បរទេស ៖ មិនមែនជារឿងចៃដន្យនោះទេ ដែលអាមេរិកក្លាយជាមហាអំណាចលេខ១ របស់ពិភពលោកអស់រយៈពេលជាច្រើនទសវត្សរ៍មកហើយនោះ ខណៈដែលកក្តាសំខាន់ក្នុងរុញច្រានឲ្យឥទ្ធិពលអាមេរិកមានកម្លាំងខ្លាំងក្លាបែបនេះ គឺដោយសារការផលិត និងលក់សព្វាវុធយ៉ាងសន្ធឹកសន្ធាប់ទៅឲ្យបណ្តាប្រទេសនានាស្ទើរពាសពេញពិភពលោក។

ដូចទៅនឹងសព្វដង តំណែងជាអ្នកផលិតអាវុធ និងលក់ចេញបានច្រើនជាងគេបំផុតតែងតែបានទៅលើសហរដ្ឋអាមេរិកជានិច្ច ហើយចុងក្រោយនេះ គិតត្រឹមឆ្នាំ២០១៩ រហូតដល់ឆ្នាំ២០២៣ តួលេខដែលមហាយក្សនេះអាចនាំចេញសព្វាវុធទៅក្រៅប្រទេសមានចំណែកដល់ទៅ ៤១,៧ភាគរយនៃទំហំលក់អាវុធនៅទូទាំងពិភពលោក។ ធៀបទៅនឹងឆ្ណាំ២០១៧ ដល់ឆ្នាំ២០២១ អាមេរិក ធ្វើបានត្រឹមតែចំណែកទីផ្សារប្រហែលជា ៣៨,៦ភាគរយប៉ុណ្ណោះ ហើយយោងតាមការស្រាវជ្រាវដោយស្ថាប័នជំនាញ The Statista បានឱ្យដឹងថា ក្នុងរយៈកាលនេះ អាមេរិកអាចលក់អាវុធទៅឲ្យប្រទេសជាដៃគូដល់ទៅជាង ១០០ប្រទេសឯណោះ។

គួរឲ្យចាប់អារម្មណ៍ថា ក្នុងអំឡុងឆ្នាំ២០១៩ ដល់ ឆ្នាំ២០២៣កន្លងទៅនេះ​ បារាំង បានរំកិលខ្លួនមកកាន់តំណែងទី២ បន្ទាប៉ពីអាមេរិក ពោលគឺធ្វើបានប្រមាណជា ១០,៩ភាគរយនៃចំណែកទាំងអស់ដោយបានទំលាក់ចំណាត់ថ្នាក់ប្រទេសរុស្ស៊ី ទៅលេខរៀងទី៣ ជំនួសវិញ។ រុស្ស៊ី កាន់កាប់ចំណែកទីផ្សារលក់អាវុធប្រមាណជា ១០,៥ភាគរយ ដោយសារក្នុងរយៈពេល២ឆ្នាំចុងក្រោយនេះ រដ្ឋាភិបាលទីក្រុងមូស្គូ ចាំបាច់ផ្គត់ផ្គង់តម្រូវការក្នុងស្រុកជាជាងលក់ចេញដើម្បីសម្រេចឲ្យបានប្រតិបត្តិការលុកលុយប្រទេសអ៊ុយក្រែន។

យ៉ាងណាក្តី ចំពោះអតិថិជនដែលបញ្ជាទិញអាវុធធំជាងគេបំផុតរបស់បារាំង និងរុស្ស៊ី គឺជាមហាយក្សអាស៊ី ប្រទេសឥណ្ឌា ដែលត្រូវបានគេចាត់ទុកថា ជាអ្នកនាំចូលអាវុធក្នុងបរិមាណច្រើនជាងគេបំផុតលើពិភពលោកផងដែរ។

ជាមួយគ្នានេះ The Statista ក៏បានបង្ហាញដែរថា បារាំង ក៏ធ្លាប់នាំចេញអាវុធទៅកាន់អតិថិជនរបស់ខ្លួនប្រមាណជា៦៤ប្រទេសផងដែរ ហើយភាគច្រើននៃអាវុធដែលលក់ចេញនោះគឺជាយន្តហោះចម្បាំង ម៉ូដេល Rafales ដែលមានទំហំដល់ទៅ ១ ភាគ ៣​ នៃការនាំចេញសរុប ខណៈដែលរុស្ស៊ីបាននាំចេញទៅកាន់ប្រទេសចំនួន៤១។

យ៉ាងណាក្តី បើបូកសរុបទាំង ៣ ប្រទេសដែលស្ថិតនៅកំពូលតារាងនេះបញ្ជូលគ្នាគេមើលឃើញថា អាវុធរបស់ពួកគេត្រូវបាននាំចេញភាគច្រើនទៅកាន់តំបន់អាស៊ី និងមជ្ឈឹមបូព៍ាហើយក្នុងនោះអតិថិជនធំជាងគេមានដូចជាប្រទេសចិន, អារ៉ាប៊ីសាអូឌីត និងប្រទេសកាតា។

នៅចន្លោះឆ្នាំ២០១៩ ដល់ឆ្នាំ២០២៣ សហរដ្ឋអាមេរិក បានដើរតួយ៉ាងសំខាន់ក្នុងការផ្គត់ផ្គង់អាវុធទៅឲ្យប្រទេសអ៊ុយក្រែន ជាពិសេសរយៈពេល២ឆ្នាំចុងក្រោយនេះ ហើយតាមពីក្រោយដោយប្រទេសអាល្លឺម៉ង់ និងប៉ូឡូញ។ ដោយឡែក អតិថិជនធំបំផុតមួយរបស់រុស្ស៊ី គឺជាប្រទេសអេហ្ស៊ីប ក្នុងពេលជាមួយគ្នានេះ បារាំងក៏ជាអ្នកផ្គត់ផ្គង់អាវុធឲ្យកូរ៉ខាងត្បូងផងដែរ ក្នុងទំហំប្រមាណជា ៩ភាគរយនៃការនាំចូលសរុបរបស់ប្រទេសអាស៊ីមួយនេះ។

គួរឲ្យដឹងដែរថា រុស្ស៊ី បានធ្លាក់ទៅលេខរៀងទី៣ ហើយរត់តាមពីក្រោយដោយប្រទេសចិនលេខរៀងទី៤ ក្នុងនាមជាអ្នកនាំចេញអាវុធច្រើនជាងគេ ហើយលេខរៀងទី៥ បានទៅអាល្លឺម៉ង់ និងបន្តបន្ទាប់ដោយ អ៊ីតាលី , អង់គ្លេស ខណៈដែល អេស្បាញ បានវ៉ាដាច់ អ៊ីស្រាអែល ព្រមទាំងកូរ៉េខាងត្បូងផងដែរ ដោយជាប់ចំណាត់ថ្នាក់លេខរៀងទី៨។ ការដាក់ចំណាត់ថ្នាក់នេះត្រូវបានធ្វើឡើងដោយស្ថាប័នជំនាញស្រាវជ្រាវ The Statista។

គួរបញ្ជាក់ថា គេហទំព័រ The Statista គឺជាក្រុមហ៊ុនអ្នកជំនាញប្រមូលផ្តុំព័ត៌មាន និងទិន្នន័យធំបំផុតរបស់អាល្លឺម៉ង់ ដែលប្រើប្រាស់នៅស្ទើរគ្រប់វិស័យធំៗរបស់ពិភពលោក រួមមានទាំងកសិកម្ម,​ ឧស្សាហកម្ម, សេវាកម្ម ក៏ដូចជាសព្វាវុធនេះផងដែរ៕