សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិនិយោគិនចិននៅតែឈរលំដាប់កំពូលជាវិនិយោគិនបរទេសដែលបានបណ្ដាក់ទុននៅក្នុងប្រទេសកម្ពុជាច្រើនជាងគេ ជាក់ស្ដែងខែកក្កដា ឆ្នាំ ២០២៤នេះ វិនិយោគិនចិនបានបណ្ដាក់ទុនវិនិយោគក្នុងទំហំទឹកប្រាក់ប្រមាណ២៧០លានដុល្លារអាមេរិកក្នុងប្រទេសកម្ពុជា ដោយភាគច្រើនក្នុងវិស័យឧស្សាហកម្ម ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយកាលពីពេលថ្មីៗនេះ ។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា សម្រាប់តែខែកក្កដា ឆ្នាំ២០២៤កន្លងទៅនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគចំនួន ៤៤ គម្រោង មានទឹកប្រាក់សរុបប្រមាណជាង៣៩៦លានដុល្លារអាមេរិក ក្នុងនោះ វិនិយោគិនចិនបានរួមចំណែកក្នុងការដាក់ទុនវិនិយោគប្រមាណ ៦៨,០៦ភាគរយ ឬប្រមាណ២៧០លានដុល្លារអាមេរិក ។ ក្នុងចំណោមគម្រោងវិនិយោគរបស់វិនិយោគិនទាំង២៧០លានដុល្លារអាមេរិក មានគម្រោងវិនិយោគមួយរបស់ចិន មានទំហំទឹកប្រាក់រហូតដល់១០០លានដុល្លារអាមេរិក គឺគម្រោងបង្កើតតំបន់សេដ្ឋកិច្ចពិសេសកោះកុងចេជាង ដែលមានទីតាំងស្ថិតនៅភូមិអូរជ្រៅ ភូមិផ្លោងនៃឃុំប្រឹងព្រាវ និងភូមិឈើនាង នៃឃុំជ្រោយស្វាយ ស្រុកស្រែអំបិលខេត្តកោះកុង ។ គម្រោងនេះនឹងបង្កើតការងារបានចំនួន៣៣១នាក់ដល់ប្រជាពលរដ្ឋកម្ពុជាផងដែរ ។
របាយការណ៍ដដែលបានបង្ហាញឱ្យឃើញថា ក្នុងខែកក្កដាកន្លងទៅនេះ វិនិយោគិនកម្ពុជាក៏បានបណ្ដាក់ទុនវិនិយោគ១៤,២៤ភាគរយឬប្រមាណ ៥៦,៣៩លានដុល្លារអាមេរិក សិង្ហបុរីចំនួន២,៦៩ភាគរយ វៀតណាមប្រមាន១,៣៥ភាគរយ ហ្វីលីពីនមានប្រមាណ១,៣ភាគរយ ។ ក្រៅពីនេះ មានមកពី ខេមែន អាយលែន ( ប្រទេសតូចមួយមកពីទ្វីបអឺរ៉ុប ) ។
បើតាមក្រុមប្រឹក្សាអភិវឌ្ឍន៍កម្ពុជា បានបង្ហាញឱ្យឃើញថា ខេត្តកំពង់ស្ពឺ និងតាកែវ ជាខេត្តដែលមានការទាក់ទាញការវិនិយោគច្រើនជាងគេ ក្នុងនោះ ខេត្តកំពង់ស្ពឺ ទទួលបានគម្រោងវិនិយោគចំនួន១៣គម្រោង តាកែវ ចំនួន៧គម្រោង ។ ក្រៅពីនេះ មានខេត្តស្វាយរៀងចំនួន៦គម្រោង ខេត្តកោះកុងមានចំនួន៥គម្រោង កណ្ដាលមាន៤គម្រោង ភ្នំពេញ៤គគម្រោង ព្រះសីហនុចំនួន៣គម្រោង និងកំពង់ឆ្នាំចំនួន២គម្រោង ។
បើតាមអ្នកជំនាញអចលនទ្រព្យជាច្រើនបានមើលឃើញថា ការវិនិយោគនៅក្នុងប្រទេសកម្ពុជា ជាពិសេសលើវិស័យអចលនទ្រព្យ នៅតែពឹងផ្អែកលើប្រភពទុនពីប្រទេសចិន ដូច្នេះបើសិនជារំហូរវិនិយោគិនមកពីប្រទេសចិនថមថយនោះ ការវិនិយោគក្នុងប្រទេសកម្ពុជាអាចនឹងមានទំហំថមថយ ម្ល៉ោះហើយទើបកម្ពុជាបានបើកចំហ និងទាក់ទាញការវិនិយោគ មកពីគ្រប់ប្រទេស ។
ជាការកត់សម្គាល់ គម្រោងធំៗមួយចំនួន បាន និងកំពុងបង្ហាញសាច់ដុំទាក់ទាញដល់ការវិនិយោគពីប្រទេសចិន និងប្រទេសផ្សេងៗជាច្រើនទៀត ដូចជាគម្រោងផ្លូវល្បឿនលឿនភ្នំពេញ ក្រុងព្រះសីហនុ (បានដាក់ដំណើរការហើយ ) គម្រោងផ្លូវល្បឿនលឿនភ្នំពេញ-បាវិត ( កំពុងដំណើរការសាងសង់ ) គម្រោងព្រែកជីកហ្វូណនតេជោ និងគម្រោងអភិវឌ្ឍន៍ទីក្រុងរណបរាមស៊ីធី ឬ The Bay Of Light ៕
Account
Security
Favourite Content