុមហ៊ុនថាមពលចម្រុះជាតិសាសន៍របស់អង់គ្លេស ដែលជាអ្នកដឹកជញ្ជូន LNG ធំជាងគេទីពីររបស់ពិភពលោក មានជម្លោះផ្លូវច្បាប់ជាមួយអ្នកនាំចេញអាមេរិក Venture Global LNG ។ នៅក្នុងខែកញ្ញា ក្រុមហ៊ុនថាមពល Shell រួមជាមួយ BP បានចាប់ផ្តើមដោះស្រាយវិវាទដាច់ដោយឡែកប្រឆាំងនឹងក្រុមហ៊ុន​ Venture Global សម្រាប់ការចោទប្រកាន់ថា ក្រុមហ៊ុននេះមិនគោរពកិច្ចសន្យាផ្គត់ផ្គង់តម្លៃរាប់ពាន់លានដុល្លារ។

Kathy Mikells ប្រធានផ្នែកហិរញ្ញវត្ថុនៃ ExxonMobil បានរិះគន់ការសម្រេចចិត្តរបស់សេតវិមានផងដែរ ដោយនិយាយថា​ ការហាមឃាត់បែបនេះនឹងធ្វើឱ្យប៉ះពាល់ដល់កិច្ចខិតខំប្រឹងប្រែងរបស់អាម៉េរិកក្នុងការកាត់បន្ថយការប្រើប្រាស់ថាមពលចេញពីធ្យូងថ្ម។ វាមានន័យថា ឧស្ម័នធម្មជាតិដែលផលិតនៅសហរដ្ឋអាមេរិកនឹងត្រូវបានប្រើប្រាស់តិចជាងមុនក្នុងការជំនួសធ្យូងថ្មនៅជុំវិញពិភពលោក ដែលវាជារឿងអាក្រក់មួយ។

លោក Pierre Breber អនុប្រធានក្រុមហ៊ុន Chevron បានបន្ថែមថា នយោបាយមិនគួរដើរតួនាទីក្នុងគោលនយោបាយថាមពលទេ ដោយសារពិភពលោកត្រូវការថាមពលដែលមានតម្លៃសមរម្យ អាចទុកចិត្តបាន និងស្អាតជាងមុន។ លើសពីនេះ ការនាំចេញឧស្ម័ន LNG របស់សហរដ្ឋអាម៉េរិកគឺផ្តល់ប្រយោជណ៍ច្រើនសម្រាប់ប្រទេសនេះ ដោយសារវាបង្កើតការងារ ជួយដល់តុល្យភាពនៃពាណិជ្ជកម្ម ងាយស្រួលសម្រាប់សម្ព័ន្ធមិត្តក្នុងការស្វែងរកប្រភពថាមពល ហើយវាល្អសម្រាប់បរិស្ថានក្នុងករណីជាច្រើនដូចជា LNG កំពុងជំនួសថាមពលធ្យូងថ្ម។

គួរឲ្យបញ្ជាក់ផងដែរថា ប្រធានាធិបតីសហរដ្ឋអាម៉េរិក Joe Biden បានបញ្ជាឱ្យផ្អាកលើការអនុម័តសម្រាប់ការនាំចេញ LNG លើគម្រោងថ្មីរបស់ប្រទេសនៅថ្ងៃទី ២៦ ខែមករា ដោយលើកឡើងពីការរួមចំណែករបស់អាម៉េរិកចំពោះការប្រែប្រួលអាកាសធាតុ។ ទោះជាយ៉ាងណាក្តី អ្នកផលិតធំៗជាច្រើនបានជំទាស់ជាខ្លាំងចំពោះការផ្លាស់ប្តូរនេះ ដោយសង្កត់ធ្ងន់ថា LNG ដើរតួយ៉ាងសំខាន់ក្នុងការផ្លាស់ប្តូរថាមពល។ សម្រាប់ទិន្នផលថាមពលដូចគ្នា ឧស្ម័ន LNG បញ្ចេញកាបូនឌីអុកស៊ីតពាក់កណ្តាលធ្យូងថ្ម និងតិចជាងប្រេង ៣០ ភាគរយ។

ការសម្រេចចិត្តដ៏ចម្រូងចម្រាសនេះធ្វើឲ្យបក្សសាធារណរដ្ឋនៅក្នុងគណៈកម្មាធិការសភាថាមពល និងពាណិជ្ជកម្មមានភាពមិនសប្បាយចិត្តផងដែរ។ សមាជិកសភាបាននិយាយថា ការផ្អាកបណ្តោះអាសន្នដោយជៀសមិនរួចនឹងធ្វើឱ្យសន្តិសុខថាមពលពិភពលោកចុះខ្សោយ និងធ្វើឱ្យខូចដល់កិច្ចខិតខំប្រឹងប្រែងរបស់សហរដ្ឋអាម៉េរិកក្នុងការជួយសហភាពអឺរ៉ុបកាត់បន្ថយការពឹងផ្អែកលើថាមពលរបស់រុស្ស៊ី។ ចាប់តាំងពីមានសង្គ្រាមរុស្ស៊ី-អ៊ុយក្រែនមក ប្លុកនេះកាន់តែពឹងផ្អែកលើការដឹកជញ្ជូន LNG ពីសហរដ្ឋអាម៉េរិក ដើម្បីជំនួសឧស្ម័នពីរុស្ស៊ី។ យ៉ាងណាមិញ អ្នកជំនាញឧស្សាហកម្មជឿជាក់ថា នៅក្នុងរយៈពេលខ្លី ការផ្អាកការនាំចេញ LNG នឹងមិនមានផលប៉ះពាល់ខ្លាំងដល់ទីផ្សារ ឬលើសន្តិសុខថាមពលរបស់សហភាពអឺរ៉ុបនោះទេ៕